އިޤްތިޞާދީ ގޮންޖެހުންތަކުން އަރައިގަނެ ދުވަހެއް ދުވަހަކަށް ސަރުކާރުގެ ސްޕީޑް ދަނީ އަވަސް ވަމުން!
އިޤްތިޞާދީ ގޮންޖެހުންތަކުން އަރައިގަނެ ދުވަހެއް ދުވަހަކަށް ސަރުކާރުގެ ސްޕީޑް ދަނީ އަވަސް ވަމުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފާހަގަކުރައްވައިފިއެވެ.
އޮންލައިން ނޫސް "މިހާރުއަށް ދެއްވި އިންޓަވިއުގައި ރައީސް މުޢިއްޒު ވަނީ އެމަނިކުފާނު ވެރިކަމާއި ހަވާލުވެވަޑައިގެންނެވިއިރު ރާއްޖޭގެ އިޤްތިޞާދީ ޙާލަތުއޮތް ގޮތަށް އަލިއަޅުއްވާލައްވާފައެވެ. އެގޮތުން މަޝްރޫޢުތައް މިސަރުކާރުން ހުއްޓާނުލާ ކަމަށާއި، އެއީ ނިމިދިޔަ ސަރުކާރުން މަޝްރޫޢުތައް ހަވާލުކުރި ކުންފުނިތަކަށް ފައިސާނުދީ ހުރުމުން ދިމާވެފައިވާ ގޮންޖެހުމެއްކަން ރައީސް ފާހަގަކުރެއްވިއެވެ.
ރައީސް ވިދާޅުވީ ނިމިދިޔަ ސަރުކާރުން އެފަދައިން ނުދައްކާ ހުރި ބިލްތަކަށް މިސަރުކާރުން ފައިސާ ދައްކާ އެމީހުން އަލުން މަސައްކަތަށް ގެންނަމުންދާ ކަމަށެވެ.
ރަށެއްގައި ނަރުދަމާގެ މަސައްކަތެއް އޮވެދާނެ ހުއްޓިފައި. އަޅުގަނޑުމެން ހުއްޓާލީކީއެއް ނޫނޭ. އެކަމަކު އެ ފައިސާ އެ ކުންފުންޏަށް ނުދޭތީ އެ މީހުންނަށް މަސައްކަތް ނުކުރެވިގެން ހުއްޓިފައި. ދެން އަޅުގަނޑުމެން މި ކުރާ ކަމަކީ އެހެން ދައްކަން ހުރި ބިލްތައް ދައްކައި އެ މީހުން އަލުން މަސައްކަތަށް ގެންނަނީ. މޮބިލައިޒް ކުރަނީ. އެގޮތަށް މިހާރު ވަރަށް ގިނަ ރަށްތަކުގެ މަސައްކަތް ފެށިއްޖެ: ރައީސް މުޢިއްޒު
ސަރުކާރުގެ ތަރައްޤީގެ ދުވެލީގެ ވާހަކަ ދައްކަވަމުން ރައީސް ވިދާޅުވީ ގޮންޖެހުންތަކާއި އެކުވެސް ދުވަހެއް ދުވަހަކަށް މަހަކަށްވުރެ މަހެއް ސްޕީޑް އަވަސް ވަމުންދާކަމަށެވެ.
އެކަމަކު، ދެން ފެންނާނީ ބާރު ވަމުން ދާ ތަނޭ. ފުރަތަމަ މަހަށް ވުރެ ދެ ވަނަ މަސް ރަނގަޅު. ދެ ވަނަ މަހަށް ވުރެ ތިން ވަނަ މަހު ރަނގަޅުވި. ދެން މާޗު މަހު، އޭޕްރީލް މަހު ދާނީ ރަނގަޅުވަމުންނޭ. މެދުތެރެއަށް ދާއިރު އިރާދަކުރެއްވިއްޔާ ބާރު ސްޕީޑުގައި ހުރިހާ މަސައްކަތެއް ދާނެ: ރައީސް މުޢިއްޒު
ރައީސް މުއިއްޒު ވިދާޅުވީ، ޔާމީންގެ ވެރިކަމަށް ފަހު، ރައީސް އިބްރާހިމް މުހައްމަދު ސޯލިހު ވެރިކަމާ ހަވާލުވެވަޑައިގެންނެވިއިރު އިގުތިސާދު އޮތީ ވަރަށް ވަރުގަދަކޮށް ކަމަށެވެ. އެހެންވެ، އާ ވެރިކަމާ އެކު އޭރު ވަރަށް ބާރު ސްޕީޑުގައި ކަންކަން ކުރިއަށް ގެންދިޔަ ކަމަށް އެ މަނިކުފާނު ވިދާޅުވި އެވެ.
"އެކަމަކު، މި ސަރުކާރު ހަވާލުވިއިރު، އޮތީ އެއްކޮށް އިޤްތިޞާދު ހަލާކު ކޮށްލާފައި ކަމަށް ރައީސް ވިދާޅުވިއެވެ. އެތައް އެތައް ބިލިއަން ރުފިޔާއެއްގެ އެތެރޭގެ ދަރަންޏާއި ބޭރުގެ ދަރަނި އޮތް ކަމަށާއި، އެހެންވީމާ މިއީ މުޅިން ތަފާތު ހާލަތެއް ކަމުގައި ރައީސް ވިދާޅުވި އެވެ. އެ މަނިކުފާނު ވިދާޅުވީ މި ސަރުކާރުން ބަލަނީ އެ ހާލަތުން އަރައިގަންނަން ކަމަށެވެ.
މިސަރުކާރަށް ވެސް ފައިސާ ޗާޕްކޮށްލައިގެން އެ ބާރު ސްޕީޑުގައި ގެންދަން ފަސޭހަވީސްކަން ފާހަގަކުރައްވާ ރައީސް ވިދާޅުވީ އެހެން ނުހަދައި މިސަރުކާރުން ކަންކުރަނީ ޤައުމުގެ އިޤްތިޞާދު ވަރުގަދަ ކޮށްގެން ކަމަށާއި، އެ ނޫން ގޮތަކަށް އިތުރު އިންވެސްޓަރުން ވެސް ނާންނާނެ ކަމަށެވެ. އެމަނިކުފާނު ވިދާޅުވީ ޤައުމާއި ހަވާލުވެވަޑައިގެންނެވިއިރު އިންވެސްޓާ ކޮންފިޑެންސެއް މި ޤައުމުގައި ނެތްކަމަށެވެ.
ނަމަވެސް ރައީސް ވިދާޅުވީ ގޮތުގައި މިހާރު އިތުރު އިންވެސްޓަރުން ޓޫރިޒަމް ދާއިރާ އާއި އެހެން ދާއިރާތަކަށް އަންނަނީ ޝައުގުވެރިކަން ފާޅުކުރަމުން ކަމަށާއި، މިސާލެއްގެ ގޮތުގައި ދެއްކެވީ އެސްއީޒެޑް މަޝްރޫއެވެ. އެ ކަމަށް ވެސް ގިނަ ބަޔަކު ކުރިމަތިލާފައިވާ ކަން ރައީސް ފާހަގަކުރެއްވި އެވެ.
އެއިން ފެންނާނީ އެންމެ ނަތީޖާއެއް ކަމަށާއި އެއީ ރައްޔިތުން މުއްސަނދިވާ ތަންކަމަށް ރައީސް ވިދާޅުވި އެވެ.
ރައީސް ވިދާޅުވީ ކުރީގެ ސަރުކާރުން ކުރިއަށް ގެންދިޔަ ފައިސާ ޗާޕްކުރުން ހުއްޓާލައި އިޤްތިޞާދު މެނޭޖު ކުރުން ވަރަށް ބޮޑު ގޮންޖެހުމަކަށް ވެފައިވާ ކަމަށާއި، އެހެންނަމަވެސް މި ސަރުކާރަށް ކުރިމަތިވިފަދަ އިޤތިޞާދީ ޙާލަތު އޮންނަ އެހެން ޤައުމަކުން ވެސް އެ ކަން އާންމުކޮށް ނުކުރާނެ ކަން އައިއެމްއެފާއި ވޯލްޑް ބޭންކުން ވެސް ފާހަގަކުރި ކަމަށެވެ.