ނުރަސްމީ ދަތުރުފުޅު ނިންމަވާލެއްވުމަށްފަހު ރައީސުލްޖުމްހޫރިއްޔާގެ ދެކަނބަލުން މާލެ ވަޑައިގެންފި
ސިންގަޕޫރަށް ކުރެއްވި ނުރަސްމީ ދަތުރުފުޅު ނިންމަވާލެއްވުމަށްފަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދެކަނބަލުން މިރޭ މާލެ ވަޑައިގަންނަވައިފިއެވެ.
ރައީސް ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު، ސިންގަޕޫރަށް ފުރާވަޑައިގަތީ 21 މާރޗް ވީ ބުރާސްފަތި ދުވަހުގެ ރޭގެ ވަގުތެއްގައެވެ.
ރައީސްގެ ދެކަނބަލުން މިރޭ މާލެ ވަޑައިގަންނަވާފައިވާއިރު، އެމަނިކުފާނު މި ރަމަޟާންމަހު ފެއްޓެވި މަޖްލިސް އިންތިޚާބުގެ ކެމްޕޭން ޙަރަކާތްތައް މާދަމާއިން ފެށިގެން އަނެއްކާވެސް ކުރިއަށް ދާނެއެވެ. އެގޮތުން މާދަމާ ވަޑައިގަންނަވަން ހަމަޖެހިފައިވަނީ މައްޗަންގޮޅި އުތުރު ދާއިރާގެ ރައްޔިތުންގެ ގާތަށެވެ.