ޕީޕީއެމް/ޕީއެންސީ މަޖްލިސް ކެމްޕޭން: ރައީސް މުޢިއްޒުގެ ދެކަނބަލުން މިއަދު ވަޑައިގަތީ މައްޗަންގޯޅި އުތުރަށް!

ކުރިއަށް އޮތް ރައްޔިތުންގެ މަޖްލިސް އިންތިޚާބުގެ ކެމްޕޭނަަށް ޕީޕީއެމް/ޕީއެންސީން ކުރިއަށް ގެންދާ ޙަރަކާތްތަކުގެ ތެރެއިން މިއަދު ރައީސް ބައިވެރިވެ ވަޑައިގަތީ މައްޗަންގޯޅި އުތުރު ދާއިރާގެ ކެމްޕޭން ޙަރަކާތާއެވެ. ރައީސް އާއިއެކު މިއަދުގެ ޙަރަކާތުގައި އެމަނިކުފާނުގެ އަނބިކަނބަލުން ސާޖިދާ މުޙައްމަދުވެސް ބައިވެރިވެ ވަޑައިގަތެވެ.

މިއަދު މެންދުރުފަހު 14:00 ގައި ރައީސް ވަނީ މައްޗަންގޯޅި އުތުރު ދާއިރާއަށް ވަޑައިގަންނަވާފައެވެ. ރައީސްގެ އަރިހުގައި މައްޗަންގޯޅި އުތުރު ދާއިރާއިން މަޖްލިސް އިންތިޚާބުގައި ވާދަކުރައްވާ ސަރުކާރުގެ ކެންޑިޑޭޓް އިބްރާހިމް މުޙައްމަދު (އިއްބެ) ބައިވެރިވެ ވަޑައިގެންނެވިއެވެ.

މި ޙަރަކާތުގެ ތެރެއިން މައްޗަންގޯޅި އުތުރު ދާއިރާގެ ބައެއް ގެތަކަށް ރައީސް ވަޑައިގެންނެވިއެވެ. މިއަދުގެ ޙަރަކާތުގައި ސަރުކާރުގެ ބައެއް ވަޒީރުންނާއި، ކުންފުނިތަކުގެ ވެރިންގެ އިތުރުން، ސްޓޭޓް މިނިސްޓަރުން އަދި ނައިބު ވަޒީރުން ބައިވެރިވެ ވަޑައިގެންނެވިއެވެ.

ރައީސް ޑރ. މުޢިއްޒު މަޖްލިސް ކެމްޕެއިން ރަސްމީކޮށް މާލެ ސަރަޙައްދުގައި ފައްޓަވާފައިވާއިރު، މިހާތަނަށް މާލޭގެ 4 ދާއިރާއަކަށް ރައީސް ވަޑައިގެންފިއެވެ.

ދާދި ފަހުން ރައީސް ވަނީ، ރައީސުލްޖުމްހޫރިއްޔާގެ ހައިސިއްޔަތުން ރާއްޖޭގެ ބައެއް ރަށްރަށަށް ވަޑައިގެން ރައްޔިތުންގެ ހާލުއަހުވާލު ބައްލަވާފައެވެ.