ޑްރޯން އޮޕަރޭޓުކުރާނީ ދިވެހި ސިފައިން، އޮޕަރޭޓުކުރަން ބޭރު ސިފައިން ނުތިބޭނެ: ރައީސް
ދިވެހި ރާއްޖޭގެ ކަނޑުގެ ސަރަޙައްދު 24 ގަޑިއިރު ބެލެހެއްޓުމުގެ ނިޒާމު ޤާއިމުކުރުމަށް ޤައުމީ ދިފާއީ ބާރަށް ހޯދާފައިވާ އަންމޭންޑް އޭރިއަލް ވެހިކަލް (ޔޫއޭވީ)ތައް އޮޕަރޭޓުކުރުމަށް ރާއްޖޭގައި ބޭރު ސިފައިން ނުތިބޭނެކަމަށާއި އެތަކެތި އޮޕަރޭޓުކުރާނީ އެކަމަށް ތަމްރީނުކޮށްފައިވާ ދިވެހި ސިފައިންކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ އާންމުންގެ ސުވާލަށް ޖަވާބު ދިނުމުގެ ގޮތުން ސަރުކާރުން ކުރިއަށްގެންދާ ރައީސްގެ "ޖަވާބު" ގައެވެ.
މއ.ނައިޓްލައިޓް، މުޙައްމަދު އިހުސާން ފާހަގަކުރީ މީގެ ކުރިން އެހެން ޤައުމެއްގެ ސިފައިން ގެނެސްގެން ރާއްޖޭގެ އިޤުތިޞާދީ ސަރަހައްދު ބަލަހައްޓަމުން އައި އައުން ނިމުމަކަށް ގެނެސްފައިވާ ކަމެވެ. އަދި ރާއްޖެއިން އެކަންކުރުމަށް ޑްރޯނު ހޯދާފައިވާއިރު އެ ޑްރޯނުތައް އޮޕަރޭޓުކުރުމުގައި އެއްވެސް މިންވަރަކަށް ބޭރު ސިފައިން ބައިވެރިވާނެތޯ އިހުސާން ރައީސްއާއި ސުވާލުކުރިއެވެ.
އިހުސާންގެ ސުވާލަށް ޖަވާބުދެއްވަމުން ރައީސް ވިދާޅުވީ، ރާއްޖޭގައި ބޭރުގެ އެއްވެސް ޤައުމެއްގެ ސިފައިން ތިބޭ ގޮތަކަށް އެއްވެސް ސިޔާސަތެއް ނުގެންގުޅުއްވާނެ ކަމަށެވެ. އަދި ސިފައިންގެ އެއާކޯ ޚިދުމަތާއި ޑްރޯންތައް ދުއްވުމަށްވެސް އަދި އެކަމުގައި އެހީތެރިވުމަށްވެސް ބޭރު ޤައުމެއްގެ ސިފައިން ނުތިބޭނެކަމަށްވެސް ރައީސް ވިދާޅުވިއެވެ.
އިހަށްދުވަހު މި ތައާރަފުކުރި ސިފައިންގެ އެއާކޯ ސާވިސްގައިވެސް، އަދި އޭގެ ދަށުން ދުއްވަން ފެށި ޔޫއޭވީތައް ޑްރޯނުތައް ދުއްވުމުގައި ނުތިބޭނެ ބޭރުގެ ސިފައިންނެއް. ބޭރުގެ އެއްވެސް ޤައުމެއްގެ ސިފައިންނެއް އެކަމުގައި އެހީތެރިވާކަށް ނުތިބޭނެ ރައީސް: މުޢިއްޒު
ރައީސް ވިދާޅުވީ ތުރުކީއަށް ސިފައިން ގޮސް އެތަނުން ތަމްރީނު ހޯދައިގެން އައިސް މިހާރުވެސް އެ ޔޫއޭވީތައް ދުއްވަނީ ދިވެހި ސިފައިން ކަމަށާއި، އަދި ކުރިއަށް އޮތް ތާނގައި އިތުރު ބެޗުތައް ތަމްރީނު ހަދައިގެން އަންނާނެ ކަމަށެވެ. އަދި މިހާރުވެސް އެއްބަޔަކު ޓްރެއިނިންގައި ވާކަން ރައީސް ފާހަގަކުރެއްވިއެވެ.
ނިންމަވައިލައްވަމުން ރައީސް ދެއްވި ޔަގީންކަމަކީ ޑްރޯނުތައް އޮޕަރޭޓުކުރުމާއި އުދުހުމުގައި ކުރަންޖެހޭ ހުރިހާ ކަމެއް ކުރާނީ ދިވެހި ސިފައިން ކަމުގެ ޔަގީންކަމެވެ.