'ދިވެހީންގެރާއްޖޭގެ' ކަންކަން ރަނގަޅަށް ގެންދެވޭނީ ރައްޔިތުންގެ މަޖިލިސް ސަރުކާރަށް ލިބިގެން: ރައީސް
މިހާރު މިތިބީ "ދިވެހީންގެރާއްޖޭގައި" ކަމަށާއި ދިވެހިންގެރާއްޖޭގެ ކަންކަން ދިވެހި ރައްޔިތުން އެދޭގޮތަށް ކުރިއަށް ގެންދެވޭނީ ރައްޔިތުންގެ މަޖިލީހުގެ މެޖޯރިޓީ ސަރުކާރަށް ލިބިގެން ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެ އެވެ.
ކުރިއަށްއޮތް ރައްޔިތުންގެ މަޖިލިސް އިންތިހާބުގެ ކެމްޕެއިނަށް ރޭ ހުޅުމާލޭގައި ބޭއްވި ޖަލްސާއެއްގައި ވާހަކަދައްކަވަމުން ރައީސް ވިދާޅުވީ، ރައްޔިތުންގެ އަޣުލަބިއްޔަތުން "ދިވެހީންގެރާއްޖެ" ގެނައީ ކުރީ ސަރުކާރު ކަމުނުގޮސްގެން ކަމަށާއި، މި ސަރުކާރުގައި ރައްޔިތުން އެދޭ ގޮތަށް ކަންކަން ގެންދަވާނެ ކަމަށެވެ. އެހެން ނަމަވެސް، ރައްޔިތުންގެ އެދޭގޮތަށް ސަރުކާރަށް ތަރައްޤީ ގެނެވޭނީ ރައްޔިތުންގެ މަޖިލީހުގެ އަޣުލަބިއްޔަތާއި އެއްބާރުލުން ލިބިގެން ކަމަށް ރައީސް ވިދާޅުވި އެވެ.
އެހެންވީމަ ސަރުކާރުގެ ހުރިހާ ކެންޑިޑޭޓުން ރާއްޖޭގެ 93 ދާއިރާއަށް ކުރިމަތިލާފައިވަނީ. މިބޭފުޅުން ހޮއްވެވުމުގައި އެއްބާރުލުން ދެއްވުމަށް އަޅުގަނޑު މި އެދޭ ސަބަބަކީ އެއީ: ރައީސް މުޢިއްޒު
ރައީސް ވިދާޅުވީ އެއީ ޤާނޫނުއަސާސީ ބައްޓަންވެފަ އޮތް ގޮތުން އެކަން އޮންނަ ގޮތް ކަމަށާއި، ޤާނޫނުތައް ހަދަނީ ރައްޔިތުންގެ މަޖިލީހުން ކަމަށް ވުމުން ސަރުކާރުން ބިލުތަކެއް ފޮނުވިޔަސް އެ ބިލުތައް ޤާނޫނުތަކަށް ހަދައިދީ ފާސްކޮށްދޭނީ މަޖިލިސް މެންބަރުން ބޭނުންވިއްޔާ ބޭނުން ގޮތަކަށް ކަން ރައީސް ފާހަގަކުރެއްވި އެވެ.
މިހާރު މިތިބީ ދިވެހީންގެ ރާއްޖޭގަ. ދެން މަޖިލީހުގެ ދައުރު ފުރިހަމަކޮށްދިނުން މިއޮތީ ރައްޔިތުންގެ އަތްޕުޅުގަ. އޭރުން އިރާދަކުރެއްވިއްޔާ ސަރުކާރުން، ރައްޔިތުން އެދޭގޮތަށް ދިވެހީންގެރާއްޖޭގެ ކަންކަން ދިވެހިން އެދޭގޮތަށް ގެންދިއުމުގަ ރައްޔިތުންގެ މަޖިލީހުގެ ފުރިހަމަ ދައުރު އަދާކުރުމުގެ ފުރުސަތު އެ ދެވެނީ. އެހެންވީމަ އެކަން ކޮށްދިނުމަށް އިލްތިމާސްކުރަން:
ރައީސް މުޢިއްޒު
މިހާރުވެސް ސަރުކާރުން ގިނަ ދާއިރާތަކެއްގެ ބިލުތައް މަޖިލީހަށް ފޮނުވާފައިވާކަން ފާހަގަކުރެއްވާ ރައީސް ވިދާޅުވީ އޭގެ ތެރޭގައި ރިއަލްއެސްޓޭޓް ދާއިރާ، ކޮންސްޓްރަކްޝަން ދާއިރާ، ގެދޮރުވެރިކަމުގެ ދާއިރާ އަދި އިގްތިސާދީ އެކި އެކި ކަހަލަ ބިލުތައް ހިމެނޭ ކަމަށެވެ.
މިހާރުގެ މަޖިލިސް އެކަން ނުކޮށްދީފިއްޔާ އެކަން މި ދައުރު ނިމޭއިރު ނުކޮށްދީފީއްޔާ ދެން އޮންނާނީ، ދެން އަންނަ މަޖިލީހެއް ހޮވިގެން އެކަން ކުރަންޖެހޭނީ. އެހެންވީމަ މަޖިލީހަށް ހޮވޭ މެންބަރުން އެއީ ސަރުކާރުގެ ތެރެއިން، ރައްޔިތުންނަށްޓަކައި ކަންކަން ކޮށްދިނުމުގައި ވަރަށް މުހިންމު އަސާސީ ދައުރެއް އަދާކުރާގޮތަށް ގާނޫނުއަސާސީގައި ހިމަނާފައިވާ ބޭފުޅުންތަކެއް، އެހެންވީމަ ސަރުކާރުން އަދި ކިތަންމެ ބިޔަ ބޮޑެތި މަޝްރޫއުތަކެއް ހިންގަން ބޭނުންވިޔަސް އެކަން ކުރުމުގައި ހަމަ ހުރިހާ ގޮތަކުން ހުރަސް އެޅުއްވޭނެ ރައްޔިތުންގެ މަޖިލީހަށް: ރައީސް މުޢިއްޒު
ރައީސްގެ ރިޔާސީ ވައުދުފުޅުތަކުގެ ތެރޭގައި ހިމެނޭ، 20 އަހަރު ދުވަހުގެ ޤައުމީ ތަރައްޤީގެ ޕްލޭން އެކުލަވާލުމަށް ވެސް ރައްޔިތުންގެ މަޖިލީހުގެ އަޣުލަބިއްޔަތު ބޭނުންވާކަން ރައީސް ފާހަގަކުރެއްވި އެވެ. އެހެންކަމުން އެފަދަ ގިނަ ސަބަބުތަކަށްޓަކައި ކުރިއަށް އޮތް މަޖިލިސް އިންތިޚާބުގައި ސަރުކާރުގެ މެންބަރުން ހޮއްވަވައިދިނުމަށް ރައީސް އެދިލެއްވި އެވެ.