ޕީޕީއެމް/ޕީއެންސީ މަޖްލިސް ކެމްޕޭން: ރައީސް މުޢިއްޒު މިއަދު ވަޑައިގަތީ ވިލިމާލެ ދާއިރާއަށް!

ކުރިއަށް އޮތް ރައްޔިތުންގެ މަޖްލިސް އިންތިޚާބުގެ ކެމްޕޭނަަށް ޕީޕީއެމް/ޕީއެންސީން ކުރިއަށް ގެންދާ ޙަރަކާތްތަކުގެ ތެރެއިން މިއަދު ރައީސް ޑރ. މުޢިއްޒު ބައިވެރިވެ ވަޑައިގަތީ ވިލިމާލެ ދާއިރާގެ ކެމްޕޭން ޙަރަކާތުގައެވެ.

މިއަދު މެންދުރުފަހު 14:00 ގައި ރައީސް ވަނީ ވިލިމާލެ ދާއިރާއަށް ވަޑައިގަންނަވާފައެވެ. ރައީސްގެ އަރިހުގައި ވިލިމާލެ ދާއިރާއިން މަޖްލިސް އިންތިޚާބުގައި ވާދަކުރައްވާ ސަރުކާރުގެ ކެންޑިޑޭޓް މުޙައްމަދު އިސްމާއިލް ބައިވެރިވެ ވަޑައިގެންނެވިއެވެ.

މި ޙަރަކާތުގެ ތެރެއިން ވިލިމާލެ ދާއިރާގެ ބައެއް ގެތަކަށް ރައީސް ވަޑައިގެންނެވިއެވެ. މިއަދުގެ ޙަރަކާތުގައި ސަރުކާރުގެ ބައެއް ވަޒީރުންނާއި، ކުންފުނިތަކުގެ ވެރިންގެ އިތުރުން، ސްޓޭޓް މިނިސްޓަރުން އަދި ނައިބު ވަޒީރުން ބައިވެރިވެ ވަޑައިގެންނެވިއެވެ.

ރައީސް ޑރ. މުޢިއްޒު މަޖްލިސް ކެމްޕެއިން ރަސްމީކޮށް މާލެ ސަރަޙައްދުގައި ފައްޓަވާފައިވާއިރު، މިހާތަނަށް މާލޭގެ 5 ދާއިރާއަކަށް ރައީސް ވަޑައިގެންފިއެވެ.

ދާދި ފަހުން ރައީސް ވަނީ، ރައީސުލްޖުމްހޫރިއްޔާގެ ހައިސިއްޔަތުން ރާއްޖޭގެ ބައެއް ރަށްރަށަށް ވަޑައިގެން ރައްޔިތުންގެ ހާލުއަހުވާލު ބައްލަވާފައެވެ.