ފާއިތުވި 5 އަހަރު މިސްރާބު އޮތީ އަޅުވެތިކަމާ ދަރަނިވެރިކަމާ ޚިޔާނާތަށް: ރައީސް

ފާއިތުވެގެންދިޔަ 5 އަހަރު ދިވެހިރާއްޖޭގެ މިސްރާބު ހުރީ އަޅުވެތިކަމާއި، ދަރަނިވެރި ކަމާއި، ޚިޔާނާތަށްދިމާލަށް ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވީ ކުރިއަށް އޮތް ރައްޔިތުންގެ މަޖިލިސް އިންތިޚާބުގައި ވިލުފުށީ ދާއިރާއަށް ޕީއެންސީ ޓިކެޓުގައި ކުރިމަތިލައްވާ ކެނޑިޑޭޓް ހަސަން ވަޙީދުގެ ކެންޕޭން ޖަގަހަ ހުޅުވުމަށް ރޭ ހުޅުމާލޭގައި ބޭއްވި ހަރަކާތުގައި ވާހަކަފުޅު ދައްކަަވަމުންނެވެ.

ރައީސް ވިދާޅުވީ އިދިކޮޅު އެމްޑީޕީގެ ޓްރެކް ރެކޯޑަށް ބައްލަވާލެއްވުމުން ހާމަވެގެންދަނީ މިދިޔަ 5 އަހަރު އެމްޑީޕީގެ ވެރިކަމުގައި ރާއްޖޭގެ މިސްރާބު އަޅުވެތިކަމާއި ދިމާލަށް ގޮސް ނިމިފައިވާކަމެވެ.

އެމްޑީޕީގެ ވެރިކަމުގައި އިންޑިއާގެ ސިފައިންގެ އެތައް ބަޔަކު ރާއްޖޭގައި ޤާއިމުވެ ތިބިކަމަށާއި ނަމަވެސް ރައްޔިތުން ނިންމި ނިންމުމުގެ މަތިން އިންޑިއާ ސިފައިން އަނބުރާ ފޮނުވާލުމުގެ މަސައްކަތް ކާމިޔާބުކަމާއެކު ކޮށްނިމެމުންދާ ކަމަށްވެސް ރައީސް ވިދާޅުވިއެވެ.

އަދި މީގެ އިތުރުން އެތައް ބިލިއަން ރުފިޔާއެއްގެ ލޯނުތައް ނަގައި, އެލޯނުތައް އަނބުރާ ދެއްކޭނެ އިންތިޒާމު ހަމަނުޖައްސައި ހުރިކަމަށާއި އެމްޑީޕީގެ ވެރިކަން ނިންމާލިއިރު ދިވެހިރައްޔިތުންގެ ބޮލުގައި 120 ބިލިއަން ރުފިޔާގެ ދަރަނި އަޅުވާފައިވާކަންވެސް ރައީސް ފާހަގަކުރެއްވިއެވެ. އަދި އެމްޑީޕީގެ ވެރިކަން ނިމުނުއިރު ދިވެހިރާއްޖޭގެ ކުދި އަދި މެދުފަންތީގެ އެތައް ވިޔަފާރިއަކަށް ސަރުކާރު ދަރާފައި އޮތްކަންވެސް ރައީސް ފާހަގަކުރެއްވިއެވެ.

އެމްޑީޕީއަށް ވަރަށް ބޮޑަށް ފާޑު ވިދާޅުވެ،ރައީސްގެ ވާހަކަފުޅުގައި ވިދާޅުވީ އެމްޑީޕީ ސަރުކާރެއް އޮތް އިރު, ރައްޔިތުންގެ މަޖިލީހުގެ ސުޕަމެޖޯރިޓީ އެޕާޓީއަށް ލިބިފައިވާކަމަށާއި މެޖޯރިޓީއޮތް އިރުވެސް ރައްޔިތުންނަށް އިޚްލާސްތެރި ޚިދުމަތެއް ކޮށްފައި ނުވާކަމަށެވެ.

އެމްޑީޕީއަށް މިހާރުވެސް ރައްޔިތުންގެ މަޖިލީހުގެ މެޖޯރިޓީ އެބައޮތް ކަމަށާއި މިހާރު ނުކޮށްދެވޭ ޚިދުމަތެއް ދެންއަންނަ މަޖިލީހުން މެޖޯރިޓީ ލިބިގެން ކޮށްދޭނެ ގޮތަކާއިމެދު ރައީސް ސުވާލު އުފެއްދެވިއެވެ.