ޕީޕީއެމް/ޕީއެންސީ މަޖްލިސް ކެމްޕޭން: ރައީސް މުޢިއްޒު މިއަދު ވަޑައިގަތީ ހެންވޭރު އުތުރު ދާއިރާއަށް!

ކުރިއަށް އޮތް ރައްޔިތުންގެ މަޖްލިސް އިންތިޚާބުގެ ކެމްޕޭނަަށް ޕީޕީއެމް/ޕީއެންސީން ކުރިއަށް ގެންދާ ޙަރަކާތްތަކުގެ ތެރެއިން މިއަދު ރައީސް ޑރ. މުޢިއްޒު ބައިވެރިވެ ވަޑައިގަތީ ހެންވޭރު އުތުރު ދާއިރާގެ ކެމްޕޭން ޙަރަކާތުގައެވެ.

މިއަދު މެންދުރުފަހު 14:00 ގައި ރައީސް ވަނީހެންވޭރު އުތުރު ދާއިރާއަށް ވަޑައިގަންނަވާފައެވެ. ރައީސްގެ އަރިހުގައި ހެންވޭރު އުތުރު ދާއިރާއިން މަޖްލިސް އިންތިޚާބުގައި ވާދަކުރައްވާ ސަރުކާރުގެ ކެންޑިޑޭޓް އަހުމަދު އައިފާން ބައިވެރިވެ ވަޑައިގެންނެވިއެވެ.

މި ޙަރަކާތުގެ ތެރެއިން ހެންވޭރު އުތުރު ދާއިރާގެ ބައެއް ގެތަކަށް ރައީސް ވަޑައިގެންނެވިއެވެ. މިއަދުގެ ޙަރަކާތުގައި ސަރުކާރުގެ ބައެއް ވަޒީރުންނާއި، ކުންފުނިތަކުގެ ވެރިންގެ އިތުރުން، ސްޓޭޓް މިނިސްޓަރުން އަދި ނައިބު ވަޒީރުން ބައިވެރިވެ ވަޑައިގެންނެވިއެވެ.

ރައީސް ޑރ. މުޢިއްޒު މަޖްލިސް ކެމްޕެއިން ރަސްމީކޮށް މާލެ ސަރަޙައްދުގައި ފައްޓަވާފައިވާއިރު، މިހާތަނަށް މާލޭގެ 6 ދާއިރާއަކަށް ރައީސް ވަޑައިގެންފިއެވެ.

ދާދި ފަހުން ރައީސް ވަނީ، ރައީސުލްޖުމްހޫރިއްޔާގެ ހައިސިއްޔަތުން ރާއްޖޭގެ ބައެއް ރަށްރަށަށް ވަޑައިގެން ރައްޔިތުންގެ ހާލުއަހުވާލު ބައްލަވާފައެވެ.