ފައިސާގެ އަގު ހިފެހެއްޓި، ޑޮލަރުގެ އަގު ތިރިވެ، އިޤްތިޞާދަށް ދިރުން އަންނަން ފަށައިފި: ރައީސް

ފާއިތުވި 4 މަސްދުވަހުގެ ތެރޭގައި ކުރެވުނު މަސައްކަތްތަކުން، ފައިސާގެ އަގު ހިފެހެއްޓި، އިޤްތިޞާދު ރަނގަޅުވާން ފަށާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަސައްކަތްތަކާއި ގުޅޭގޮތުން ޕީއެސްއެމް ނިއުސްއަށް ދެއްވި ޚާއްޞަ އިންޓަރވިއުއެއްގައި ރައީސް ވިދާޅުވީ ވެރިކަމުގެ 4 މަސްދުވަހުގެ މަސައްކަތްޕުޅާއި ދޭތެރޭ ވިދާޅުވީ ހިތްޕުޅުހަމަޖެހިވަޑައި ގަންނަވާކަމަށެވެ.

ރައީސް ވިދާޅުވީ ވެރިކަމާ ހަވާލުވެވަޑައިގެންނެވިއިރު ޤައުމުގެ އިޤްތިޞާދު އޮތީ އަނދަވަޅެއްގެ ތެރޭގައިކަމަށާއި، 120 ބިލިއަން ރުފިޔާގެ ދަރަނި އޮތްކަމަށެވެ. އޭގެ އިތުރުން ކުރީ ސަރުކާރުގައި ފައިސާ ޗާޕްކުރުމުގެ ސަބަބުން ދިވެހި ރުފިޔާގެ އަގުވެއްޓި، ޑޮލަރުގެ އަގު އިންތިހާއަށް އޮތީ އުފުލިފައިކަން ރައީސް ފާހަގަކުރެއްވިއެވެ. ޚާއްޞަކޮށް އިޤްތިޞާދު ހީނަރުވެ، ކުދި ވިޔަފާރިތައް އޮތީ ހުއްޓިފައިކަމަށް ރައީސް ވިދާޅުވިއެވެ.

ރައީސްގެ ވާހަކަފުޅުގައި ސަރުކާރާ ޙަވާލުވެވަޑައިގެންނެވިއިރު ސަރުކާރުގެ ކުންފުނިތަކުގެ ތެރެއިން ބައެއް ކުންފުނިތައް އޮތީ ބަނގުރޫޓުވެފައިކަމަށާއި، ރަނގަޅަށް ހިނގާ ކުންފުނިތަކުގެ ފައިދާވެސް ވަރަށް ބޮޑަށް ދަށަށް ގޮސްފައި އޮތްކަމަށެވެ. މީގެ އިތުރުން އިޤްތިޞާދު މިންކުރާ ކްރެޑިޓް ރޭޓިންގައިވެސް އޮތީ ވަރަށް ދަށުގައިކަމަށް ރައީސް ވިދާޅުވިއެވެ. ޖުމްލަކޮށް ޤައުމުގެ ހާލަތު އޮތީ ވަރަށް ނިމެތިކޮށްކަމަށާއި، އިޤްތިޞާދަށް ދިރުން ގެނެސްދޭނެ ކަންކަން ކުރިއަށް ނުދާކަމަށްވެސް ރައީސް ވިދާޅުވިއެވެ.