ރައީސް ޑރ. މުޢިއްޒު މިރޭ ހިޔާ ސަރަޙައްދުގެ ރައްޔިތުންނާ ބައްދަލު ކުރައްވަނީ!

ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ހުޅުމާލެ ދެވަނަ ފިޔަވަހީގެ ހިޔާ ސަރަޙައްދުގައި ދިރިއުޅޭ ރައްޔިތުންނާ މިރޭ ބައްދަލުކުރައްވާ ގޮތަށް ހަމަޖެހިއްޖެއެވެ.

މި ބައްދަލުވުން ބޭއްވުމަށް ހަމަޖެހިފައިވަނީ މިރޭ 9:30 ގައި ހުޅުމާލެ ދެވަނަ ފިޔަވަހީގެ ހިޔާ ޕާކްގައެވެ.

މިރޭ ކުރިޔަށް ގެންދަން ހަމަޖެހިފައިވާ މި އިވެންޓުގައި ސަރުކާރުގެ ފަރާތުން މަޖިލިސް އިންތިޚާބުގައި ވާދަކުރައްވާ ހުރިހާ ކެންޑިޑޭޓުން ހެން ބައިވެރިވެ ވަޑައިގަންނަވާނެއެވެ. އަދި ރައީސް މުޢިއްޒު ހުޅުމާލޭ ރައްޔިތުންނާ ބަައްދަލު ކުރައްވައި މި އިވެންޓުގައި ވާހަކަފުޅު ދައްކަވާނެއެވެ.

މާލޭގައި ރޭ ބޭއްވި ކެމްޕެއިން އިވެންޓެއްގައި ރައީސް ޑރ. މުޢިއްޒު ވިދާޅުވީ އިދިކޮޅު ފަރާތްތަކުން ސަރުކާރާ މެދު ރައްޔިތުންގެ އިތުބާރު ގެއްލުވާލުމަށް ދައްކަމުންދާ ވާހަކަތަކުގެ ތަފްސީލް ހާމަ ކުރައްވާނެ ކަމަށެވެ. އެއް ކަމެއްގެ ގޮތުގައި ރައީސް ފާހަގަ ކުރެއްވީ ރަސްމާލެ މަޝްރޫއުއާ ބެހޭ ގޮތުން ދައްކަމުން އަންނަ ވާހަކަތަކެވެ.

ކުރިޔަށް އޮތް 20 ވަނަ ރައްޔިތުންގެ މަޖިލީހުގެ މެޖޯރިޓީ ސަރުކާރަށް ހޯދުމަށްޓަކައި ކެމްޕޭން ޙަރަކާތްތައް ފަށާފައިވާއިރު، ރައީސް މުޢިއްޒު ވަނީ މާލޭގެ އެކި ދާއިރާތަކަށް ޒިޔާރަތްކޮށް ރައްޔިތުންގެ ޝަކުވާތައް އަޑު އައްސަވާފައެވެ. އަދި ރައްޔިތުން ބޭނުންވާ ތަރައްޤީ ގެނައުމަށްޓަކައި ކުރިޔަށް އޮތް މަޖިލިސް އިންތިޚާބުގައި ސަރުކާރަށް މެޖޯރިޓީ ނަގައި ދިނުމަށް އެމަނިކުފާނު ވަނީ އެދިވަޑައިގެންފައެވެ.