ޕީޕީއެމް/ޕީއެންސީ މަޖްލިސް ކެމްޕޭން: ރައީސް މުޢިއްޒު މިއަދު ވަޑައިގަތީ ހުޅުމާލެ މެދު ދާއިރާއަށް!

ކުރިއަށް އޮތް ރައްޔިތުންގެ މަޖްލިސް އިންތިޚާބުގެ ކެމްޕޭނަަށް ޕީޕީއެމް/ޕީއެންސީން ކުރިއަށް ގެންދާ ޙަރަކާތްތަކުގެ ތެރެއިން މިއަދު ރައީސް ޑރ. މުޢިއްޒު ބައިވެރިވެ ވަޑައިގަތީ ހުޅުމާލެ މެދު ދާއިރާގެ ކެމްޕޭން ޙަރަކާތުގައެވެ.

މިއަދު މެންދުރުފަހު 14:00 ގައި ރައީސް ވަނީ ހުޅުމާލެ މެދު ދާއިރާއަށް ވަޑައިގަންނަވާފައެވެ. ރައީސްގެ އަރިހުގައި ހުޅުމާލެ މެދު ދާއިރާއިން މަޖްލިސް އިންތިޚާބުގައި ވާދަކުރައްވާ ސަރުކާރުގެ ކެންޑިޑޭޓް ޝަޒީމް ބައިވެރިވެ ވަޑައިގެންނެވިއެވެ.

މި ޙަރަކާތުގެ ތެރެއިން ހުޅުމާލެ މެދު ދާއިރާގެ ބައެއް ގެތަކަށް ރައީސް ވަޑައިގެންނެވިއެވެ. މިއަދުގެ ޙަރަކާތުގައި ސަރުކާރުގެ ބައެއް ވަޒީރުންނާއި، ކުންފުނިތަކުގެ ވެރިންގެ އިތުރުން، ސްޓޭޓް މިނިސްޓަރުން އަދި ނައިބު ވަޒީރުން ބައިވެރިވެ ވަޑައިގެންނެވިއެވެ.

ރައީސް ޑރ. މުޢިއްޒު މަޖްލިސް ކެމްޕެއިން ރަސްމީކޮށް މާލެ ސަރަޙައްދުގައި ފައްޓަވާފައިވާއިރު، މިހާތަނަށް މާލޭގެ11 ދާއިރާއަކަށް ރައީސް ވަޑައިގެންފިއެވެ.

ދާދި ފަހުން ރައީސް ވަނީ، ރައީސުލްޖުމްހޫރިއްޔާގެ ހައިސިއްޔަތުން ރާއްޖޭގެ ބައެއް ރަށްރަށަށް ވަޑައިގެން ރައްޔިތުންގެ ހާލުއަހުވާލު ބައްލަވާފައެވެ.