ހަވާ އެރުވުމާއިއެކު ދިވެހީންގެ ރާއްޖެ މަޖްލީހަށް ކުރި ދަތުރުގެ ކާމިޔާބީ ފާހަގަކުރުން މިރޭ!

ނިމިދިޔަ ރައްޔިތުން މަޖިލިސް އިންތިހާބުގައި ޕީއެންސީއަށް ލިބުނު ކާމިޔާބީ ފާހަގަކުރުމަށް މިރޭ އާޓިފިޝަލް ބީޗުގައި ހަވާއަރުވަން ޕީއެންސީއިން ނިންމައިފިއެވެ.

20 ވަނަ ރައްޔިތުން މަޖިލީހުގެ ސުޕާ މެޖޯރިޓީ ސަރުކާރު ހިންގާ ޕާޓީ ޕީއެންސީއަށް ލިބުމުން އެކަމުގެ އުފަލުގައި ހަވާ އެރުވުމާއެކު ހާއްސަ ހަފްލާއެއް ބޭއްވުމަށް އެ ޕާޓީއިން ނިންމާފައިވަނީ މިރޭ 08:30 ގައެވެ. "ދިވެހީންގެ ރާއްޖެ މަޖިލީހަށް - މަރުހަބާ"ގެ ނަމުގައި ބާއްވަން ހަމަޖެހިފައިވާ ހާއްސަ ހަފްލާގައި ވީ އެންމެ ގިނަ ބޭފުޅުން ބައިވެރިވެވަޑައިގަތުމަށް ޕީއެންސީއިން އެދިފައިވެއެވެ.

2 ލައްކައަށްވުރެ ގިނަ މީހުން ޖުމްލަ 93 ދާއިރާއަކަށް ވޯޓުލާފައިވާއިރު ސަރުކާރަށް ރައްޔިތުން ކުރާ އިތުބާރާއި ތަރުހީބު ސިއްރުކުރެވޭކަށް ނެތެވެ. އިދިކޮޅު ފަރާތްތަކުން ސަރުކާރުގެ ބޮލުގައި ދޮގު ހަދައި ދޮލަގަކަށް ބަރުކުރަމުން އައި ނަމަވެސް، އެ އިލްޒާމުތަކަށް ރައްޔިތުން ނުހެއްލޭނެކަން މުޅި ރާއްޖެއަށް ހާމަވެގެން ދިޔައީ އިއްޔެގެ އިންތިހާބުންނެވެ.

ރާއްޖޭގެ "އެންމެ ނުފޫޒު ގަދަ" ޕާޓީ ކަމަށް އެތައް ބަޔަކު އެއް އިރެއްގައި ދެކެމުން އައި ޕާޓީ އެމްޑީޕީ އަތުން މިފަހަރު ވެރިކަމާއި މަޖިލިސްވެސް ވަނީ ބީވެގެން ގޮސްފައެވެ. މިފަހަރުގެ މަޖިލީހަށް އެމްޑީޕީގެ އެތައް މިނިސްޓަރުންނެއް ވާދަކުރެއްވިއިރު އެއްވެސް ބޭފުޅެއް ކާމިޔާބުވެފައެއްނުވެއެވެ.