ޝަރުތު ހަމަވާ ނަމަ، ސްޓޫޑަންޓް ލޯނަށް އެދޭ ހުރިހާ ކުދިންނަށް ލޯނު ދޭން ރައީސް މުޢިއްޒު ނިންމަވައިފި
ސްޓޫޑެންޓް ލޯނަށް އެދި ހުށައަޅާ ދަރިވަރުންގެ ތެރެއިން ޝަރުތުހަމަވާ ހުރިހާ ދަރިވަރުންނަށް ލޯނު ދޫކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފި އެވެ.
މިނިސްޓަރުންނާ ސުވާލުކުރުމަށް ބާއްވާ "އަހާ" ފޯރަމްގައި ސްޓޫޑަންޓު ލޯނާ ގުޅޭ ގޮތުން އާންމުން މީހަކު ކުރި ސުވާލަށް ޖަވާބުދެއްވަމުން ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާ ވިދާޅުވީ ސްޓޫޑަންޓު ލޯނަށް އެދުމަށް ހުޅުވާލި މުއްދަތު އަންނަ މަހުގެ ދެވަނަ ދުވަހުގެ 1:30 ގެ ނިޔަލަށް މިހާރު އިތުރުކޮށްފައިވާ ކަމަށެވެ. ކުރިން އެ ފުރުސަތު އޮތީ މިމަހުގެ 25 ގެ ނިޔަލަށެވެ.
މިނިސްޓަރު ވިދާޅުވި ގޮތުގައި ސަރުކާރުން މިހާރު ނިންމާފައި ވަނީ ލޯނަށް އެދޭ ކުދިންގެ ޝަރުތު ހަމަވާ ނަމަ ހުރިހާ ކުދިންނަށް އެ ލޯނު ދޫކުރަން ކަމަށް ވެސް މިނިސްޓަރު ވިދާޅުވި އެވެ.
ރައީސުލްޖުމްހޫރިއްޔާ ބޭނުންފުޅުވަނީ ލޯނަށްލާ ދަރިވަރުންގެ ތެރެއިން ޝަރުތު ހަމަވާ ހުރިހާ ދަރިވަރުންނަށް ލޯނު ދެއްވުން: މިނިސްޓަރ މާރިޔާ
މިނިސްޓަރު ވިދާޅުވީ ރައީސްގެ މި ނިންމެވުމުގެ ސަބަބުން މަތީ ތައުލީމުގެ ފުރުސަތު ބޭނުންވެފައިވާ އެތައް ދަރިވަރުންނަކަށް ފުރުސަތު ލިބިގެން ދާނެ ކަމަށެވެ. އެ ނިންމެވުމާ މެދު ވަރަށް އުފާ ކުރައްވާ ކަމަށް ވިދާޅުވި އެވެ.