ރައީސް ޑރ. މުޢިއްޒުގެ ދެކަނބަލުން މަދީނާއަށް ވަޑައިގެންފި
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ސަޢޫދީ ޢަރަބިއާއަށް ކުރައްވަމުން ގެންދަވާ ދަތުރުފުޅުގެ ތެރެއިން މަދީނާއަށް ވަޑައިގެންފިއެވެ.
ރައީސް މުޢިއްޒު އާއި އަނބިކަނބަލުން ސާޖިދާ މުޙައްމަދު ސަޢުދީއަށް ދަތުރުފުޅު ކުރައްވަނީ އެ ގައުމުގެ ރަސްގެފާނު ސަލްމާން ބިން އަބްދުލްއަޒީޒްގެ ޚައްޞަ މެހެމާންދާރީގައެވެ.
މި ދަތުރުފުޅުގައި ރައީސްގެ އަރިހުގައި ބައިރިވެޑައިގަންނަވާ އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު އެކްސްގައި އަރަބި ބަހުން ކުރެއްވި ޕޯސްޓެއްގައި ވިދާޅުވީ، މި ދަތުފުޅުގެ ތެރެއިން ރައީސް މަދީނާއަަށް ވަޑައިގަތުމުން މަރުހަބާ ދެންނެވުމުގައި އެންމެ ކުރީ ސަފުގައި ހުންނެވީ މަދީނާ ސަރަހައްދުގެ ގަވަރުނަރު އަމީރް ސަލަމާން ބިން ސުލްތާން ބިން ޢަބްދުލްޢަޒީޒް އަލް ސައުދު ކަމަށެވެ.
ވަޒީރު ޝަހީމްގެ އިތުރުން މި ދަތުރުފުޅުގައި ރައީސްގެ އަރިހުގައި އިސްލާމީ މަރްކަޒުގެ އިސް އިމާމު ފަޟީލަތުއްޝައިޚް މުޙައްމަދު ލަތީފު، ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އަބްދުﷲ ފަޔާޒު، މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ޕްރެޒިޑެންޝަލް އެފެއާޒް އަލީ އާރިފް، މިނިސްޓަރ އެޓް ދަ ޕްރެޒިޑެންޓްސް އޮފީސް އަބްދުﷲ ނާސިރު ބައިވެރިވެވަޑައިގެންނެވިއެވެ.