ރައީސް ޑރ. މުޢިއްޒުގެ ދެކަނބަލުން މަސްޖިދުއް ނަބަވީ އަށް ޒިޔާރަތް ކުރައްވައިފި
މާތްވެގެންވާ ދެ ޙަރަމްފުޅުގެ ޚާދިމް އަދި ސަޢޫދީޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒްގެ މެހެމާންދާރީގައި، ޢުމްރާގެ އަޅުކަން އަދާކުރެއްވުމަށް ކުރައްވާ ދަތުރުފުޅުގައި، ކީރިތި ރަސޫލާގެ صلى الله عليه وسلم ގެ މިސްކިތް، އަލްމަސްޖިދުއް ނަބަވީއަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ޒިޔާރަތްކުރައްވައިފިއެވެ.
މުސްލިމުންގެ އެންމެ މުޤައްދަސް 3 މިސްކިތުގެ ތެރޭގައި ހިމެނޭ، އަދި މާތް ނަބިއްޔާ صلى الله عليه وسلم ފަސްދާނުވެޑުވިފައިވާ ސަރަޙައްދާ، މާތްވެގެންވާ ރައުޟާ ހިމެނޭ މަސްޖިދުއްނަބަވީއަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މިކުރެއްވި ޒިޔާރަތުގައި، މަސްޖިދުއްނަބަވީގެ ރައުޟާގައި ނަމާދުކުރައްވަވާ އަދި މާތް ނަބިއްޔާ صلي الله عليه وسلم އަށާ، އަބޫބަކުރުގެފާނަށާއި ޢުމަރުގެފާނަށް ސަލާމް ދެންނެވުމުގެ ޝަރަފް ލިބިވަޑައިގަތެވެ.
މަސްޖިދުއް ނަބަވީއަށް ރައީސުލްޖުމްހޫރިއްޔާ ޒިޔާރަތްކުރެއްވުމުން އެމަނިކުފާނަށް އިސްތިޤްބާލުކުރެއްވެވީ، މަސްޖިދުއްނަބަވީ ބެލެހެއްޓެވުމާ ބެހޭ އެންމެ އިސް ވެރިޔާ، ޑރ. ސުލްޠާން އަލް މަޠީރީއާ، އެ މިސްކިތުގެ ސަލާމަތީ ކަންކަމާބެހޭ އިސްވެރިޔާ ކާނަލް ހަޒާޢު އަލްމަޠީރީއާ، މަދީނާ ސަރަޙައްދުގެ ރަސްމީ އަދި ޝާހީ ކަންކަން ބެލެހެއްޓެވުމުގެ އިސްވެރިޔާ އިބްރާހީމް ބިން ޢަބްދުﷲ ބިއްރީއެވެ.
މަސްޖިދުލް ނަބަވީ އަކީ ރަސޫލުﷲ صلى الله عليه وسلم އެކަލޭގެފާނުގެ މާތް އަތްޕުޅުން އެޅުއްވި އަދި މި ދުނިޔެމަތީގައި އެކަލޭގެފާނު صلى الله عليه وسلم އަށް ނިސްބަތްވާ ހަމައެކަނި ބިނާއެވެ.
ރައީސުލްޖުމްހޫރިއްޔާގެ ދެކަނބަލުން ޕްރިންސް މުޙައްމަދު ބިން ޢަބްދުލްޢަޒީޒް އިންޓަރނޭޝަނަލް އެއަރޕޯޓަށް ވަޑައިގަތުމުން ދެކަނބަލުންނަށް މަރުޙަބާ ދެންނެވީ، މަދީނާ ސަރަޙައްދުގެ ގަވަރުނަރު، ޞާޙިބުއްސުމުއްވުލް މަލަކީ އަލްއަމީރް ސަލްމާން ބިން ސުލްޠާން ބިން ޢަބްދުލްޢަޒީޒް އާލް ސުޢޫދެވެ.