ފަލަސްތީނަށް ޔޫއެންގެ މެމްބަރުކަން ލިބުމަކީ ތާރީޚީ ބޮޑު ކާމިޔާބީއެއް ކަމަށް ރައީސް މުޢިއްޒު ވިދާޅުވެއްޖެ
އދ. ގެ ފުރިހަމަ މެންބަރުކަން ފަލަސްޠީނަށް ދިނުމަށް އާންމު މަޖިލީހުން ނިންމުމަކީ އެ ޤައުމަށް އިންސާފު ހޯދައި ދިނުމަށް ކުރަމުން އަންނަ މަސައްކަތުގައި ލިބިގެންދިޔަ ތާރީޚީ ކާމިޔާބީއެއްކަމަށް ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޔޫއެން އިން އިއްޔެ ބޭއްވި ކުއްލި ބައްދަލުވުމުގައި ފަލަސްޠީނަށް ފުރިހަމަ މެންބަރުކަން ދިނުމަށް ފާސްކުރުމާ ގުޅިގެން މީސްމީޑިއާގައި ކުރެއްވި ޕޯސްޓެއްގައެވެ.
ރައީސް މުޢިއްޒުގެ ޕޯސްޓްގައި ވިދާޅުވީ، މިއީ ފަލަސްޠީނާއި އެ ޤައުމުގެ ރައްޔިތުންނަށް އިންސާފު ހޯދައިދިނުމަށް ކުރަމުން އަންނަ މަސައްކަތުގައި ލިބުނު ތާރީޚީ އަދި ބޮޑު ކާމިޔާބީއެއް ކަމަށެވެ. ރައީސް ވަނީ މި މުހިންމު ގަރާރު ފާސްކުރުމަށް ވޯޓު ދީފައިވާ ޤައުމުތަކަށް މަރުހަބާ ވިދާޅުވެފައެވެ.
ރައީސް ވަނީ ދިވެހީން، ފަލަސްޠީނުގެ ރައްޔިތުންގެ ފަރާތުން ފެނިގެންދާ ކެތްތެރިކަމާއި ހިތްވަރުން ނަމޫނާ ނަގާ ކަމުގައި ވިދާޅުވެފައެވެ.