މަދީނާގައި ކިޔަވާ ދިވެހި ދަރިވަރުންނާއި ރައީސް ޑރ. މުޢިއްޒު ބައްދަލުކުރައްވައިފި
ދިވެހި ރާއްޖޭގެ ޢިއްޒަތްތެރި ރައީސުލްޖުމުހޫރިއްޔާ ޑރ މުޙައްމަދު މުޢިއްޒު، މަދީނާގައި ތައުލީމު ޙާޞިލްކުރަމުންދާ ދިވެހި ދަރިވަރުންނާ ބައްދަލުކުރައްވައިފިއެވެ.
މަދީނާގައި ކިޔަވާ 24 ދަރިވަރުން ބައިވެރިވި މި ބައްދަލުވުން ކުރިއަށް ގެންގޮސްފައިވަނީ މިއަދު މަދީނާގައެވެ.
މިއަދުގެ ބައްދަލުވުމުގައި މަދީނާގައި ތިބި ދިވެހި ދަރިވަރުން ވަނީ އެކުދިންގެ ހުރި ބައެއް ކަންބޮޑުވުންތައް ރައީސުލްޖުމްހޫރިއްޔާ އާއި ހިއްސާ ކުރައްވާފައެވެ.
މި ބައްދަލުވުމުގައި ބައިވެރިވި ދިވެހި ދަރިވަރުންނަށް ރައީސުލްޖުމްހޫރިއްޔާ ޑރ. މުޢިއްޒު ދެއްވި ޔަޤީންކަމަކީ މަދީނާގައި ކިޔަވާ ދިވެހި ދަރިވަރުންގެ ކަންކަމުގައި ފުރިހަމަ އެހީތެރިކަމާއި، އަހަންމިއްޔަތުކަން ދެއްވާނެ ކަމަށެވެ.
މާތްވެގެންވާ ދެ ޙަރަމްފުޅުގެ ޚާދިމް އަދި ސަޢޫދީޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒްގެ މެހެމާންދާރީގައި، ޢުމްރާގެ އަޅުކަން އަދާކުރެއްވުމަށް ރައީސް މުޢިއްޒުގެ ދެކަނބަލުން ކުރައްވާ ދަތުރުފުޅުގައި، ކީރިތި ރަސޫލާގެ صلى الله عليه وسلم ގެ މިސްކިތް، އަލްމަސްޖިދުއް ނަބަވީއަށް މިއަދު ވަނީ ޒިޔާރަތްކުރައްވާފައެވެ.
މަސްޖިދުއް ނަބަވީއަށް ރައީސުލްޖުމްހޫރިއްޔާ ޒިޔާރަތްކުރެއްވުމުން އެމަނިކުފާނަށް އިސްތިޤްބާލުކުރެއްވެވީ، މަސްޖިދުއްނަބަވީ ބެލެހެއްޓެވުމާ ބެހޭ އެންމެ އިސް ވެރިޔާ، ޑރ. ސުލްޠާން އަލް މަޠީރީއާ، އެ މިސްކިތުގެ ސަލާމަތީ ކަންކަމާބެހޭ އިސްވެރިޔާ ކާނަލް ހަޒާޢު އަލްމަޠީރީއާ، މަދީނާ ސަރަޙައްދުގެ ރަސްމީ އަދި ޝާހީ ކަންކަން ބެލެހެއްޓެވުމުގެ އިސްވެރިޔާ އިބްރާހީމް ބިން ޢަބްދުﷲ ބިއްރީއެވެ.