ރައީސް މުޢިއްޒުގެ ވަޢުދުފުޅާއި އެއްގޮތަށް ސަރުކާރު ހުރިހާ ސްކޫލެއްގައި އެއާ ކޮންޑިޝަން ހަރުކުރުމުގެ މަޝްރޫޢު މިމަހު ފަށަނީ!
ރައީސް މުއިއްޒުގެ ވަޢުދުފުޅާއި އެއްގޮތަށް ދިރާސީ އައު އަހަރުގައި ސަރުކާރު ހުރިހާ ސުކޫލެއްގައި އެއާ ކޮންޑިޝަން ހަރުކުރުމުގެ މަޝްރޫޢަކާއި ޓީޗަރުން ތަމްރީނުކުރުމުގެ ޕްރޮގުރާމެއް މި ހިނގާ މެއި މަހުގެ ފަހުކޮޅުގައި ފެށުމަށް ނިންމައިފިއެވެ.
ސްކޫލުތަކުގެ ކްލާސްރޫމްތައް އޭސީކުރަން މަގުފަހިވާގޮތަށް އަންނަ އަހަރުން ފެށިގެން ސޯލާ ޕަވަރ ބޭނުންކުރެވޭ ރިނިޔުބަލް އެނާޖީ ޕްރޮޖެކްޓްސްތަކެއް ސްކޫލުތަކުގައި ފެށުމަށް ގަސްދުކުރައްވާކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވީ މާޗް މަހުގެ 6 ވަނަ ދުވަހުގެ ރޭ ދ. މީދޫގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ އެރޭ ވިދާޅުވީ ސްކޫލުތަކުގެ ކްލާސްރޫމުތައް އޭސީ ކުރުމަކީ ކިޔަވާކުދިންނާ ޓީޗަރުންނާ އަދި ސްކޫލުތަކުންވެސް ވަރަށް ބޮޑަށް އެދެމުން އަންނަ ކަމެއްކަމަށެވެ.
ސްކޫލްތަކުން ކިޔަވާ ކުދިންނާއި ޓީޗަރުންވެސް އެންމެ ބޮޑަށް އެދޭ އެއްކަންތައް ކްލާސްރޫމްތައް ވަރަށް ހޫނުކޮށް ހުންނަ ވާހަކަ. އޭސީ ކޮށްދޭން އެދޭ ވާހަކަ. ކޮންމެމަހަކު ކަރަންޓް ބިލް ދައްކަން ބަލާއިރު މިއީ ކުރުމަކީ ދެކޮޅުޖެހޭނެ ކަމަކަށްނުވޭ.އެހެންވީމަ އަޅުގަނޑުމެން ގަސްދުކޮށްފަ މިއޮތީ މިއަންނަ އަހަރުން ފެށިގެން ސޯލާ ޕަވަރ ބޭނުންކުރެވޭ ރިނިޔުބަލް އެނާޖީ ޕްރޮޖެކްޓްސް ތަކެއް ހުރިހާ ސްކޫލެއްގަ ހިންގަން. ހިންގައިގެން އެއާއި ގުޅުވާލައިގެން އޭސީ ކުރަން ބޭނުންވާ ސްކޫލްތަކަށް އެ ފުރުޞަތުދޭން: ރައީސް މުޢިއްޒު
މި މަޝްރޫޢުގެ ތަފްސީލް ހާމަލުރައްވަމުން ރައީސް އޭރު ވިދާޅުވީ މިކަމަށް ކުރާ ފުރަތަމަ އިންވެސްޓްމެންޓް ، އިންވެސްޓްމެންޓް އަކަށް ވާނެ ކަމަށާއި، ދެން އޭގެން ލިބޭ ހަކަތައިން ދެމެހެއްޓެނިވި ގޮތެއްގައި ކްލާސްރޫމްތައް އޭސީ ކުރެވިގެންދާނެ ކަމާއި ވީ އެންމެ އަވަހަކަށް އެ މަޝްރޫޢު ފެށިގެންދާނެ ކަމުގެ ޔަޤީންކަން ރައީސް ދެއްވިއެވެ.
ދިރާސީ އައު އަހަރާ ގުޅިގެން އެޑިއުކޭޝަން މިނިސްޓަރު ޑރ.ޝަފީޢު ފޭސްބުކުގައި ޝާއިއުކުރެއްވި ޕޯސްޓެއްގައި ވިދާޅުވެފައިވަނީ، މިފެށޭ ދިރާސީ އަހަރު ތައުލީމީ ނިޒަމަށް ހެޔޮ ބަދަލުތަކެއް އަންނާނެ ކަމަށެވެ. އެގޮތުން މުދައްރިސުންނަކީ ޤަދަރުވެރި ބައެއްކަމުގައި ހެދުމުގެ އަމަލީ މަސައްކަތް ފެށުމުގެ ގޮތުން މުދައްރިސުން ތަމްރީނުކުރުމުގެ ޚާއްޞަ ޕްރޮގުރާމެއް ފެށިގެންދާނެ ކަމުގައިވެސް މިނިސްޓަރު ވިދާޅުވިއެވެ. އަދި ސްކޫލުތަކުގައި މަސައްކަތުގައި މުދައްރިސުން ހޭދަކުރާ ވަގުތު މަދުކުރުމަށްޓަކައި ޚާއްޞަ ފިޔަވަޅުތަކެއް ދިރާސީ އައު އަހަރުގައި އެޅިގެންދާނެ ކަމުގައިވެސް މިނިސްޓަރު ވިދާޅުވިއެވެ.
ޓީޗަރުން ތަމްރީނުކުރުމުގެ އިތުރަށް ދިރާސީ އައު އަހަރުގައި ސަރުކާރުގެ ހުރިހާ ސްކޫލެއްގައި އެއާ ކޮންޑިޝަން ހަރުކުރުމުގެ މަޝްރޫޢެއް ފެށިގެންދާނެ ކަމަށާއި، އެ ޕްރޮޖެކްޓުގެ ތެރެއިން 2 އަހަރު ތެރޭގައި ހުރިހާ ސުކޫލެއް އޭސީކުރެވި ނިމިގެންދާނެ ކަމުގައިވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވި ގޮތުގައި މި މަޝްރޫޢަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ލަފާފުޅާއެކު ފަށާ މަޝްރޫޢެކެވެ. އަދި އެ މަޝްރޫޢު ހިނގަމުންދާ މެއި މަހުގެ ފަހުކޮޅުގައި ފެށޭނެ ކަމުގައިވެސް ޑރ.ޝަފީޢު ވިދާޅުވިއެވެ.
ފާއިތުވެގެން ދިޔަ ފަސް އަހަރުގައި ސަރުކާރުގެ ސްކޫލުތައް އޭސީކުރުމަށް އެކަށީގެންވާ މަސައްކަތްތަކެއް ކުރެވިފައިނުވެއެވެ. އަދި ސްކޫލުތައް މަރާމާތުކުރުމުގައި ފަރުވާކުޑަކުރުމުގެ ސަބަބުން ބައެއް ސްކޫލުތަކުގއި ހުންނަ ކުލާސްތަކުގައި ފަންކާތައްވެސް ރަނގަޅަށް މަސައްކަތްނުކުރެއެވެ.