ކުދި ޖަޒީރާ ޤައުމުތައް ތަރައްޤީކުރެވޭނީ އަމިއްލަ ވިޔަފާރިތައް ބާރުވެރިކުރުވައި، ތަރައްޤީގެ ހުންގާނު ދީގެން: ރައީސް މުޢިއްޒު
ދެމެހެއްޓެނިވި ގޮތެއްގައި ކުދި ޖަޒީރާ ޤައުމުތައް ތަރައްޤީކުރެވޭނީ އަމިއްލަ ވިޔަފާރިތައް ބާރުވެރިކުރުވައި، ތަރައްޤީގެ ހުންގާނު ދީގެން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ސިޑްސް ކޮންފަރެންސްގެ ހަވާސާގެ ތެރެއިން ބޭއްވި ސިޑްސް ގްލޯބަލް ބިޒްނަސް ނެޓްވޯކް ފޯރަމް ނިންމުމަށް ބޭއްވި މަތީފަންތީގެ ބައްދަލުވުމުގައި ވާހަކަފުޅު ދައްކަވަމުންނެވެ.
އެންޓިގާ ބާބުޑާގައި ބާއްވާ 4 ވަނަ އިންޓަރނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް)ގެ ހަވާސާގެ ތެރެއިން ބޭއްވި ސިޑްސް ގްލޯބަލް ބިޒްނަސް ނެޓްވޯކް ފޯރަމް ނިންމުމަށް ބޭއްވި މަތީ ފަންތީގެ ބައްދަލުވުމުގައި ވާހަކަފުޅު ދައްކަވަމުން ރައީސް ޑރ. މުޢިއްޒު ވަނީ ތަރައްޤީވަމުން އަންނަ ކުދި ޖަޒީރާ ޤައުމުތަކަށް ދިމާވެފައިވާ އެކި މައްސަލަތައް ހައްލުކުރުމުގައި ސިޑްސްގެ ޤައުމުތަކުގެ ސަރުކާރުތަކާއި ޕްރައިވެޓް ސެކްޓަރާއި ގުޅިގެން ކުރެވޭނެ މަސައްކަތްތަކުގެ މައްޗަށް އަލިއަޅުއްވާލައްވާފައެވެ. އަދި ޕްރައިވެޓް ސެކްޓަރުގައި ހަރަކާތްތެރިވާ އެކި ވިޔަފާރިތަކަށް، ފަހި މާހައުލެއް ޤާއިމްކޮށްދިނުމަށް ސިޑްސްގެ ޤައުމުތަކުގެ ސަރުކާރުތަކަށް ރައީސްގެ ވާހަކަފުޅުގައި ގޮވާލެއްވިއެވެ.
އޭގެ ތެރޭގައި އިޤްތިޞާދުގެ އިންޖީނު ނުހުއްޓި ހިންގުމާއި ތަރައްޤީގެ މުހިންމު ސިޔާސަތުތައް ތަންފީޒު ކުރުން ރައީސް ވަނީ ފާހަގަކުރައްވައިފަ އެވެ. އަދި އަމިއްލަ ވިޔަފާރިތައް ބާރުވެރިކުރުވައި ކުރިއެރުވުމަށް ތިން ކަމަކަށް ރައީސް މުޢިއްޒު ވަނީ ގޮވާލައްވާފައެވެ.
އެންމެ ފުރަތަމަ ކަމެއްގެ ގޮތުގައި ރައީސް ފާހަގަކުރެއްވީ އެންމެ ކުދި، ކުދި އަދި މެދުފަންތީގެ ވިޔަފާރިތަކާއި ޒުވާން ވިޔަފާރިވެރިންނަށް އިންވެސްޓްމަންޓް ލިބޭނެ މަގުފަހިކޮށްދިނުމެވެ.
މިއަދުގެ ހަލުވިކަމާއެކު ބަދަލުވަމުން އަންނަ ދުނިޔޭގެ މާހައުލުގައި ސިޑްސްގެ އަމިއްލަ ވިޔަފާރިތަކަށް ކުރިއަށްވުރެ ބޮޑަށް އެހީތެރިކަން ބޭނުންވޭ : ރައީސް ޑރ. މުޢިއްޒު
ރައީސް ވިދާޅުވީ ވިޔަފާރިތައް ހިންގުމަށް ފަސޭހަވާނޭ ގޮތްތައް މަގުފަހިކޮށް، ފައިނޭންސް ކުރާނެ އައު ދާއިރާތައް ހުޅުވާލަންޖެހޭކަމަށާއި ޤައުމުތަކުގެ މެދުގައި ކުރާ ވިޔަފާރިތަކަށްވެސް ފަސޭހަ އިންތިޒާމްތަކެއް ހަމަޖައްސަންޖެހޭކަމަށެވެ.
މީގެއިތުރުން ކުދި އަދި މެދު ފަންތީގެ ވިޔަފާރީތަކަށް މާކެޓް ހޯދައިދިނުމަކީ ވިޔަފާރިތައް ކުރިއެރުވުމަށް އެހީތެރިވެދޭނެކަމެއްކަމަށާއި، އައު އިންވެސްޓްމަންޓްތަކާއި އީޖާދީ މަސައްކަތްތައް އިތުރުކޮށް، ދެމެހެއްޓެނިވި ތަރައްޤީއަކަށް މަސައްކަތްކުރަން ބާރު އަޅައި މާހައުލެއް ޤާއިމްކުރަން ހުރިހާ ފަރާތްތަކުންވެސް މަސައްކަތްކުރަންޖެހޭކަމަށްވެސް ރައީސް މުޢިއްޒު ވަނީ ވިދާޅުވެފައެވެ.
މިއާއިއެކު، ވިޔަފާރީއާ ގުޅޭ ޤާނޫނާއި ޤަވާއިދުތަކަކީ ވިޔަފާރިތަކުން ތަކުލީފުތައް އުފުލުމުގެ ބަދަލުގައި، ފަސޭހައިން ކަންކަން ކުރެވެން އޮންނަ ހަރުދަނާ އުސޫލުތަކަކާއި ޤަވާއިދުތަކަކަށް ހަދަންޖެހޭކަމަށްވެސް ރައީސް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅު ނިންމަވައިލެއްވީ، އެންޓީގާ އެންޑް ބާބިޔުޑާގެ އެޖެންޑާ ހާޞިލްކުރެވޭނީ، ސިޑްސްގެ ޤައުމުތަކުގެ ސަރުކާރުތަކުން އަމިއްލަ ވިޔާފާރިވެރިންނާއި ގުޅިގެން މަސައްކަތް ކޮށް، އެންމެން ޝާމިލުވާގޮތަށް އުޖާލާ މުސްތަޤުބަލެއް ހޯދައިދިނުމަށް މިކުރާ ވިލުންތެރި މަސައްކަތުގައިވެސް އަމިއްލަ ވިޔަފާރަވެރިން ކުރިއަށް ނެރެގެންކަން ފާހަކުރައްވަމުންނެވެ.