ރައީސް މުޢިއްޒުގެ ވަޢުދުފުޅާއި އެއްގޮތަށް އަތޮޅުތެރޭގެ އެންމެފުރަތަމަ ޑޮލަރު އޭޓީއެމްގެ ޚިދުމަތް މާފުށިގައި ފައްޓައިފި
ރިޔާސީ އިންތިޚާބުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންނެވި ވަޢުދުފުޅާއި އެއްގޮތަށް ބޭންކް އޮފް މޯލްޑިވްސް (ބީއެމްއެލް) އިން ކ. މާފުށީގައި ޔޫއެސް ޑޮލަރު އޭޓީއެމްގެ ޚިދުމަތް ފަށައިފިއެވެ.
ރާއްޖޭގެ ލޯކަލް ޓޫރިޒަމް އެންމެ ބޮޑަށް ކުރިއަރާފައިވާ ކ. މާފުށީގައި ޑޮލަރު އޭޓީއެމްއެއް ބެހެއްޓުމުމަކީ ރައީސް ޑރ. މުޢިއްޒު ކެމްޕޭންތެރޭގައި ވެލެއްވި ވަޢުދެކެވެ. އެގޮތުން މިދިޔަ އޮގަސްޓް މަހުގެ 19 ވަނަ ދުވަހު ކ. ގުރައިދޫ އަށް ވަޑައިގެން ބޭއްވި ކެމްޕެއިން ޖަލްސާގައި ރައީސް ޑރ. މުޢިއްޒު ވަނީ ވެރިކަން ލިބިވަޑައިގެންފިނަމަ އަތޮޅު ތެރޭގެ ރަށްތަކުގެ ތެރެއިން އެންމެ ފުރަތަމަ ޑޮލަރު އޭޓީއެމް ބަހައްޓާނެ އެއް ރަށަކީ މާފުށި ކަމަށް ވިދާޅުވެފައެވެ.
ކ. މާފުށިގައި ޑޮލަރު އޭޓީއެމް ބެހެއްޓުމުގެ މަސައްކަތަށް ބޭންކް އޮފް މޯލްޑިވްސްއާއި އެކު މަޝްވަރާކޮށް އަމާޒަކީ މިއަހަރު ޑޮލަރު އޭޓީއެމް ރަށުގައި ބެހެއްޓުންކަމަށް ރައީސް ޑރ. މުޢިއްޒު ވަނީ އެކިފަހަރުމަތިން ވިދާޅުވެފައެވެ.
މާފުށި ބްރާންޗުގައި އަލަށް ބެހެއްޓުނު މި އޭޓީއެމް މެދުވެރިކޮށް ފަރުދުންނާއި ވިޔަފާރިތަކަށް ފަސޭހަކަމާއެކު ޔޫއެސް ޑޮލަރު ނެގުމާއި ޖަމާކުރުމުގެ ހިދުމަތް ލިބޭނެއެވެ.
މިއީ މާލެ ސިޓީން ބޭރުގައި ބެހެއްޓުނު ފުރަތަމަ ޑޮލަރު އޭޓީއެމްއެވެ. މި އޭޓީއެމް އަކީ މާލެ، ހުޅުމާލެ އަދި ވެލާނާ އިންޓަރނޭޝަނަލް އެއާޕޯޓުގައި ބެހެއްޓިފައި ހުރި އޭޓީއެމް ނެޓްވޯކް އަށް އިތުރުވެގެންދާ އެޓީއެމްއެކެވެ.
މިކަމާ ގުޅޭ ގޮތުން ބީއެމްއެލްގެ ޑައިރެކްޓަރ އޮފް ރީޓެއިލް، ބިޒްނަސް އެންޑް އެސްއެމްއީ ބޭންކިންގ މޫސާ ނިމާލް ވިދާޅުވީ މާފުށީގައި ޔޫއެސް ޑޮލަރު ނެގުމާއި ޖަމާކުރުމުގެ ޚިދުމަތަށް އޮތް ޑިމާންޑް އިތުރުވަމުން އަންނަ ކަމަށާއި، އެހެންކަމުން މިކަމަށް އެހީތެރިވުމުގެ ގޮތުން މި ރަށުގައި ޑޮލަރު އޭޓީއެމްގެ ޚިދުމަތް ފެށޭކަމީ ލިބޭ އުފަލެއް ކަމަށެވެ.