ބޮޑު އިންޓަރެސްޓް ރޭޓްގައި ލޯނު ނުނަގައި، ބޭރުގެ ދަރަނީގެ 2.7 ބިލިއަން ރުފިޔާ ދެއްކިއްޖެ: ރައީސް މުޢިއްޒު

ބޮޑެތި އިންޓަރެސްޓް ރޭޓްގައި ލޯނު ނުނަގައި، ބޭރުގެ އެކިއެކި ފަރާތްތަކަށް ދައްކަންޖެހޭ ދަރަނީގެ 2.7 ބިލިއަން ރުފިޔާ، މިވީ 7 މަސް ދުވަހުގެ ތެރޭގައި ދައްކާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ޖަގަހަ ހުޅުވުމަށް ރޭ ބޭއްވި ރަސްމިއްޔާތުގައި ވާހަކަދައްކަވަމުން ރައީސް ޑރ.މުޢިއްޒު ވަނީ އެމަނިކުފާނުގެ ވެރިކަމުގެ 7 މަސްދުވަހުގެ ތެރޭގައި އިޤްތިޞާދީ ގޮތުން ލިބިވަޑައިގެންނެވި ބޮޑެތި ކުރިއެރުންތައް ފާހަގަކުރައްވާ ވާހަކަފުޅު ދައްކަވާފައެވެ.

އެގޮތުން، އެމަނިކުފާނު ވިދާޅުވީ، ވެރިކަމާއި ހަވާލުވެވަޑައިގެންނެވިއިރު ދިވެހި އެކި ކުންފުނިތަކަށް ދައްކަންޖެހޭ 9 ބިލިއަން ރުފިޔާ ނުދައްކައި އޮތް ކަމަށާ، އެހެން ނަމަވެސް، ވެރިކަމުގެ މިވީ 7 ވަރަކަށް މަސް ދުވަހުގެ ތެރޭގައި އޭގެތެރެއިން 4 ބިލިއަން ރުފިޔާގެ ދަރަނި ޚަލާސް ކޮށްފައިވާ ކަމަށެވެ.

9 ބިލިއަން ރުފިޔާގެ ތެރެއިން، ފައިސާ ޗާޕްކުރުން ހުއްޓާލައި، ބޮޑު އިންޓަރެސްޓް ރޭޓްގައި ލޯނު ނުނަގައި، 4 ބިލިއަން ރުފިޔާ އެކިއެކި ކުންފުނިތަކަށް ދައްކައިފިން. އަދި ހަމަ އެއާއެކު ސަރުކާރުގެ އެކިއެކި ކުންފުނި ތަކަށް 7ބިލިއަން، ޖުމްލަ 11 ބިލިއަން ރުފިޔާ ދައްކައިފިން.   ފައިސާ ޗާޕު ނުކޮށް، އާމްދަނީގެ ގޮތުގައި ލިބުނު، ބޭރުގެ ދަރަނީގެވެސް 2.7 ބިލިއަން ރުފިޔާ، އެންމެ ލޯނެއްވެސް ޑީފޯލްޓް ނުވެ، ދައްކަމުން މިއައީ. އެހެންވީމާ ގާތްގަނޑަކަށް  13 ބިލިއަން ރުފިޔާ މި 7 ތެރޭގައި މިއޮތީ ދައްކާފައި: ރައީސް މުޢިއްޒު

ރައީސް މުޢިއްޒު އިތުރަށް ވިދާޅުވި ގޮތުގައި ވެރިކަމާ ހަވާލުވެވަޑައިގަތްއިރު ސޮވެރިން ޑިވެލޮޕްމަންޓް ފަންޑުގައި ހުރީ އެންމެ ދެ މިލިއަން ޑޮލަރު ކަމަށާ އެހެން ނަމަވެސް، ފާއިތުވި ހަތް މަސް ދުވަހުގެ ތެރޭގައި 54 މިލިއަން ޑޮލަރު އެ ފަންޑަށް ވަނީ ޖަމާކޮށްފައި ކަމަށް ވިދާޅުވިއެވެ. އަދި ސަރުކާރުގެ އަމާޒަކީ މި އަހަރު ނިމޭއިރު އެ ފަންޑަށް 100 މިލިއަން ޑޮލަރު ޖަމާކުރުން ކަމަށްވެސް އެމަނިކުފާނު ވިދާޅުވިއެވެ.