ފުޓްބޯޅަ ތަރި އާރިފް ނިޔާވުމަކީ ދިވެހި ހުރިހާ ރައްޔިތުންނަށް ލިބުނު ފުން ހިތާމައެއް: ރައީސް

ދިވެހިރާޢްޖޭގެ ފުޓްބޯޅަ ތަރި މުޙައްމަދު ޢާރިފް (ބަކާ) ނިޔާވުމަކީ ދިވެހި ހުރިހާ ރައްޔިތުންނަށް ލިބުނު ފުން ހިތާމައެއް ކަމަށް ވިދާޅުވެ އާރިފްގެ އާއިލާއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.

ރައީސްގެ ތަޢުޒިޔާ މެސެޖްގައި ވިދާޅުވީ ދިވެހިރާއްޖޭގައި ކުޅިވަރު ކުރިއެރުވުމަށް ވަކީން ޚާއްޞަކޮށް ފުޓްބޯޅައަށް ގިނަގުނަ ޚިދުމަތްތަކެއް ކޮށްދެއްވައި، ޤައުމަށް ފަޚްރުވެރި ނަން ހޯއްދަވައިދެއްވާފައިވާ ހުނަރުވެރި ކުޅުންތެރިޔާ މުޙައްމަދު ޢާރިފް (ބަކާ) ނިޔާވުމަކީ ދިވެހި ހުރިހާ ރައްޔިތުންނަށް ލިބުނު ފުން ހިތާމައެއް ކަމަށެވެ. އަދި މި ހިތާމަވެރި ވަގުތު މަރްޙޫމް މުޙައްމަދު ޢާރިފްގެ ޢާއިލާއަށް ކެތްތެރިކަން ދެއްވުން އެދި ދުޢާކުރެއްވިއެވެ. އަދި މަރްޙޫމް މުޙައްމަދު ޢާރިފަށް ސުވަރުގޭގެ ދާއިމީ ނިޢުމަތް ދެއްވައި، ކީރިތިﷲގެ ނިޢުމަތާ ރަޙްމަތުގައި ލެހެއްޓެވުން އެދި ރައީސް ވަނީ ދުޢާކުރައްވާފަވެ.

އާރިފް ނިޔާވެފައި ވަނީ ކުއްލިއަކަށް ހުން ގަދަވެގެން އޭޑީކޭ ހޮސްޕިޓަލަށް ގެންގޮސް އައިސީޔޫގައި ފަރުވާދެމުން ގެންދަނިކޮށެވެ.

ޙައްޖުގެ އަޅުކަމަށްފަހު އާރިފް އެނބުރި ރާއްޖެއަށް އައިސްފައިވަނީ މީގެ 3 ދުވަސްކުރިންނެވެ. އަދި ބަލި ޙާލަތު ގޯސްވެގެން ހޮސްޕިޓަލުގައި އެޑްމިޓްކުރީ އިއްޔެއެވެ.

ޢުމުރުން 38 އަހަރުގެ ބަކާ އަކީ، ރާއްޖޭގައި އުފެދުނު އެންމެ ފާހަގަ ކޮށްލެވޭ މިޑްފީލްޑަރެވެ. 2004 ވަނަ އަހަރު އައިލަންޑް ފުޓްބޯލް ކްލަބުން ކެރިއަރު ފެށި ބަކާ ވަނީ ޤައުމީ ޓީމުން 2018 ވަނަ އަހަރު ސާފް ޗެމްޕިއަންޝިޕް ކާމިޔާބުކުރި ޓީމުގައިވެސް މުހިންމު ރޯލެއް އަދާކޮށްފައެވެ. އަދި ބަކާ ވަނީ ރާއްޖޭގެ ފުރަތަމަ ޑިވިޜަނުގެ ގިނަ ކްލަބުތަކެއްގެ އިތުރުން މިޔަންމާގެ ކޭބީޒެޑް އަށް ވެސް ކުޅެފައެވެ.