ޚަރަދު ކުޑަކުރުމަށް ރިޔާސީ އިންތިޚާބާއި، މަޖްލިސް އިންތިޚާބު އެއްކޮށް ބާއްވަންޖެހޭ ކަމަށް ރައީސް މުޢިއްޒު ވިދާޅުވެއްޖެ!
ޚަރަދު ކުޑަކުރުމުގެ ގޮތުން ރިޔާސީ އިންތިޚާބާއި މަޖިލިސް އިންތިޚާބު އެއްކޮށް ބާއްވަން ޖެހޭ ކަމަށާއި އެކަމަށް މަގުފަހި ކުރުމަށް ޤާނޫނު އަސާސީއަށް އިސްލާހު ހުށަހަޅުއްވާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައީސް ،މިފަދައިން ވިދާޅުވީ މިރޭ ކުރިއަށްދިޔަ ޕީއެންސީ ހަރުގެ ޖަލްސާގައި ވާހަކަފުޅު ދައްކަވަމުންނެވެ.
ރައީސް މުޢިއްޒު ވިދާޅުވީ ރައްޔިތުންނަށް އެންމެ ފައިދާވާ ގޮތައް ޚަރަދުތައް ދެކޮޅު ޖެހޭ ގޮތަށް އިންތިޚާބުތައް ބާއްވަން ޖެހޭ ކަމަށެވެ. އެގޮތުން ރައްޔިތުންގެ މަޖިލިސް އިންތިޚާބަށް 125 މިލިއަން ރުފިޔާ ހަރަދުވި ކަމަށާއި ރިޔާސީ އިންތިޚާބަށް 180 މިލިއަން ރުފިޔާ ހަރަދުވި ކަމަށެވެ.
ރިޔާސީ އިންތިޚާބާއި މަޖިލިސް އިންތިޚާބު އެއްކޮށް ބާއްވަން އެބަޖެހޭ. އޭރުން 120 މިލިއަން ރުފިޔާ ސަލާމަތް ކުރެވޭނެ. އެފައިސާ އިން ކުޑަ ރަށެއްގެ ރައްޔިތުން ދާއިމަށް ބޮޑު ރަށަކަށް ބަދަލުކުރުން ކަމަށް ވީނަމަވެސް އެކަން ކުރެވޭނެ. މިދެއިންތިޚާބު އެއްކޮށް ބާއްވާނަމަ ރައްޔިތުންނަށް ވެސް ވަރަށް ބޮޑަށް ފަސޭހަ ވާނެ : ރައީސް މުޢިއްޒު
ރައީސް ވިދާޅުވީ އިންތިޚާބުތައް އެއްކޮށް ބޭއްވުމަށް ރައްޔިތުންގެ ފެންނަ ނުފެންނަ ވޯޓެއް ނަގަން ޖެހޭ ކަމަށާއި އެކަން ކުރަން ޖެހޭ ކަމަށާއި، ޤާނޫނު އަސާސީއަށް އިސްލާޙު ގެންނަން މިއަހަރު ނުވަތަ އެންމެ ލަސްވެގެން އަންނަ އަހަރު ހުށަހަޅުއްވާނެ ކަމަށެވެ.
މީގެއިތުރުން އިޤުތިޞާދު އަނދަވަޅުގެ ވާހަކަ ނޮވެމްބަރ 17 ގައި ދެންނެވިން ކަމަށާއި އެމަނިކުފާނު ކުރަން ނިންމި ގޮތަށް ކުރަން ރޭވި ގޮތަށް ކަންތައްތައް ދަނީ ކުރެވެމުން ކަމަށްވެސް ރައީސް ވިދާޅުވިއެވެ.