ރައްޔިތުންގެ މަޖިލިސް މެންބަރުންގެ އަދަދު މަދުކޮށް ކައުންސިލްތަކުގެ ސައިޒް ކުޑަކުރަން ޖެހޭ: ރައީސް

ރައްޔިތުންގެ މަޖިލިސް މެންބަރުންގެ އަދަދު މަދުކޮށް ކައުންސިލްތަކުގެ ސައިޒް ކުޑަކުރަން ޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ޕީއެންސީ ޖަގަހަ ޖަލްސާގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ ރައްޔިތުންގެ މަޖިލިސް މެންބަރުންގެ އަދަދު އިތުރުވަމުންދާ ދިއުން ހުއްޓުވަން ޖެހޭ ކަމަށެވެ. އަދި އެމަނިކުފާނަށް ފެނިވަޑައިގަންނަވާ ގޮތުގައި މަޖިލިސް މެންބަރުންގެ އަދަދުގެ ގޮތުގައި އެންމެ ރަނގަޅު އަދަދަކީ 77 ކަމަށް ވިދާޅުވިއެވެ. އެއީ 2009 ވަނަ އަހަރު އާޤާނޫނު އަސާސީގެ ދަށުން ފުރަތަމަ އިންތިޚާބު ކުރި މަޖިލީހުގެ މެންބަރުންގެ އަދަދެވެ.

ރައީސް މުޢިއްޒު ވިދާޅުވީ ކުދިކުދި ރަށްތަކުގައި ކައުންސިލަރުންގެ ގޮތުގައި ރައީސްއަކާއި ނައިބު ރައީސުން ތިބުމުން ފުދޭނެ ކަމަށާއި، އާބާދީ ބޮޑެތި ރަށްތަކަށް އެއަށްވުރެ ގިނަ ކައުންސިލަރުން އިންތިޚާބު ކުރުން އެންމެ ރަނގަޅު ކަމަށެވެ. އަދި އަތޮޅު ކައުންސިލްތައް މިހާރު އޮތްގޮތް ބަދަލު ކުރަން ޖެހޭ ކަމަށް ވެސް ރައީސް ވިދާޅުވިއެވެ.

މުޅި ދަޢުލަތުގެ ކަންކަން ނިންމަން ގައުމުގެ އިސްވެރިޔާގެ ގޮތުގައި މި ހޮވަނީ އެންމެ މީހެއް. އެހެންވީމަ، ރަށެއްގެ 300 މީހުން، 500 މީހުން، 1000 އެއްހާ މީހުންގެ ރަށެއްގައި ފަސް މީހުން، ހަތް މީހުން ހޮވުމަކީ ވަރަށް ޚަރަދު ބޮޑު ކަމެއް. : ރައީސް މުޢިއްޒު

މީގެ އިތުރުން ރައީސް ވިދާޅުވީ ޤާނޫނުއަސާސީ އާއި ޤާނޫނުތަކުން ވަރަށް ގިނަ މުއައްސަސާތައް އުފައްދާފައިވާ ކަމަށާއި އިހުލާސްތެރި މަސައްކަތެއް ކުރަން ބޮޑު ޓީމެއް ބޭނުން ނުވާ ކަމަށެވެ. އެމަނިކުފާނު ވަނީ ކޮމިޝަންތަކުގެ މެންބަރުން މަދުކޮށް އެއް ބާވަތުގެ މަސައްކަތް ކުރާ މުއައްސަސާތައް އެއްކޮށްލައްވާނެ ކަމަށް ވިދާޅުވެފައެވެ.