ރައީސް މުޢިއްޒު އަތޮޅުތެރެއަށް ކުރައްވާ ދަތުރުފުޅުތައް 2 މަސްފަހުން ފަށްޓަވަނީ

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ރައްޔިތުންނާއި ބައްދަލުކުރެއްވުމަށް އަތޮޅުތެރެއަށް ކުރައްވާ ދަތުރުފުޅުތައް 2 މަސްފަހުން އަނެއްކާވެސް ފަށްޓަވާނެކަމަށް ވިދާޅުވެއްޖެއެވެ.

ސަރުކާރުން ހިންގާ މައި ޕާޓީ، ޕީއެންސީން ރޭ ބޭއްވި ޖަގަހަ ޖަލްސާގައި ވާހަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީ، މިއަހަރު ނިމެންވާއިރަށް ހުރިހާ ރަށަކަށް ދާނެކަމަށް ވައުދުވިނަމަވެސް އަދިވެސް ނުދެވި 130 ވަރަކަށް ރަށް އެބަ އޮތް ކަމަށާއި، މިއަހަރުގެ ބާކީ އޮތް 5 މަސްދުވަހުގެ ތެރޭގައި މިހުރިހާ ރަށަކަށް ދިޔުމަށް ވަރަށް ބޮޑު ޚަރަދެއް ހޭދަވާ ކަމަށެވެ.

މި ހަފްތާގައި މި ދަތުރުތައް ފަށަން މީގެ ކުރިން ނިންމެވިނަމަވެސް، މި ޚަރަދު މިވަގުތު ކުރުމަށްވުރެ މިހާރު ރާއްޖޭގެ އިގްތިސާދު ކުރިއެރުވުމަށް ގެންނަ އިސްލާހުތަކާއިއެކީގައި އެކަންތައް ފަސްކޮށްލެއްވީ ކަމަށް ރައީސް ޑރ.މުޢިއްޒު ވިދާޅުވިއެވެ.

މި ޚަރަދު މިވަގުތު ކުރުމަށް ވުރެ އިކޮނޮމީ އަށް އަޅުގަނޑުމެން ގެންނަ އިސްލާހުތަކާއި އެކީގައި، ރަނގަޅު ދިރުމެއް ގެނައުމަށް އަދި ކުޑަވަގުތުކޮޅެއް ދޭން ބޭނުންވާތީ ކުޑަ ތަންކޮޅެއް ލަސްކޮށްލާފައި، އިރާދަކުރެއްވިއްޔާ 2 މަހެއްހާ ދުވަސްފަހުން މި ދެންނެވި ދަތުރުތައް ފަށާނަން: ރައީސް

ރައީސް ޑރ.މުޢިއްޒު ވިދާޅުވީ ރައްޔިތުން ބޭނުންވާކަންތައްތައް ސީދާ ރައްޔިތުންގެ ކިބައިން ރައްޔިތުންގެ ކައިރީގައި ހުންނަވައިގެން އަޑުއެއްސެވޭނެ ކަމަށާއި، ގޭގެއަށް ދިޔުމާއި ރައްޔިތުންނާއި ބައްދަލުކޮށް އެކިކަހަލަ ބައްދަލުވުންތައް ބޭއްވޭނެ ކަމަށެވެ. އަދި ދަތުރުފުޅުތައް ކުރައްވަން ބޭނުންވަނީ ރައްޔިތުންނާއި ސަލާމްކޮށް، ޖަލްސާއެއް ބޭއްވުމަށްފަހު ފުރަންނޫން ކަމަށް ވެސް ރައީސް ވިދާޅުވިއެވެ.

މީގެ އިތުރުން ރައީސް ވިދާޅުވީ މާލޭގެ ރައްޔިތުންނާއި ބައްދަލުކުރުމުގެ ގޮތުން ވަރަށް އަވަހަށް ރަސްމީ މަސައްކަތުގެ ތެރެއިން ހަފްތާގެ ކަނޑައެޅޭ ކޮންމެވެސް އެއްދުވަހެއްގެ ހަވީރު ގޭގެއަށް ވަޑައިގަންނަވާނެ ކަމަށާއި، އެކިކަހަލަ ބައްދަލުވުންތައް ބާއްވާނެ ކަމަށެވެ.

އެހެންވީމަ ލަސްތަކެއްނުވެ، ވަރަށް އަވަހަށް ތާވަލެއްގެ ތެރެއިން މާލޭގެ ހުރިހާ ދާއިރާތަކަށް ކޮންމެ ހަފްތާއަކު ކޮންމެވެސް އެއް ދާއިރާއެއްގެ ގެތަކަށް އަޅުގަނޑު ދާން ފަށާނަން. ރައީސް މުޢިއްޒު

މިއަހަރު ނިމުމުގެ ކުރިން ރާއްޖޭގެ ހުރިހާ ރަށަކަށް ޒިޔާރަތްކުރެއްވާނެކަމަށް ރައީސް ޑރ.މުޢިއްޒު މީގެ ކުރިން ވިދާޅުވިއެވެ. ރައީސް މުޢިއްޒު ވަނީ ވެރިކަމުގެ ފުރަތަމަ 6 މަސްތެރޭގައި ގާތްގަނޑަކަށް 70 ރަށަށް ވަޑައިގެން 150އަށް ވުރެ ގިނަ ކައުންސިލާ ބައްދަލުކުރައްވާފައެވެ.