މަރުޙޫމް ހުސައިން ޝަރީފަކީ ނިކަމެތިންނަށް އެހީތެރިވުން ފަދަ ކަންކަމުގައި އިޙްސާންތެރި ބޭފުޅެއް: ރައީސް މުޢިއްޒު
އޯޒެން ރިޒާވް ބޮލިފުށި ރިސޯޓްގެ ވެރިޔާ، މަރުޙޫމް ޙުސައިން ޝަރީފަކީ މިސްކިތް ބިނާކުރެއްވުމާއި ނިކަމެތިންނަށް އެހީތެރިވުން ފަދަ ކަންކަމުގައި އިޙްސާންތެރި ބޭފުޅެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިހެން ވިދާޅުވެފައިވަނީ ހުސައިން ޝަރީފް އަވަހާރަވުމާއި ގުޅިގެން އާއިލާއަށް ތައުޒިޔާ ދަންނަވައި، އެކްސްގައި ކުރެއްވި ޕޯސްޓެއްގައެވެ.
އެ ޕޯސްޓުގައި ރައީސް ވިދާޅުވެފައިވަނީ މަރުޙޫމް ޙުސައިން ޝަރީފަކީ ފަތުރުވެރިކަމާއި ވިޔަފާރީގެ ދާއިރާގައި ތަޖުރިބާކާރު ޤައުމީ ޚިދުމަތްތެރިއެއް ކަމަށެވެ.
ރައީސް މުޢިއްޒު ވަނީ މަރުޙޫމް ޙުސައިން ޝަރީފް އަވަހާރަވުމުގެ ހިތާމައިގައި ބައިވެރިވެ، އެ މަރުޙޫމްގެ ޢާއިލާއަށް ތަޢުޒިޔާ ދަންނަވާފައެވެ. އަދި އެ މަރުޙޫމްގެ ޢާއިލާއަށް ކެތްތެރިކަން މިންވަރުކޮށްދެއްވުން އެދި ދުޢާކުރައްވާފައިވެއެވެ.
މީގެ އިތުރުން ރައީސް މުޢިއްޒުގެ ޕޯސްޓުގައި ވަނީ މަރުޙޫމް ޙުސައިން ޝަރީފް ސުވަރުގޭގެ ދާއިމީ ނިޢުމަތުގައި، މާތްاللهގެ ތަނަވަސްވެގެންވާ ރަޙްމަތާއި ނިޢުމަތުގައި ލެހެއްޓެވުމަށް އެދި ދުޢާކުރައްވާފައެވެ.