ދިވެހި ދަޢުލަތް ހިންގަން ބޭނުންވަނީ ދިވެހީންނަށް އެންމެ ލާބަ ހުރި ގޮތަށް: ރައީސް މުޢިއްޒު
ދިވެހި ދަޢުލަތް ހިންގަން ބޭނުންވަނީ ދިވެހީންނަށް އެންމެ ލާބަ ހުރި ގޮތަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ މިރޭ ކުރިއަށްދިޔަ 36 ވަނަ ޤައުމީ ޤުރުއާން މުބާރާތުގެ ނަތީޖާ ފާޅުކުރުމުގެ ޙަފްލާ ޝަރަފްވެރިކޮށްދެއްވާ ދެއްކެވި ވާހަކަ ފުޅުގައެވެ.
ރައީސް ވިދާޅުވީ ދިވެހި ދަޢުލަތް ހިންގަން އެމަނިކުފާނު ބޭނުންފުޅުވަނީ ދިވެހީންނަށް އެންމެ ލާބަހުރި ގޮތަށް ކަމަށާއި، ދިވެހީންނަށް އެންމެ މަޞްލަޙަތާއި، ރައްކާތެރިކަން ހުރި ގޮތަށް ކަމަށެވެ. އެގޮތުން މާތްވެގެންވާ އިސްލާމްދީނަށް ނަޞްރުދިނުމަކީ އެމަނިކުފާނު އެންމެ އިސްކަން ދޭއްވާ ޤައުމީ އެއް ވާޖިބު ކަމަށްވެސް ވިދާޅުވިއެވެ.
އަޅުގަނޑު ދިވެހި ދަޢުލަތް ހިންގަން ބޭނުންވަނީ ދިވެހީންނަށް އެންމެ ލާބަ ހުރި ގޮތަށް. ދިވެހީންނަށް އެންމެ މަޞްލަޙަތާއި ރައްކާތެރިކަން ހުރި ގޮތަށް. އެގޮތުން އަޅުގަނޑުމެންގެ މާތްވެގެންވާ އިސްލާމްދީނަށް ނަޞްރުދިނުމަކީ އަޅުގަނޑު އެންމެ އިސްކަން ދޭނެ ޤައުމީ އެއް ވާޖިބު: ރައީސް މުޢިއްޒު
އެ ކަމަށް ޓަކައި ކީރިތި ޤުރްއާނުގެ ޢިލްމު ފެތުރުމަށް މި ސަރުކާރުން ޚާއްޞަ އިސްކަމެއް ދެއްވާނެ ކަމަށާއި، ކީރިތި ޤުރުއާން ހިތުދަސް ހާފިޒުން އުފެއްދުމަށް އަދި އެ ކަމަށް ހިތްވަރުދީ މަގުކޮށައި ދިނުމަށް ވަރަށް ބޮޑު ސަމާލުކަމެއް ދެއްވާނެ ކަމަށް ރައީސް ވިދާޅުވިއެވެ.
ދިވެހީންގެ ދިރިއުޅުން އިސްލާމީ ސަގާފަތުން ޒީނަތްތެރިވެގެންވުމަކީ ދިވެހީންނަށް އެންމެ ލާބަ ހުރި ގޮތް ކަމަށާއި، އެއީ ދުނިޔޭގައި ވެސް ހެޔޮކަން އަދި އާޚްރަތުގައި ވެސް ހެޔޮކަން ލިބޭ ހަމަ އެކަނި މަގު ކަމަށް ރައީސްގެ ވާހަކަފުޅުގައި ވިދާޅުވިއެވެ.