ރައީސްގެ އަގުހުރި ނަޞޭޙަތް: ނަމާދަކީ އޮޕްޝަނަކަށް ވެގެން ނުވާނެ، ކޮންމެތަނެއްގައި ހުއްޓަސް ފަރުޟު 5 ނަމާދު ބަރާބަރަށް އަދާކުރުމަށް ހަނދާން ބަހައްޓަންޖެހޭނެ
ފަރުޟު ފަސް ނަމާދަކީ އޮޕްޝަނަކަށް ވެގެން ނުވާނެ ކަމަށާއި، ކޮންމެތަނެއްގައި ހުއްޓަސް ފަރުޟު ފަސް ނަމާދު ބަރާބަރަށް އަދާކުރުމަށް ހަނދާން ބަހައްޓަންޖެހޭނެ ކަމަށް ވިދާޅުވެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަގުހުރި ނަޞޭޙަތެއް ދެއްވައިފިއެވެ.
ރައީސް މިފަދައިން ނަޞޭޙަތްތެރިވެފައިވަނީ ރައީސުލްޖުމްހޫރިއްޔާ ދެއްވާ ޚާއްޞަ ސްކޮލަރޝިޕާއި، ހައި އެޗީވަރސް ސްކޮލަރޝިޕް ޙަވާލުކުރުމަށް ހުރަވީ ސްކޫލުގައި ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ކާމިޔާބީ ޙާޞިލްކުރުމަށްޓަކާ މުހިންމު 2 ކަމެއްގައި ހިފަހައްޓަން ޖެހޭކަން ރައީސް ފާހަގަކުރެއްވިއެވެ. އެ ދެކަމަކީ ތިމަންނާ އަކީ ފަޚުރުވެރި މުސްލިމެއްކަން ހަނދާން ކުރުމާއެކު، ކޮންމެތަނެއްގައި ހުއްޓަސް ފަރުޟު ފަސް ނަމާދު ބަރާބަރަށް އަދާކުރުމަށް ހަނދާން ބެހެއްޓުން ކަމަށާއި، މައިންބަފައިން ތިމާއަށްޓަކާ ވީ ޤުރުބާނީ އަކީ ކުޑަކަމަކަށް ނުހަދާ، އަބަދުވެސް އެ ޤުރުބާނީ ހަނދާންކޮށް އަޚުލާޤު ހިފެހެއްޓުން ކަމުގައި ރައީސް ވިދާޅުވިއެވެ.
ފަރުޟު ފަސް ނަމާދަކީ އޮޕްޝަނަކަށް ވެގެން ނުވާނެ، ކޮންމެތަނެއްގައި ހުއްޓަސް ފަރުޟު ފަސް ނަމާދު ބަރާބަރަށް އަދާކުރުމަށް ހަނދާން ބަހައްޓަންޖެހޭނެ، ތިމަންނާ އަކީ ފަޚުރުވެރި މުސްލިމެއްކަން ހަނދާން ހުންނަންވާނެ. މައިންބަފައިން ދަރީންނަށްޓަކާ ވީ ޤުރުބާނީ އަކީ ކުޑަކަމަކަށް ހަދައިގެން ނުވާނެ، އަބަދުވެސް އެ ޤުރުބާނީ ހަނދާންކޮށް އަޚުލާޤު ހިފަހައްޓަން ޖެހޭ: ރައީސް މުޢިއްޒު
މިއާއިއެކު ރައީސް ވަނީ އަމިއްލަ ނަފްޞަށް އިތުބާރު ކޮށް، ދިރިއުޅުން ތިމާއާއި، މައިންބަފައިންނާއި ، މުޖްތަމަޢުއާއި އަދި ޤައުމަށްޓަކާ އެންމެ ރަނގަޅުގޮތުގައި ބައްޓަންކުރުމުގެ ޢަޒުމް ކަނޑައަޅަންޖެހޭ ކަމަށް ދަރިވަރުންނަށް ނަޞޭޙަތްތެރިވެފައެވެ.