ޝަރަފުގެ ބެޖް ވެއްޓުނަނުދީ ރައީސް ދެއްކެވި "ހުސިޔާރު" ކަމަށް އެތައްބައެއްގެ ތަޢުރީފް!

އިނާމުދިނުމުގެ ޙަފްލާތަކާއި އެނޫންވެސް އެކިކަހަލަ ޙަފްލާތައް އާއްމުކޮށް ކިތަންމެ ފުރިހަމައަށް ޒީނަތްތެރިކޮށް ޙަފްލާގެ ކަންކަން ތަރުތީބުވެފައިވީނަމަވެސް، ކޮންމެވެސް ކަހަލަ ހާދިސާއެއް ދިމާވާނެއެވެ. ރަސްމީ ޙަފްލާތަކުގައިވެސް މިފަދަ ކަންކަން ދުނިޔޭގެ ހުރިހާ ޤައުމެއްގައިވެސް ކުރިމަތިވެއެވެ.

އެގޮތުން ރާއްޖޭގައިވެސް މަދުންނަމަވެސް މިފަދަ ޙަފްލާތަކުގައި ކުދިކުދި ކަންކަން ދިމާވެފައި އެބަހުއްޓެވެ. އެހެންނަމަވެސް ސައްބީސް ޖުލައި 2024 ވަނަ ދުވަހުގެރޭ ދިވެހިރާއްޖޭގެ 59 ވަނަ މިނިވަންދުވަހުގެ މުނާސަބަތުގައި ބޭއްވި ރަސްމީ ޖަލްސާ ތަފާތެވެ. މި ޖަލްސާގައި ހިނގި މިފަދަ ހާދިސާއަކަށް މުޅި ޤައުމުގެ ސަމާލުކަން ލިބިއްޖެއެވެ. ސަބަބެއްނެތިއެއް ނޫނެވެ. ރައީސުލްޖުމްހޫރިއްޔާގެ ހުސިޔާރުކަން ފެނިގެންދިޔަ މިފަދަ ފުރަތަމަ ޙަފްލާއަށްވީމައެވެ.

މިނިވަންދުވަހުގެ މުނާސަބަތުގައި ރޭ ޒުވާނުންގެ މަރުކަޒުގައި ބޭއްވި ޙަފްލާގައި ދަޢުލަތަށް ގިނަދުވަހު ޚިދުމަތްކުރެއްވި ޚިދުމަތްތެރިންގެ އަގުވަޒަންކޮށް އެފަރާތްތަކަށް ރައީސުލްޖުމްހޫރިއްޔާ އިނާމް ދެއްވަމުންދަނިކޮށް، އެމަނިކުފާނު ދެއްވި ޝަރަފުގެ ބެޖާއި ޙަވާލުވި ފަރާތުގެ އަތުން އިނާމު ދޫވެގެން ވެއްޓެންދިޔައެވެ. ގިނަބަޔަކަށް ކުއްލި ހައިރާންކަމެއް ލިބިގެން ދިޔައީ ސިކުންތެއްވެސް ނުދެއްވައި، ރައީސް ޑރ. މުޢިއްޒު ވަގުތުން އެ އިނާމުގައި ހިއްޕަވާ ޝަރަފުގެ ބެޖް ވެއްޓުނަ ނުދިނުމުންނެވެ.

އިސާހިތަކު ސޯޝަލްމީޑިއާގައި އެތައްބައެއްގެ ތައުރީފް ރައީސްއަށް އޮހެންފެށިއެވެ. "ރައީސްގެ ހުށިޔާރުކަމުން ޝަރަފުގެ ބެޖް ވެއްޓުނަނުދިން" ފަދަ ޢިބާރާތްތަކުން މުޅި ސޯޝަލް މީޑިއާ ފުރާލައިފިއެވެ. ވާނީވެސް އެހެންތާއެވެ. މީގެ ކުރީގެ ވެރިން އަތުން މިފަދަ ޙަފްލާތަކުގައި ބައެއްފަހަރު އިނާމް ވެއްޓި ހަލާކުވެފައި އެބަހުއްޓެވެ. އެއީވެސް އަނެއްހެން މައްސަލައެއް ނޫނެވެ. ނަމަވެސް ބުނަން މިއުޅެނީ ރައީސް ޑރ. މުޢިއްޒު ގެ ހުސިޔާރު ކަމުގެ ވާހަކައެވެ. ކޮންމެ ފަދަ ކަމަކާވެސް ކުރިމަތިލައްވަން އެމަނިކުފާނު ހުންނަވަނީ ހުސިޔާރުވެގެންނެވެ. މިފަދަ ހުސިޔާރުވެރިންނަށް ޤައުމުގެ ހުންގާނުގައި ހިއްޕަވައިން ކުރިއަށް ދެވިދާނެ ކަމަށް ގިނަބަޔަކު ޤަބޫލުކުރެއެވެ.

ރޭގެ ހާދިސާއާއި ގުޅިގެން ކުރީގެ މަޝްހޫރު ނޫސްވެރިޔާ އަދި ދިވެހި ވާހަކަ ދެއްކުންތެރިޔާ ހޯރަފުށީ މުޙައްމަދު ސަލީމް ލިޔުއްވާފައިވެއެވެ.

ރޭ ސްޓޭޖުން މި ފެނުނު މަންޒަރުން އެ ކިޔައިދެނީ ރައީސުލްޖުމްހޫރިއްޔާ ޑރ. މުޢިއްޒަކީ ހުސިޔާރު ބޭފުޅެއް ކަމެވެ. އެމަނިކުފާނު ދެއްވި އިނާމާއި ޙަވާލުވި ފަރާތުގެ އަތުން އިނާމު ދޫވެގެން ވެއްޓެންދަނިކޮށް، ސިކުންތެއްވެސް ނުދެއްވައި، ވަގުތުން އެގައި ހިއްޕެވީ ރައީސްގެ ހުސިޔާރުކަމުންނެވެ. މިކަމުން އެނގެނީ މިއީ ކޮންމެ ސިކުންތެއްގައި ވެސް، ހުސިޔާރުކަމާއެކު ސަމާލުވެ ހުންނެވި ރައީސެއް ކަމެވެ. އެއީ ރައީސަކު ހުންނަވަންވާނެ ގޮތެވެ. އަޅުގަނޑަކީ އެމަނިކުފާނު ވެރިކަމަށް ވަޑައިގަންނަވަން ވޯޓުދިން މީހެއް ނޫނެވެ. ނަމަވެސް އެމަނިކުފާނުގެ ހުސިޔާރުކަންފެނި، ވަރަށް ބޮޑަށް އިޙްތިރާމް ކުރެވިއްޖެއެވެ! އެ ހުސިޔާރުކަމުގައި އެމަނިކުފާނު މި ގައުމު ހިންގަވައިފިނަމަ، ކާމިޔާބު ދައުރެއް އޮންނާނީ މާ ދުރަކު ނޫނެވެ! : ހޯރަފުށީ މުޙައްމަދު ސަލީމް

މީގެ އިތުރުންވެސް ރައީސް އަށް ތައުރީފުކޮށް އެތައް ބަޔަކު ވަނީ ކޮމެންޓް ކޮށްފައެވެ.

ޝަރަފްގެ ބެޖް ވެއްޓުނަނުދިނުމަށް ރައީސް އެ ދެއްކެވި ހުސިޔާރުކަމަށް ސާބަސްދެމުން މި ރައީސްގެ ނަން ރަން އަކުރުން ތާރީޚުގައި ލިޔެވޭނެ ކަމަށް ގިނަބަޔަކު ބުނެފައިވެއެވެ.