ސިޔާސީ ހަސަދަވެރިކަން ދޫކޮށް މިނިވަންކަން ޙިމާޔަތްކުރުމަށް ރައީސް މުޢިއްޒު ކުރައްވާ މަސައްކަތްޕުޅަށް އެއްބާރުލުން ދޭންޖެހޭ!

އިނގިރޭސިންގެ ހިމާޔަތުގެ ދަށަށް ދިވެހިރާއްޖެ ދިޔައީ 1887 ވަނަ އަހަރު ދިވެހިރާއްޖެއާއި އިނގިރޭސިވިލާތާއި ދެމެދު ޤާއިމްކުރި ޙިމާޔަތްދިނުމުގެ އެއްބަސްވުމާއެކުގައެވެ. ސްރީލަންކާގައި ސޮއިކުރި މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ އައްސުލްޠާން މުޙައްމަދު މުޢީނުއްދީން 2 ދެވަނައެވެ. އިނގިރޭސިންގެ ފަރާތުން ސޮއިކުރެއްވީ ސްރީލަންކާގައި ހުންނެވި، އިނގިރޭސި ގަވަރުނަރު ސަރ އޭއެޗްގޯޑްންއެވެ.

އިނގިރޭސިންނާއެކު ޤާއިމްކުރި ޙިމާޔަތް ދިނުމުގެ އެއްބަސްވުމުގެ މައިގަނޑު ބޭނުމަކީ އެހެން ޤައުމަކުން ރާއްޖެއަށް އަތުވެދާނެ ޙަމަލާއަކުން އިނގިރޭސިންގެ ރައްކާތެރިކަން ހޯދުމެވެ. ނަމަވެސް މި އެއްބަސްވުމާއެކު ދިވެހިންގެ ކަންކަމުގައި ބަސްބުނުމުގެ ބާރު އިނގިރޭސިންނަށް ލިބިގެންދިޔައެވެ. އަދި ރާއްޖޭގެ މުހިއްމު ސަރަޙައްދުތަކުގައި އެމީހުން ޤާއިމްވެ ތިބެންވެސް މަގުފަހިވެގެންދިޔައެވެ. އޭގެ ސަބަބުން ދިވެހިންގެ ތެރޭގައި އެތައް މައްސަލަތަކެއް އުފެދެން ފެށިއެވެ.

އިނގިރޭސިންގެ ހިމާޔަތުގައި 78 އަހަރު އޮތުމަށްފަހު، އިނގިރޭސިންގެ ހިމާޔަތުން ވީއްލި، ދިވެހިރާއްޖެއަށް ފުރިހަމަ މިނިވަންކަން ލިބުނީ 1965 ވަނަ އަހަރުގެ ޖުލައިމަހުގެ 26 ވަނަ ދުވަހުއެވެ. ރާއްޖޭގެ މިނިވަންކަމަށް 59 އަހަރު ފުރޭ މިނިވަން ދުވަސް މިއަދު ފާހަގަކުރަމުންދާއިރު، މިއީ އެތައް ބައެއްގެ އަގުހުރި މަސައްކަތުން ހޯދިފައިވާ، އަދި ދަމަހައްޓަމުންދާ މިނިވަންކަމެކެވެ. ޚާއްޞަ ގޮތެއްގައި އޭރުގެ ބޮޑުވަޒީރު އަދި ކުރީގެ ރައީސުލްޖުމްހޫރިއްޔާ އިބްރާޙިމް ނާޞިރު ކުރެއްވި މަސައްކަތްޕުޅަކީ އަގުނުކުރެވޭނެފަދަ މަސައްކަތްޕުޅެކެވެ.

1965 ވަނަ އަހަރުގެ ޖުލައިމަހުގެ 26 ވަނަ ދުވަހު ލަންކާގެ ވެރިރަށް ކޮލަމްބޯގައި ހުންނަ އިނގިރޭސި ހައިކޮމިޝަނުގައި ހެނދުނު 10:00 ޖެހިއިރު ބޭއްވި ރަސްމިއްޔާތެއްގައި ރާއްޖޭގެ މިނިވަންކަމުގެ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ބޮޑުވަޒީރު އިބްރާޙިމް ނާޞިރުއެވެ. އިނގިރޭސި ސަރުކާރުގެ ފަރާތުން ސޮއިކުރެއްވީ ލަންކާގައި ހުންނަވާ އިނގިރޭސި ހައިކޮމިޝަނަރ މައިކަލް ވޯކަރއެވެ.

އާދެ! އޭގެފަހުން 2024 ގެ ޖުލައި 26 އާއި ހަމަޔަށް ރާއްޖޭގެ މިނިވަންކަމަށް 59 އަހަރު ފުރުމުގެ މުނާސަބާ ފާހަގަކުރަމުންދާއިރު، މިއަދުވެސް އެންމެ ބޮޑަށް ކުރަންޖެހޭ މަސައްކަތަކީ މިނިވަންކަން ހިމާޔަތްކޮށް، ރައްކާތެރިކުރުމުގެ މަސައްކަތެވެ. މިދިޔަ 5 ވަރަކަށް އަހަރު ދުވަހު ރާއްޖޭގެ މިނިވަންކަން ނުރައްކަލަށް ހުށަހެޅިފައި އޮތްނަމަވެސް އަދުގެ ރައީސުލްޖުމްހުރިއްޔާ ޑރ.މުޙައްމަދު މުޢިއްޒުގެ ސަރުކާރުން އެންމެ އިސްކަންދެއްވާ މަސައްކަތަކީ ރާއްޖޭގެ މިނިވަންކަން ހިމާޔަތްކޮށް ރައްކާތެރިކުރުމުގެ މަސައްކަތެވެ.

ރައީސް މުޢިއްްޒު ރާއްޖޭގެ ޒަޢާމަތާއި ހަވާލުވެވަޑައިގަތުމަށްފަހު ނިންމެވި އެންމެ މުހިއްމު ނިންމެވުންތައްވެސް ގުޅިފައިވަނީ ރާއްޖޭގެ މިނިވަންކަމާއި އިސްތިޤުލާލު ހިމާޔަތްކޮށް، ދެމެހެއްޓުމަށެވެ. ދިވެހި ޒަޢާމަތާ ހަވާލުވެވަޑައިގެން، ޤައުމާ މުޚާޠަބު ކުރައްވައި ދެއްވި ފުރަތަމަ ތަޤުރީރުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދަންމަވާލެއްވީ ރައްޔިތުންގެ މިނިވަންކަމާއި ސިޔާދަތީ ފަލަ ރަތް ރޮނގެކެވެ.

އަޅުގަނޑަކީ ދިވެއްސެއް. އަޅުގަޑަށް ދިވެހި ރައްޔިތުން އަންނަނީ ލިސްޓުގެ އެއްވަނަ އަށް. ފުރަތަމައަށް. އެހެން ގައުމެއްގެ ބަޔަކު އަންނާނީ އޭގެ ފަހަތަށް. އަޅުގަނޑު އަބަދުވެސް ދިވެހި ރައްޔިތުންގެ މިނިވަންކަމާއި ސިޔާދަތީ ރަތް ރޮނގު ފިސާރި ފަލަކޮށް ދަމާނަން: ރައީސް ޑރ. މުޢިއްޒު

އެމަނިކުފާނުގެ ރިޔާސީ ވަޢުދުފުޅާއި އެއްގޮތަށް ރާއްޖޭގައި ތިބި އިންޑިއާ ސިފައިން އަނބުރާ ޤައުމަށް ފޮނުވާލެއްވިއެވެ. އަދި ދިވެހި އަސްކަރިއްޔާ ވަރުގަދަ ކުރައްވާ ޒަމާނީ ކުރެއްވުމުގެ މަސައްކަތް ފެއްޓެވިއެވެ. އެގޮތުން އަސްކަރިއްޔާގައި އެއަރ ވިންގެއް ފުރަތަ ފަހަރަށް ޤާއިމްކޮށް، ޒަމާނީ ޑްރޯން ބޭނުންކޮށްގެން ރާއްޖޭގެ އިޤްތިޞާދީ ސަރަޙައްދު ބެލެހެއްޓުމުގެ މަސައްކަތް ދިވެހި ސިފައިން މިއަދު އެގެންދަނީ ކުރަމުންނެވެ. މީގެ ސަބަބުން ރާއްޖޭގެ ކަނޑުތައް ބެލެހެއްޓުމަށް ބޭރު ޤައުމަކަށް ބަރޯސާވުން ނިމުމަކަށް އައިސް، ފަޚުރުވެރި މިނިވަން ޤައުމެއްގެ އަސާސްތައް ދަނީ ހާމަވަމުންނެވެ.

މިނިވަންކަން ރައްކާތެރިކުރުމަށް އަސްކަރިއްޔާ ވަރުގަދަ ކުރެއްވުމުގެ އިތުރުން، އިޤްތިޞާދީ މިނިވަންކަން ދެމެހެއްޓުމަށްވެސް ރައީސް މުޢިއްޒުގެ ސަރުކާރުން ގެންދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ޤައުމުތަކުގެ އަތްދަށުވާ ގޮތަށް، ނުވަތަ ޤައުމުގެ މިނިވަންކަން ނުރައްކަލަށް ހުށަހެޅޭ ގޮތަށް ލޯނު ނެގުން ވަނީ ނިމުމަކަށް ގެނެސްފައެވެ. ޤައުމުގެ މިނިވަންކަމާއި އިޤްތިޞާދީ ބާރުވެރިކަމާއި ގުޅޭ ބިޔަ މަޝްރޫޢުތައް ވަކި ޤައުމަކަށް އެކަނި ބަރޯސާވެފައި އޮތް އޮތުން ރައީސް މުޢިއްްޒުގެ ސަރުކާރުން ވަނީ ނިމުމަކަށް ގެންނަވާފައެވެ. އަދި އިޤްތިޞާދީ ގޮތުން ވަރުގަދަ ޤައުމަކަށް ރާއްޖެ ހެދުމަށްޓަކައި މީގެކުރިން ހިންގާފައި ނުވާފަދަ ބިޔަ މަޝްރޫޢުތައް ފައްޓަވައި، އިޤްތިޞާދު ސިންދަފާތުކުރުމުގެ މަސައްކަތް ރައީސް މުޢިއްޒުގެ ސަރުކާރުން ގެންދަވަނީ ހަލުވިކަމާއެކު ކުރައްވަމުންނެވެ.

މިއީ ހައްތަހާވެސް ރާއްޖޭގެ މިނިވަންކަމާއި އިސްތިޤުލާލު ދެމެހެއްޓުމަށްޓަކައި ރައީސް މުޢިއްޒުގެ ސަރުކާރުން ކުރައްވަމުންގެންދަވާ މަސައްކަތްތަކެވެ. އަދި އެކަންކަމުގެ ނަތީޖާ ފެންނަމުންދާ މަސައްކަތްތައްވެސްމެއެވެ. ދިވެހީންނަށް ޙަޤީޤީ މިނިވަންކަން ލިބޭނީ ބޭރު ޤައުމުތަކުގެ ދަރަނި ދަންތުރައިން ސަލާމަތްވެގެންނެވެ. މިސަރުކާރުން އެކުރަނީ އެ މަސައްކަތެވެ.

އެހެންކަމުން ސިޔާސީ ހަސަދަވެރިކަން އެއްފަރާތްކޮށް ރާއްޖޭގެ މިނިވަންކަން ހިމާޔަތްކޮށް ރައްކާތެރިކުރުމަށް ސަރުކާރުން ކުރާ ކޮންމެ މަސައްކަތަކަށް ހަޖޫޖެހުމުގެ ބަދަލުގަ މި މަސައްކަތުގައި ސަރުކާރަށް އެއްބާރުލުންދިނުމަކީ ކޮންމެ ދިވެއްސެއްގެވެސް ޤައުމީ ވާޖިބެކެވެ. އެއީ އަންނާން އޮތް ޖީލުތަކަށް ދިވެހީންގެރާއްޖެ މިނިވަން ޤައުމެއްގެ ގޮތުގައި ބާއްވައިދިނުމަށް ފަރުދީގޮތުން އަދާކުރެވޭނެ ވަރަށް މުހިއްމު މަސައްކަތެއްކަމާމެދު ޝައްކެއްނެތެވެ.