ބުޅަލުގެ މައްސަލަ ހައްލުކުރުމަށް ސަރުކާރުންދެއްވާ އަހަންމިއްޔަތުކަމަށް ޖަމިއްޔާގެ ޝުކުރު!
މާލެ ސަރަޙައްދަށް ގިނަވެފައިވާ ބުޅާތައް ދަފްތަރުކޮށް، ބެލެހެއްޓުމުގެ މަސައްކަތް ކުރަމުންދާ އަމިއްލަ ފަރުދުންގެ ޖަމިއްޔާއެއް ކަމުގައިވާ ފެލައިން ވެލްފެއާ އޯގަނައިޒޭޝަނުން ރައިސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ޝުކުރު އަދާކުރައްވައިފި އެވެ.
މާލެ ސަރަޙައްދުގައި އިންތިހާއަށް ބުޅާ ގިނަވެފައިވާއިރު، ބުޅަލުގެ އުނދަގުލުން ސަލާމަތްވުމަށް މިހާތަނަށް އެއްވެސް ސަރުކާރަކުން އެދެވިގެންވާ ފިޔަވަޅުތަކެއް އަޅާފައެއް ނުވެއެވެ. ނަމަވެސް ދިގުލައިގެން ގޮސްފައިވާ މި މައްސަލަ ހައްލުކުރުމަކީ ރައީސް ޑރ. މުޢިއްޒުގެ ރިޔާސީ ވަޢުދުފުޅެކެވެ.
އެމަނިކުފާނުގެ އިސްނެންގުވުމުގެ މަތިން ފެށުނު މި މަސައްކަތަށް އަމިއްލަ ފަރުދުންގެ ޖަމާއަތެއްކަމުގައިވާ ފެލައިން ވެލްފެއާ އޯގަނައިޒޭޝަނުން އަންނަނީ އެއްބާރުލުން ދެމުންނެވެ. އެގޮތުން ބުޅާތައް ރަޖިސްޓަރ ކުރުމާއި، ފްލީ ޓްރީޓްމެންޓް ދިނުމާއި، އެ އެއްޗެއްސަށް ކޮންމެ ދުވަހަކުވެސް ޤަވައިދުން ކާން ދިނުމުގެ މަސައްކަތް އެ ޖަމިއްޔާއިން ކުރެއެވެ.
އިންޑަސްޓްރިއަލް ޒޯންގެ ޕާކިންގް ޒޯންގައި އުޅޭ ބުޅާތަކުގެ ކަރުގައި ޓެގްހަރުކޮށް، ބުޅާތައް ދަފްތަރު ކުރުމުގެ މަސައްކަތް އެ ޖަމިއްޔާއިން ކުރަމުންދާއިރު، މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ ޑރ. ޢާއިޝަރު ރަމީލާ ވަނީ އެ ސަރަޙައްދަށް ވަޑައިގެން އެ ޕްރޮގްރާމް ފައްޓަވާ ދެއްވާފައެވެ. މިނިސްޓަރު ވަނީ ބުޅަލަކަށް ބޭސް ދެއްވައި 'ގޯލްޑީ'ގެ ނަމުގައި ބުޅަލަކަށް ނަން ދެއްވައި ރަޖިސްޓްރީ ކުރައްވާފަ އެވެ.
ދަރުމަވެރިންތަކެއް ނިކުމެ، މިފަދަ ބުރަ މަސައްކަތެއް ކުރަމުން ގެންދާއިރު، ސަރުކާރުން އެ މަސައްކަތް ބަލައިގަތުމަކީ ލިބުނު އިތުރު ހިތްވަރެއް ކަމަށް އެ ޖަމިއްޔާއިން ބުނެއެވެ.
ހުޅުމާލެ ދެވަނަ ފިޔަވަހީގައި ތަރައްޤީކުރަމުން އަންނަ ކެޓްޝެލްޓާގެ ބޮޑުބައެއް މިހާރު ނިމިފައިވާއިރު، އެތަނުގައި މާލޭގައި އުޅޭ ބުޅާތައް ގެންގޮސް، ފަރުވާ ދިނުމުގެ އިންތިޒާމު ޤާއިމުކުރާނެއެވެ. 24 ގަޑިއިރުގެ ޚިދުމަތަށް ހެދޭ މި ފެސިލިޓީގެ ހުރިހާ ޓެކްނިކަލް މަސައްކަތްތައް ކުރަނީ އެގްރިކަލްޗާ އެންޑް އެނިމަލް ވެލްފެއާ މިނިސްޓްރީ އިންނެވެ. ފިޒިކަލް މަސައްކަތްތައް ކުރަނީ މާލެ ސިޓީ ކައުސިލުންނެވެ. މި މަޝްރޫއުގެ ދަށުން ހަދާ ކެޓް ޝެލްޓަރގައި ބުޅަލާއެކު ޢާންމުންނަށް ވަގުތު ހޭދަކޮށްލެވޭ ގޮތަށް ކެޓް ކެފޭއަކާއި ވެޓް ކްލިނިކެއްގެ އިތުރުން ކެޓް ޝޮޕެއް ވެސް ހުޅުވާނެ އެވެ.