ބަންގްލަދޭޝްގެ ވަގުތީ ސަރުކާރުގެ ލީޑަރަށް ރައީސް މުޢިއްޒު ތަހުނިޔާ ދަންނަވައިފި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އަވަށްޓެރި ބަންގްލަދޭޝްގެ ވަގުތީ ސަރުކާރުގެ ޗީފް އެޑްވައިޒަރުގެ މަޤާމަށް އައްޔަނު ކުރި ޑރ. މުޙައްމަދު ޔޫނުސް އައްޔަންކުރެއްވުމާ ގުޅިގެން ތަހުނިޔާ ފޮނުއްވައިފިއެވެ.
ރައީސް މުޢިއްޒު މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ، ދިގު މުއްދަތެއްގެ ރަހްމަތްތެރިއެއްގެ ހައިސިއްޔަތުންނާއި ގާތް ބައިވެރިއެއްގެ ހައިސިއްޔަތުން، ޑރ. ޔޫނުސްގެ ވެރިކަމުގެ ދަށުން ބަންގްލަދޭޝްގެ ރައްޔިތުންނަށް ފާގަތިކަން ލިބުމަށް ދިވެހިރާއްޖެއިން އެދޭ ކަމަށެވެ.
ބަންގްލަދޭޝްގެ ވެރިކަމާ ވަގުތީ ގޮތުން ހަވާލުވެވަޑައިގެންނެވި މުހައްމަދު ޔޫނުސް ވަނީ ނޮބެލް ސުލްހައިގެ އިނާމު ހޯއްދަވާފައެވެ. އޭނާ ހުވާ ކުރެއްވުމުގެ ކުރިން ވިދާޅުވީ، ބަންގްލަދޭޝް އަށް ދެވަނަ ފަހަރަށް މިނިވަންކަން ލިބިއްޖެ ކަމުގައެވެ.
ވަގުތީ ލީޑަރު ބޭނުންފުޅުވެލައްވަނީ، ވީ އެންމެ އަވަހަށް އިންތިޚާބު ބޭއްވުމަށް ކަމަށް ރިޕޯޓުތައް ބުނެއެވެ.
ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާ އަށް އިސްތިއުފާ ދެއްވަން ޖެހިވަޑައިގަތީ، ވަޒީފާގެ ކޯޓާ ކަނޑައެޅުމާ ދެކޮޅަށް އެ ޤައުމުގެ ދަރިވަރުންތަކެއް ފެށި މުޒާހަރާތައް ހޫނުވެ، އާއްމު ރައްޔިތުންގެ ތެރެއިން ގިނަ ބަޔަކު މަރުވުމާ ގުޅިގެންނެވެ.