ޕީއެންސީގެ މެމްބަރޝިޕް އިތުރުކުރުމުގެ ހަރަކާތެއް މުޅި ރާއްޖޭގައި ފަށައިފި

ސަރުކާރު ހިނގާ ޕާޓީ ޕީޕަލްސް ނެޝެނަލް ކޮންގްރެސް (ޕީއެންސީ) އަށް މެމްބަރުން އިތުރު ކުރުމުގެ ހަރަކާތެއް މުޅި ރާއްޖެއަށް އަމާޒުކޮށްގެން ފަށައިފިއެވެ.

އެޕާޓީގެ ސެކެޓްރީ ޖެނެރަލް ޒީނާޒް އަދުނާން ވިދާޅުވީ އަތޮޅު ތެރޭގެ 12 ދާއިރާއެއްގައި މިހާރު އެ ހަރަކާތް ކުރިއަށް ދާކަމަށެވެ. އަދި ޕީއެންސީއަށް މެމްބަރުން އިތުރު ކުރުމުގެ ހަރަކާތް މިއަދު މާލޭގައި ފެށިގެން ދިޔަކަންވެސް އޭނާ ފާހަގަކުރެއްވި އެވެ. މި ކެމްޕެއިންގެ އިސް ސަފުގައި ހަރަކާތްތެރިވަނީ ދާއިރާތަކުގެ މަޖިލީސް މެމްބަރުން ކަމަށްވެސް ޒީނާޒް ވިދާޅުވި އެވެ. އަދި ޕީއެންސީއާއި ގުޅުމަށް ގިނަ ބަޔަކު ބޭނުންވެފައި ތިބިކަންވެސް ފާހަގަކުރެއްވިއެވެ.

ވަރަށް ބޮޑު ތަރުހީބެއް ލިބޭކަން ފާހަގަކުރެވޭ، އެހެން ޕާޓީތަކުގައި ތިއްބެވި ބޭފުޅުނުންވެސް، ޕާޓީތަކާއި ނުގުޅި ތިއްބެވި ބޭފުޅުންވެސް އެބަތިބި، އަދި ޕްރައިމެރީގައި ޕާޓީއާއި ގުޅުނު ނަމަވެސް، ރަޖިސްޓްރީ ނުވެވި ތިބި ބައެއް ބޭފުޅުންވެސް ތިބިކަން ފާހަގަކުރެވުނު: ޒީނާޒް

އެ ޕާޓީން ބުނީ މެންބަޝިޕް އިތުރު ކުރަން ހިންގާ ހަރަކާތްތަކުގައި ޕާޓީއަށް ވަންނަން ޝައުގުވެރިވާ ފަރާތްތަކުގެ ފޯމު ޕީއެންސީގެ ޓީމުތަކުން ފުރައިދޭނެ ކަމަށެވެ. މި އަހަރު ނިމުމުގެ ކުރިން ޕީއެންސީއަކީ ރާއްޖޭގައި އޮތް އެންމެ ބޮޑު ސިޔާސީ ޕާޓީއަކަށް ހައްދަވާނެ ކަމަށް ކޮންގްރެސް ޕާޓީގެ ރައީސް ޑރ. މުޙައްމަދު މުޢިއްޒު ވަނީ ވިދާޅުވެފަ އެވެ.

އިލެކްޝަންސް ކޮމިޝަނުގެ ދަފްތަރުގައި 11 ސިޔާސީ ޕާޓީއެއް އޮތްއިރު، 50،980 މެމްބަރުންނާއެކު އެންމެ ބޮޑު ޕާޓީގެ ގޮތުގައި އޮތީ އިދިކޮޅު އެމްޑީޕީ އެވެ. ދެވަނައިގައި އޮތް ޕީޕީއެމްގައި ތިބީ 34،827 މެމްބަރުންނެވެ. ޕީއެންސީ ތިން ވަނައިގައި އޮތީ 28،704 މެމްބަރުންނާ އެކު އެވެ.