"ޚާރިޖީ ސިޔާސަތަށް ބަދަލެއް ނާދޭ، މިއަދު ވެސް އޮތީ މެނިފެސްޓޯގައި އިއުލާނު ކުރި ސިޔާސަތު"
މި ސަރުކާރުގެ ޚާރިޖީ ސިޔާސަތާ ގުޅޭގޮތުން ނޫސްވެރިޔަކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ތަކުރާރުކޮށް ސުވާލު އަމާޒު ކުރެއްވުމުންވެސް ސަރުކާރުގެ އެއްވެސް ބަދަލެއް ނާންނަ ކަމަށާއި، މިހާރު ވެސް ގެންގުޅުއްވާ ސިޔާސަތަކީ މި ދައުރަށް އެމަނިކުފާނުގެ މެނިފެސްޓޯގައި ހާމަ ކުރި ސިޔާސަތު ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ މިއަދު މާލެސިޓީ ކައުންސިލާ ބައްދަލު ކުރެއްވުމަށްފަހުގައި، ނޫސްވެރިޔަކު ތަކުރާރުކޮށް ކުރި ސުވާލަކަށް ޖަވާބުދެއްވަމުންނެވެ.
ރައީސް ވިދާޅުވީ އެމަނިކުފާނުގެ ޚާރިޖީ ސިޔާސަތު ބައްޓަން ކުރައްވާނީ ދިވެހިރާއްޖޭގެ މިނިވަންކަމާ ސިޔާދަތު ހިމާޔަތް ކުރެވޭ ގޮތަށް ކަމަށެވެ. އަދި އެކަމަށް އެއްބާރުލުން ދޭ ހުރިހާ ޤައުމުތަކާއެކުގައި ވެސް ގާތް ގުޅުމެއް ބާއްވަވާނެ ކަމަށް ކުރިން ވެސް ވިދާޅުވެފައިވާނެކަން އެމަނިކުފާނު ފާހަގަކުރެއްވިއެވެ.
އަވަށްޓެރި އިންޑިއާ އާއި ގުޅުވާ ނޫސްވެރިޔާ އެ ސުވާލު ތަކުރާރު ކުރެއްވުމުންވެސް ރައީސް ވިދާޅުވީ އިންޑިއާ އަކީ ރާއްޖޭގެ އެންމެ ގާތް އެއް ރަހްމަތްތެރިޔާ ކަމަށާއި، އެ ޤައުމާ ރާއްޖެއާ ދެމެދު އޮތް ގާތް ގުޅުމުގެ ތެރެއިން ރާއްޖެ އާއި އިންޑިއާ އަދި މި ސަރަޙައްދަށް ވެސް ފައިދާވާ ކަމަށެވެ.
ޕީޕީއެމް/ޕީއެންސީން އިދިކޮޅުގައި ތިބެ، އިންޑިއާ ސިފައިން ރާއްޖޭގައި ތިބުމާ ދެކޮޅަށް ހިންގި ހަރަކާތާ ގުޅޭގޮތުން މައާފަށް އެދިވަޑައިގަންނަވަން ޖެހިވަޑައިގަންނަވާ ކަމަށް ދެކެވަޑައިގަންނަވަންތޯ ނޫސްވެރިޔާ ސުވާލު ކުރުމުން ރައީީސް ވިދާޅުވީ، ރައްޔިތުން އެދުނީ އިންޑިއާ ސިފައިން ބާލަން ކަމަށާއި، އިންޑިއާއާ އޮންނަ ގާތް ގުޅުމުގެ ތެރެއިން، މަޝްވަރާ ކުރެވިގެން ރައްޔިތުން އެދުނު ކަންތައް މިހާރު ހާސިލުކުރެވިފައިވާ ކަމަށެވެ. އަދި މަޢާފަށް އެދިވަޑައިގަންނަވަން ޖެހޭ ކަމެއް ނެތްކަމަށާއި، ރައްޔިތުން ބަލައިގަތީ، ރާއްޖޭގައި ތިބި ބޭރުގެ ސިފައިން ބާލަން ވެވަޑައިގެންނެވި ވަޢުދު ހިމެނޭ މެނިފެސްޓޯ ކަމަށް އެމަނިކުފާނު ވިދާޅުވިއެވެ.އަދި ޤައުމުތަކާ ރަހުމަތްތެރިވާނެ ކަމަށާއި ހަތުރުވެރިކަމާއި ހަސަދަވެރިކަން ނުބާއްވާނެ ކަމަށް ވެސް ރައީސް ވިދާޅުވިއެވެ.
ރައީސް ޑރ. މުއިއްޒު ދިވެހި ޒަޢާމަތާ ހަވާލުވެވަޑައިގެންނެވުމަށްފަހު ފުރަތަމަ ދެއްވި ތަޤުރީރުގައިވެސް ވިދާޅުވީ އެމަނިކުފާނަކީ ދިވެއްސެއް ކަމަށާއި ދިވެހި ރައްޔިތުން އަބަދުވެސް އަންނާނީ ލިސްޓުގެ އެއްވަނަ އަށް ކަމަށްވާއިރު އެހެން ޤައުމެއްގެ ބަޔަކު އަންނާނީ، އޭގެ ފަހަތަށް ކަމަށެވެ. އަދި ދިވެހިރާއްޖޭގެ މިނިވަންކަމުގެ ރަތްރޮނގު، ފަލަކޮށް ދެމުމަކީ ރައީީސްގެ ވައުދުފުޅެކެވެ.
ރައީސް މުޢިއްޒުގެ އެ ވަޢުދުފުޅާ އެއްގޮތަށް، ރާއްޖޭގައި ޤާއިމްވެގެން ތިބި ބޭރުގެ އަސްކަރިއްޔާ ފޮނުވާލާފައިވާއިރު، އިންޑިއާއާއި އެކު އޮތް ޒަމާންވީ ގުޅުން މިސަރުކާރުން ދަމަހައްޓަނީ ޑިޕްލޮމެސީގެ ރިވެތި ހަމަތަކުގެ މަތިންކަން ފާހަގަކޮށްލެވެއެވެ.