ސަރުކާރު ޕްރޮމޯޓް ކުރުމަށް "މުޢިއްޒު ސްޕީޑް" ނުވަތަ "މުޢިއްޒު ދުވެލި" ބޭނުންކުރާތީ ސަރުކާރާ އިދިކޮޅު ފަރާތްތަކުން ފާޑުކީނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގެ "ފުރަތަމަ 9 މަހުގެ" ދުވެލި މާ ބޮޑަށްވެސް އަވަހޭ ބުނެވިދާނެއެވެ. ސަބަބުތައް ބައިވަރެވެ.

ސަރުކާރުގެ ދުވެލި އަވަހޭ ބުނުމުން ހިތަށް އަރާފާނެއެވެ. ބޮޑެތި އުމްރާނީ ތަރައްޤީގެ މަޝްރޫޢުތައް، ނުވަތަ ބޯހިޔާވަހިކަމުގެ މަޝްރޫޢުތައް އަދި ފެންނާކަށް ނެތޭ. ނުވަމަސް ދުވަހުން ކުރީ ކީއްހޭ؟ ޤައުމަށް އަންނަމުންދާ ހެޔޮ ބަދަލުތައް ފެންނާނީ ޤައުމާއިމެދު ވިސްނާލާފައި ހުޅުވާލާ ލޯތަކަށެވެ. ތަރައްޤީ ގެނެވޭނީ އިޤްތިޞާދީ ޙާލަތުން އަރައިގަނެ ދަޢުލަތަށް އާމްދަނީ އިތުރުވާން ފެށުމުންކަން ވިސްނޭނީ ޤައުމާމެދު ވިސްނާ ސިކުނޑި ތަކަކަށެވެ. ސަރުކާރުން ހަލުވި ދުވެލީގައި އެކުރަނީ އިޤްތިޞާދު ވެއްޓިފައިވާ ފުން "އަނދަވަޅުން" އަރައި ގަތުމުގެ މަސައްކަތެވެ. ޙަޤީޤީ ތަރައްޤީ ފެންނާނީ އެއަށް ފަހުގައެވެ.

ސަރުކާރުގެ ދުވެލި އަވަސްކަމަށް ބުނުމުން ސަރުކާރާ އިދިކޮޅު ފަރާތްތަކުން ހަޖޫ ޖެއްސެވި ނަމަވެސް ފެނިގެން މިދަނީ ކަންކަން ނިންމުމުގައި ސަރުކާރާއި ރައްޔިތުންގެ މަޖްލީސް އެކުގައި ކުރައްވާ މަސައްކަތްތަކުގެ ހަލުވި ދުވެއްޔެވެ.

މާދަމާ އެކިއެކި ވުޒާރާތަކުގެ މަސައްކަތްތައް ފެށިގެންދާއިރުގައި އަޅުގަނޑުމެންގެ އަޒުމަކީ ބާރު ސްޕީޑަށް ލަހުން ދިޔަ ސްޕީޑް ބަދަލުކޮށް ވަރަށް ހަލުވި މިނެއްގައި ކަންތައްތައް ގެންދިއުން. ހުރިހާ ވަޒީރުން އެ ތިއްބެވީ ކެތްމަދުވެފައި. ރައްޔިތުންނަށް ޚިދުމަތް ކުރުމަށްޓަކައި [އެ ތިއްބެވީ] ތައްޔާރަށް: ވެރިކަމާ ހަވާލުވެވަޑައިގެންނެވިތާ ދެވަނަ ދުވަހުގެރޭ ރައީސް ޑރ. މުޙައްމަދު މުޢިއްޒު ވިދާޅުވިއެވެ.

ނިމިދިޔަ އެމްޑީޕީގެ ފަސް އަހަރު ކުރީގެ ރައީސް އިބްރާހިމް މުޙައްމަދު ޞާލިޙްގެ ސްޕީޑް ލަސްކަމުން ރައްޔިތުން ވަރަށް ފާޑުކިޔުންތައް އަމާޒުކުރިއެވެ. ޞާލިޙްގެ ސަރުކާރު "ހަބޭހަށް ސްލޯ" ކަމަށް ބުނަމުންދިޔައެވެ. މަޝްރޫޢުތައް ކުރިއަށްދިޔައީ އެހާމެ ސްލޯކޮށެވެ. އޭގެ ރަނގަޅު ހެއްކަކަށް ތިލަމާލެ ބުރިޖު، އަމީނީ މަގު، އައްޑޫ ސިޓީގައި ފަތުރުވެރިކަމަށް ތަރައްޤީ ކުރަން ބުނި ހަންކެޑެ ބްރިޖް، އެއާޕޯޓުތައް، މިސްކިތްތައް، ކަންނެލި ޖަގަހަތައް، ޕޯޓުތައް، ރޯހައުސްތައް، ގޭދޮށު މަސްފެކްޓަރީ ތަކުގެ މަސައްކަތް ފުދެއެވެ. މިއިން ކޮންމެ ކަމަކީ ވެރިކަމުގެ ފަސްއަހަރު ނިންމަން ބުނެ ރައްޔިތުންނަށް ވަޢުދުވީ ކަންކަމެވެ. ނަތީޖާއެއް ނުނެރެވުނެވެ.

މިދިޔަ އޭޕްރީލް 23 ގައި ރައީސް ޑރ. މުޢިއްޒު ވެސް ވަނީ ރައްޔިތުން އެދޭ ތަރައްޤީ ގެނައުމުގައި ދެން ސްޕީޑް އަވަސްވާނެ ކަމަށް ވިދާޅުވެފައެވެ. ރައީސް އެހެން ވިދާޅުވީ ވެރިކަން ކުރާ ކޮންގްރެސް ޕާޓީން މަޖިލިސް 20 ސުޕަރ މެޖޯރިޓީ އާއިއެކު ކާމިޔާބު ކުރުމާއި ގުޅިގެން ބޭއްވި ޖަލްސާ ގައެވެ.

ރައީސް ވިދާޅުވިފަދައިން މަސައްކަތުގެ ދުވެލި އަވަސް ކުރުމުގެ ނަތީޖާއަކީ ނިމިދިޔަ ސަރުކާރަށް ނުނިމިހުރި މަޝްރޫޢުތައް ނިމެމުން ދިއުމެވެ. އަދި މިސަރުކާރުގެ އައު މަޝްރޫޢުތައް ފެށޭނެ ކަމުގެ އުންމީދީ ކުލަވަރެވެ. އެއްސަރުކާރުން ފަށާ ނުނިމި ހުންނަ ކަންކަން ދެން އަންނަ ސަރުކާރަކުން ކުރިއަށް ގެންދިއުމަކީ "ރިބަން ކެނޑުމެއް" ނޫނެވެ. އެއީ އައު ސަރުކާރުގެ ޤާބިލް ކަމާ ވެރިކަން ހިންގުމުގެ ވައްޓަފާޅި އެނގުމެވެ.

9 މަސް ތެރޭގައި ކުރީ ކީއްހެއްޔެވެ؟

·     ރާއްޖޭގައި ޤާއިމްވެގެން ތިބި ބޭރުގެ އަސްކަރިއްޔާ ފޮނުވާލި.

·     ޝަރުޢީ ދާއިރާއަށް ސަރުކާރުތަކުން ފޯރުވަމުން އައި ނުފޫޒު ނިމުމަކަށް ގެނައި.

·     މިފްކޯ އަކީ 100 ޕަސަންޓް ސަރުކާރު ހިއްސާވާ ކުންފުންޏަކަށް ހެދި.

·     ފަޤީރުންނަށް ސަރުކާރުގެ އެހީގައި ޙައްޖަށް ދެވޭނެ މަގު ފަހިކޮށްދިން.

·     އަސާސީ ބޯހިޔާވަހިކަމަށް ދޫކޮށްފައިވާ ފްލެޓްތަކުގެ ކުލި ކުޑަކޮށް ޖޫރިމަނާއަށް ލުއިތަކެއް ދިން.

·     މެޑިކަލް ޗެކްއަޕް، ދަރިމައިވުމުގެ މައްސަލަތކުގެ ފަރުވާ، އާސަންދައިގެ ތެރެއަށް.

·     ތެލަސީމިއާ ފަރުވާ އިތުރަށް ފުޅާކޮށް ހިލޭ ބޯންމެރޯ ހެދުމުގެ މަގުފަހިކުރުން.

·     ނިމިދިޔަ ސަރުކާރުން މަސްވެރިންނަށް ނުދީހުރި ދަރަނި ދައްކާ މަސްވެރިންނަށް 1 ބިލިއަން.

·     ޤަވާއިދާ ޚިލާފަށް އުޅޭ ބިދޭސީންގެ ތެރެއިން 2000 ވުރެ ގިނަ ބިދޭސީން ޑީޕޯޓް ކޮށްފި.

·     ރާއްޖެއިން ލިބޭ ބޭހަކީ ފެންވަރު ރަނގަޅު ބޭހަށް ހެދުމަށް ޔޫރަޕްގެ ކޮލިޓީ ބޭސް އެތެރެކުރުން.

·     2 މިލިއަން ޑޮލަރުގައި ހުރި ސޮވެރިން ޑިވެލޮޕްމެންޓް ފަންޑަށް 65 މިލިއަން ޑޮލަރު ޖަމާކޮށްފި.

·     ޤައުމު ތަކުން ނަގާފައިވާ ލޯނުތަކަށް ލުއި ގޮތްތައް ހަމަ ޖައްސައިފި.

·     ކުށްތަކަށް އަރައިގަންނަ ޒުވާނުން އިސްލާހު ކުރުމުގެ މަސައްކަތް ފަށައިފި.

·     ރާއްޖޭގެ އިޤްތިޞާދީ ސަރަޙައްދު ބެލެހެއްޓުމުގެ ފުލް ކޮންޓްރޯލް ދިވެހި ސިފައިންނަށް ދީފި.

·     މީޑިއާތަކަށް އޮތް ދަތިކަން ފިލުވައި ދިނުމަށް މީޑިއާ ވިލެޖް ޤާއިމް ކުރުމުގެ މަސައްކަތް ފަށައިފި.

·     ބަރަހަނާ ވެބްސައިޓް ތަކާއި ޖުވާކުޅޭ އެޕްލިކޭޝަންތައް ބްލޮކް ކުރި.

·     އެންމެ ކުރު މުއްދަތެއްގެ ތެރޭގައި 1 މިލިއަން ފަތުރުވެރިން ރާއްޖެ ޒިޔާރަތްކުރި.

·     ޝަރުތު ހަމަވާ ހުރިހާ ދަރިވަރުންނަށް ސްޑޫޑަންޓް ލޯނު ދޫކުރުން.

·     ދޮށީ އުމުރު މީހުންނަށް ދާއިމީ އައިޑީކާޑެއް.

·     100 ޚަޠީބުން ތަމްރީންކުރުން.

·     އެއާ އެމްބިއުލަންސް އަދި ސީ އެމްބިއުލާންސްގެ ޚިދުމަތް ފެށުން.

·     ސްކޫލްތައް އޭސީ ކުރުމުގެ މަޝްރޫޢު ފެށުން.

·     ލޯނުތަކުގެ 45 އިންސައްތަ ދައްކާ ނިންމުން.

·     ދަޢުލަތުގެ ރިކަރަންޓް ޚަރަދު ކުޑަކޮށް ބަޖެޓް ޑެފިސިޓް 59 އިންސައްތަ ދަށަށް.

·     ރައްޔިތުންގެ ހާލު އަހުވާލު ބެލުމަށް "ހާލު ކިހިނެއް" ޕްރޮގްރާމް ފެށުން.

·     ނ. އަތޮޅުގައި އާރުޓީއެލް ޚިދުމަތް ފެށުން.

·     ކައުންސިލްތައް މެދުވެރިކޮށް އައިޑީ ކާޑު ހެދޭނެ މަގުފަހިކޮށްދިނުން.

·     ބިންވެރިޔާ ސްކީމްގެ ދަށުން ހުޅުމާލެއިން 624 ގޯތި ދޫކުރުން.

·     ފުރަތަމަ ފަހަރަށް ޕްރެޒިޑެންޝަލް ޔޫތު އެޑްވައިޒަރީ ބޯޑު އެކުލަވާލުން.

·     ޤަވާއިދާ ޚިލާފު އުޅަނދުތައް ޤަވާއިދަށް ފެއްތުމުގެ ފުރުޞަތު ދިނުން.

މިނޫނަސް މިފަދަ އެތައް އެތައް ކަމެއް މިވީ 9 މަސް ދުވަހުގެ ތެރޭގައި ސަރުކާރުން ކޮށްފިއެވެ. ދަޢުލަތުގެ އާމްދަނީ އިތުރުވަމުންދާ މިންވަރަކުން ތަރައްޤީގެ މަޝްރޫޢުތަށް ކުރިއަށް ގެންދަވާނެ ކަމުގެ ޔަޤީންކަން ރައީސް ޑރ. މުޢިއްޒު ވަނީ ދިވެހި ރައްޔިތުންނަށް ދެއްވާފައެވެ. ވަޢުދު ފުއްދެވުމުގައި މިއަށްވުރެ ވަކި ދުވެލި އަވަސްކުރެއްވި ރައީސް އަކު ފެނިފައިނުވާކަމަށް ދަންނަވަން ޖެހެނީ މިފަދަ ސަބަބުތަކަށް ޓަކައެވެ.

ފިއްތުންތައް ކުރިމަތި ކުރުވިއިރު ވެސް ދުލެއް ނުދެއްވި

މި ސަރުކާރު ފެށިގެން އައިއިރު މަޖިލީހުގެ ސްޕަރ މެޖޯރިޓީ ޕާޓީއަކީ އިދިކޮޅު އެމްޑީޕީއެވެ. ބަޖެޓް ފާސްކުރުމާ ހިސާބުން ފެށިގެން އެމްޑީޕީން ސަރުކާރަށް ފިއްތުންތައް ކުރިމަތިކުރުވިއެވެ. ރައީސްގެ ތަސައްވުރުތަކުގައި ކުލަޖެހުނަ ނުދިނުމަށް އެތަކެއް ގޮންޖެހުންތަކެއް ކުރިމަތިކުރުވައި 'ޖެއްސުން' ކުރިއެވެ. ރައްޔިތުންނާ ސީދާ ގުޅުންހުރި މުހިންމު އެއްކަމެއް މި ރިޕޯޓުގައި ފާހަގަކޮށްލާނަމެވެ.

މިއަހަރަށް ހުށަހެޅި ބަޖެޓުގައި ސަރުކާރުން އެދިގެން ފުށިދިއްގަރު ފަޅު ހިއްކުމަށް ހިމަނާފައިވާ 400 މިލިއަން ރުފިޔާ އުނިކުރަން ވެސް އެމްޑީޕީން ފާސްކުރިއެވެ. މިއީ ދިވެހި ރައްޔިތުންގެ ބޯހިޔާވަހިކަމަށް ހުރަސް އެޅުމަށް އިދިކޮޅު އެމްޑީޕީން ހިންގި ފިނޑި ޢަމަލެކެވެ. މިއުޅެނީ ހަޖަމުގެ މައްސަލައެކެވެ. އަހަރުމެންނަށް ނުވި ކަމެއް އެމީހުންނަށް ވިޔަދީގެން ނުވާނެއޭ ބުނާ ކަހަލައެވެ.

ނަމަވެސް މި ސަރުކާރުގެ އެންމެ ބިޔަ އެއް މަޝްރޫއު ކަމުގައިވާ ފުށިދިއްގަރުފަޅު ހިއްކުމުގެ މަޝްރޫއު ޑިސެމްބަރުގައި ފަށައިފައެވެ. އޭގެފަހުން ބައެއް ސަބަބުތަކާހުރެ ހުއްޓިފައި އޮތް ފުށިދިއްގަރު ފަޅު ނުވަތަ 'ރަސްމާލެ' ހިއްކުމުގެ މަސައްކަތް ޖުލައި މަހުގައި ވަނީ އަލުން ފަށައިފައެވެ. ސަރުކާރުގެ އަމާޒަކީ އަންނަ ޑިސެމްބަރުގެ ނިޔަލަށް ރަސްމާލެ (1100 ހެކްޓަރުގެ ބިން) ހިއްކައި ނިންމުމެވެ.

ރައީސް ޑރ. މުޢިއްޒުގެ ވެރިކަމަށް 9 މަސްދުވަސް ވެގެންދިޔައިރު ޤައުމުގެ މިނިވަންކަން ޔަޤީންކުރުމާއި، ޤައުމުގެ އަމާންކަމާއި، ރައްކާތެރިކަން ކަށަވަރު ކުރުމަށްޓަކައި ވަޒީރުންގެ މަޖިލީހުން ގިނަ މަޝްވަރާތަކެއް ކުރައްވައި، މިހާތަނަށް ވަޒީރުންގެ މަޖިލީހުން 17 ބައްދަލުވުމެއް ބާއްވައި 225 ނިންމުމެއް ވަނީ ނިންމަވާފައެވެ. މިއީ ވޭތުވެދިޔަ ދެ ސަރުކާރުގެ ވަޒީރުންގެ މަޖިލީހާއި އަޅައިބަލާއިރު ނިސްބަތުން ވަރަށް ގިނަ މަސައްކަތްތަކެއްކަން ވެސް ފާހަގަކޮށްލަން ޖެހެއެވެ.