ކުށްތަކަށް އަރައިގަންނަ ފަރާތްތަކުގެ ވަނަވަރު އާންމު ކުރަން ފެށުން، ރައްޔިތުން ހޭލުންތެރި ވުމަށް މުހިންމު ފިޔަވަޅެއް!
ރާއްޖޭގެ ޖިނާޢީ ޢަދުލުގެ ނިޒާމަށް ގެއްލިފައިވާ އިތުބާރު އާވެގެން ދިޔައީ ރައީސް ޑރ. މުޙައްމަދު މުޢިއްޒުގެ ހާމަކަން ބޮޑު ސިޔާސަތާއި އެކުއެވެ.
ޑިމޮކްރެޓިކް ވެއްޓެއްގައި އިންސާފުގެ ބިންގަލަކީވެސް އެއީއެވެ. އަމާން އަދި ރައްކާތެރި ވެއްޓެއްގެ ޔަޤީންކަން ރައްޔިތުންނަށް ހޯދާދިނުމަކީ ސަރުކާރުގެ މުހިންމު ޝިޢާރެކެވެ. އެ ލަނޑުދަނޑިއަށް ވާސިލްވުމަށް ދާޚިލީ ސަލާމަތުގެ ވުޒާރާއިން ގިނަ މަސައްކަތެއް ކުރަމުންދާއިރު، އެކި އެކި ކުށްތަކުގައި ހައްޔަރުކުރާ ކުށްވެރިންގެ ވަނަވަރު އާންމު ކުރަން ނިންމުމަކީ ގިނަ ރައްޔިތުންގެ މޫނުމައްޗަށް ހިނިތުންވުން ގެނުވި ކަމެކެވެ. ބިރުވެރިކަމުގެ އިޙްސާސުން މިންޖުވެ، އަދުލު ޤާއިމުވާނެ ކަމުގެ އުންމީދު އާވެގެން ދިޔަ ކަމެކެވެ.
މިމަހުގެ ހަވަނަ ދުވަހު ދިވެހި ފުލުހުންގެ ޚިދުމަތުން ރައްޔިތުންނަށް ދިން ޔަޤީންކަމަކީ ވަކި ބަޔަކަށް ވީތީ އެމީހުންގެ މަޢުލޫމާތު ފޮރުވާ ސިއްރުކުރުމާއި، ހިމާޔަތްދިނުމުގެ ސިޔާސަތަށް ދެން ފުރުސަތު ނުދެއްވާނެ ކަމެވެ. އަދި ޤާނޫނީ ވެރިކަމުގެ ބާރު ދެމެހެއްޓުމަށްޓަކައި، ކުށްވެރިންގެ ވަނަވަރު ފާޅުކަން ބޮޑު ސިޔާސަތެއްގެ ތެރެއިން އާންމުކުރަމުން ދާނެ ކަމެވެ.
މިކަމަށް އާންމުންގެ ތަޢުރީފާއި ތަރުޙީބު ލިބިގެން ދިޔައީ ދާދި ފަހުން ހިނގި 4 މައްސަލައެއްގައި ޝާމިލުވާ މީހުންގެ ވަނަވަރުވެސް ފުލުހުން އާންމު ކުރުމާއި އެކުއެވެ.
ނ. ހެނބަދޫގައި ފުލުހެއްގެ ސައިކަލުގައި ރޯކޮށްލި މައްސަލާގައި ހައްޔަރުކުރި ދެ މީހުންނާއި، ހުޅުމާލޭގައި ހިނގި ނުރައްކާތެރި އެކްސިޑެންޓުގައި ހިމެނޭ ތިން މީހުންގެ އިތުރުން ވ. ބޮޑުމޮހޮރާ އިން ބަނގުރަލާއެކު ހައްޔަރުކުރި ތިން މީހުންނާއި، 48 ދަޅު ބަނގުރަލާއެކު ހައްޔަރު ކުރި ބިދޭސީ މީހާގެ ވަނަވަރުވެސް ފުލުހުން އާންމު ކުރިއެވެ.
މި އިސްނެގުމުގެ މުހިންމު އެއް ފައިދާއަކީ އާންމުންގެ ސަލާމަތަށް ނުރައްކާވެދާނެ ފަރުދުންނަށް ހޭލުންތެރިވެވޭނެ ނިޒާމެއް ޤާއިމްކުރުމެވެ.
މިސާލަކަށް މާރާމާރީ ނުވަތަ ފޭރުން ފަދަ އަނިޔާވެރި ޖަރީމާއެއްގައި މީހަކު ހައްޔަރުކޮށްފިނަމަ، އެމީހަކީ ކާކުކަން އެނގުމުގެ ޙައްޤު މުޖުތަމަޢަށް ކަށަވަރުކޮށްދިނުމަށެވެ. އަދި ކުށްވެރިންނާއި، އެމީހުންގެ ކުށުގެ ޢަމަލުތައް ސިއްރުވެފައި އޮތް އޮތުން ނިމުމަކަށް ގެނައުމެވެ.
ނަތީޖާއަކީ ކޮބާތޯ؟ ކުށްތަކަށް އަރައިގަތުމަށް ޖެހިލުންވާނެ، އެއީ ސިއްރުކުރުމުގެ ސިޔާސަތުން އެމީހުންނަށް (ކުށްވެރިންނަށް) އިތުރު ކުށްތަކަށް އަރައިގަތުމަށް ހިތްވަރު ލިބޭ މަގު ބަންދުވެ، މުޖުތަމަޢުއަށް ބޭޒާރުވެ ފަޟީހަތްވެގެން ދާނެތީ، އަދި އެފަދައިން ޤާނޫނީވެރިކަމުގެ ބާރު ނެގެހެއްޓުމަށް މަގުފަހިވާނެތީ: ޖިނާޢީ ޢަދުލުގެ ނިޒާމު އުނގަންނައި ދިނުމުގައި ހަރަކާތްތެރިވާ އުސްތާޛެއް ކިޔައިދިނެވެ.
އޭނާ އިތުރަށް ވިދާޅުވީ އެ ނިންމެވުމާއި އެކު، މުޖްތަމަޢުގެ އެންމެހާ އަފްރާދުންނަށްވެސް ކުށްވެރިންނަށް ފާރަވެރިވުމުގެ ފުރުސަތު ލިބިގެން ދާނެ ކަމަށެވެ. އަދި އަމާން ވެއްޓެއް ޤާއިމްކުރުމަކީ އެންމެންގެ ބައިވެރިވުމާއި އެކު މެނުވީ ކުރެވޭނެ މަސައްކަތެއް ނޫންކަން ފާހަގަކުރައްވަމުން ވިދާޅުވީ، ސަރުކާރުގެ މި ނިންމެވުމާއި އެކު އާންމުންގެ ޝާމިލްވުން ހޯދޭނެ މަގު ފަހިވެގެންދާނެ ކަމުގައި ޤަބޫލުކުރެވޭ ކަމަށެވެ.
ދިވެހިރާއްޖޭގެ ކުށުގެ ނިސްބަތް އަހަރެއް އަހަރަކަށް ވުރެ އިތުރުވަމުން ދާއިރު، ސަރުކާރުގެ މި ނިންމުމުގެ ނަތީޖާ ތަފާސްހިސާބުތަކުން ކައިރި މުސްތަޤްބަލެއްގައި ފެންނާނެ ކަމަށް ޤަބޫލުކުރެވޭ: ޖިނާޢީ ޢަދުލުގެ ނިޒާމާއި ގުޅޭ ދިރާސާއެއް ހަދާފައިވާ ފަރާތެއް ވިދާޅުވިއެވެ.
ސިންގަޕޫރުގައި ޖިނާޢީ ޙަރަކާތްތަކުގައި ބައިވެރިވާ ފަރުދުންގެ ވަނަވަރު އާންމުކުރުމާއި، އެފަރާތްތައް ލަދުވެތިކުރުމުގެ ހަރުކަށި ސިޔާސަތެއް ގެންގުޅެއެވެ. އެ ސިޔާސަތު ވެގެން ދިޔައީ ދުނިޔޭގެ އެންމެ ކުށްމަދު ޤައުމުތަކުގެ ތެރޭގައި ސިންގަޕޫރުގެ ނަން ހިމެނިގެން ދިއުމުގައި މުހިންމު ދައުރެއް އަދާކުރި މަސައްކަތަކަށެވެ. ހަމަ އެގޮތަށް އެމެރިކާގައިވެސް، އެކަން ވެގެން ދިޔައީ ވަކި ދާއިރާތަކުން ކުށުގެ ނިސްބަތް ދަށްކުރުމަށް އެހީތެރިވެދިން ކަމެއް ކަމުގައި ދިރާސީން ފާހަގަކުރެއެވެ.
އެހެންކަމުން ޖިނާޢީ ހަރަކާތްތަކާ ގުޅިގެން ހައްޔަރު ކުރެވޭ މީހުންގެ ނަންތައް އާންމު ކުރަން ނިންމުމަކީ ސަރުކާރުގެ ހާމަކަން ބޮޑު ސިޔާސަތު ކުރިއެރުވުމަށް އެޅުނު މުހިންމު ފިޔަވަޅެކެވެ. ރައްޔިތުންގެ ބާރު ކަށަވަރުކޮށްދިނުމަށް އެޅުނު މުހިންމު ބިންގަލެކެވެ. ކުށްވެރިންނަށް ތަފާތުކުރުމެއް ނެތި ހަރުކަށި ފިޔަވަޅުއަޅާނެ ކަމުގެ އިންޒާރެއްވެސް މެއެވެ.