ޓެލެތޯނުން ލިބުނު 19 މިލިއަން ރުފިޔާ އަންރުއާއަށް ޖަމާކޮށްދީފި

ފަލަސްޠީނަށް އެހީވުމަށް ދަޢުލަތުގެ މީޑިއާ ޕީއެސްއެމުން މިދިޔަމަހު ބޭއްވި ޓެލެތޯންގައި ލިބުނު 19 މިލިއަނަށް ވުރެ ގިނަ ރުފިޔާ ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުއާ) އަށް ދިވެހި ސަރުކާރުގެ ފަރާތުން ޖަމާކޮށްފިއެވެ.

ޓެލެތޯނުން ލިބުނު ފައިސާ ނުފޮނުވާ ކަމަށް ބުނެ އިއްޔެ ބައެއް މީޑިއާތަކުގައި ފެތުރި ޚަބަރުތައް ސަރުކާރުން ވަނީ މިއަދު ދޮގުކޮށްފަ އެވެ.

މިކަމާ ގުޅިގެން ފޮރިން މިނިސްޓްރީން މިއަދު ބުނީ، އެ ފައިސާ ޖަމާކޮށްދިނީ މަރުކަޒީ ބޭންކު އެމްއެމްއޭ މެދުވެރިކޮށް، ސީދާ އަންރުއާގެ އެކައުންޓަށް ކަމަށެވެ.

އެ ފައިސާ ޚަރަދު ކުރާނެ ޕްރޮޖެކްޓްތައް އަންރުއާ އިން އަދި ފައިނަލް ކުރާނެ. އެ ކަމަށް ދެ ތިން ދުވަސް ނަގާނެ. ޕްރޮޖެކްޓްތައް ފައިނަލް ވީމާ އަދި ބަޔާނެއް ވެސް ނެރޭނެ: ފޮރިން މިނިސްޓްރީ

އެ ފައިސާ ފޮނުވާފައިވަނީ އެމެރިކާ ޑޮލަރުންނެވެ. އެއީ ޖުމްލަ 1.2 މިލިއަން ޑޮލަރެވެ.

"ފަލަސްޠީނާ އެކު ދިވެހީން" ނަމުގައި، ކުރިއަށް ގެންދިޔަ ޓެލެތޯން އަކީ ރައީސް ޑރ. މުޙައްމަދު މުޢިއްޒުގެ އިސްނެންގެވުމަށް ދަޢުލަތުގެ މީޑިއާ ޕީއެސްއެމުން އިންތިޒާމުކޮށްގެން ކުރިއަށް ގެންދިޔަ ޓެލެތޯންއެކެވެ. އެ ޓެލެތޯން ބޭއްވީ މިދިޔަ މެއި މަހުގެ 12 ވަނަ ދުވަހުގެ ހެނދުނު 8:00 އިން އެ ރޭގެ ދަންވަރު 12 ޖަހަންދެންނެވެ. އަދި މާލޭގެ އެކި ސަރަޙައްދުތަކުގައި ފަންޑުފޮށި ބެހެއްޓީ އެ ދުވަހުގެ ހަވީރު 6 ޖަހަންދެންނެވެ. އެ ޓެލެތޯންގައި މާލޭގެ އިތުރުން ރާއްޖޭގެ ހުރިހާ ރަށެއްގައި ވެސް ފަނޑުފޮށި ބެހެއްޓި އެވެ. އަދި އޮންލައިން ޓްރާންސްފާ ކުރެވޭ ގޮތަށްވެސް ހެދި އެވެ.

ޤައުމީ ފެންވަރުގައި ބޭއްވި އެ ޓެލެތޯނަށް ދަޢުލަތުގެ އެކި މުއައްސަސާތަކާއި ސްކޫލްތަކާއި އަމިއްލަ ފަރުދުންނާއި ކުންފުނިތަކުން ވަނީ އެހީތެރިކަން ފޯރުކޮށްދީފައެވެ.