ނުރަސްމީ ދަތުރުފުޅެއްގައި ރައީސުލްޖުމްހޫރިއްޔާގެ ދެކަނބަލުން ސިންގަޕޫރަށް ފުރާވަޑައިގެންފި
ނުރަސްމީ ދަތުރުފުޅެއްގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު، ރޭ ސިންގަޕޫރަށް ފުރާވަޑައިގެންފިއެވެ.
ރޭ އޮތް ޕީއެންސީގެ ހަރުގެ ޖަލްސާގައި ވާހަކަދައްވަމުން ރައީސް ޑރ.މުއިއްޒުގެ މިދަތުރުފުޅާ ގުޅޭގޮތުން ވާހަކަފުޅު ދެއްކެވިއެވެ.
ރައީސް ޑރ.މުއިއްޒު ވިދާޅުވީ އެމަނިކުފާނު ސިންގަޕޫރަށް ވަޑައިގަންނަވަނީ ދެ ބޭނުންފުޅެއްގައި ކަމަށެވެ. އެއީ ފުޓުބޯޅަ ކުޅުއްވަމުން ދަނިކޮށް ލިބިވަޑައިގަތް އަނިޔާއަކާ ގުޅިގެން ޑޮކްޓަރުންގެ ދެވަނަ ޚިޔާލެއް ހޯއްދެވުމަށާއި، ދެ އަހަރު ކުރިން ކުރެއްވި ސާޖަރީއަކާ ގުޅިގެން އާންމު ޗެކަޕެއް ހެއްދެވުމަށެވެ.
އެމަނިކުފާނު އިތުރަށް ވިދާޅުވީ، މީގެ ދެތިން ރޭ ކުރިން އާރަށުގައި ފުޓުބޯޅަ ކުޅުއްވަނިކޮށް ލިބުނު އަނިޔާއަކާ ގުޅިގެން އައިޖީއެމްއެޗް ހޮސްޕިޓަލަށް ވަޑައިގެންނެވި ކަމަށެވެ. އެހެންނަމަވެސް، ސޯޝަލް މީޑިއާގައި ފެތުރިފައިވާ ޚަބަރުތަކާ ޚިލާފަށް، އެމަނިކުފާނު ހޮސްޕިޓަލަށް ވަޑައިގެންނެވީ ފާޚާނާއަށް ވެއްޓިވަޑައިގެންނެއް ނޫން ކަމަށް ވެސް ވިދާޅުވިއެވެ.
ރައީސް ވަނީ އެމަނިކުފާނުގެ ޞިއްޙީ ޙާލުކޮޅާއި ގުޅިގެން އިދިކޮޅު ފަރާތްތަކުން ފަތުރަމުންދާ ދޮގު ތަކުގެ ޙަޤީޤަތް ހާމަކުރައްވާފައެވެ.