ބަޣާވާތަކުން ސަރުކާރު ވައްޓާލަން ކުރި މަސައްކަތް ފެއިލް، މިފަހަރު ދޫދިނުމެއް ނެތް!
ބޭންކް އޮފް މޯލްޑިވްސް (ބީއެމްއެލް) ގެ ކުއްލި ނިންމުމަކާއި އެކު މުޅި ޤައުމު ހަލަބޮލިވެގެން ދިޔައީ ކުޑަ ވަގުތުކޮޅެއްގެ ތެރޭގައެވެ. އެ އަލިފާން ގަނޑު ރޯވާނެކަން ކުރީބައިގައި ބަޔަކަށް އެނގިފައި އޮތް ފަދައެވެ. އެ ހާލަތަށް ފާރަވެރިވެ، ބަޔަކު ތިބީ ނުހަނު ހުސިޔާރުކަމާއި އެކުއެވެ. ރޯވެގެންދާނެ ހުޅުކޮޅަށް ދަރުއަޅާ ބޮޑުކުރުމަށް ތައްޔާރުވެގެންނެވެ.
ކޮންމެއަކަސް، އެ ނާތަހުޒީބު އަމަލުގެ ފަސްފަހަތް މިވަނީ ހާމަވެފައެވެ. އަދި ސަރުކާރާއި ދެކޮޅަށް ހިންގަން އުޅުނީ ބަޣާވާތެއްކަންވެސް އެނގިއްޖެއެވެ. އެކަމަށް ބަޔަކު ދުރާލާ ތައްޔާރުވި ކަމަށްވެއެވެ.
މި ކުރި ކަންތައް، ސަލާމަތް ބުއްދި ހުރި ކޮންމެ މީހަކު ވިސްނާލީމާ ހުރިހާ ޑޮޓްތަކެއް ގުޅިގެންދާކަން އެނގޭނެ. މި ކުރި ކަންތައް ވާނީ އެޓެމްޕްޑެޓް ކޫއަކަށް (ބަޣާވާތަކަށް)، އެ ކުރި ބަޔަކު ކުރީ: ސަރުކާރު ހިންގާ ޕާޓީ ޕީއެންސީން ބޭއްވި ޖަލްސާގައި ރައީސް ޑރ. މުޙައްމަދު މުޢިއްޒު ވިދާޅުވިއެވެ.
މިއީ އިދިކޮޅު އެމްޑީޕީ ބަޣާވާތަކުން މި ވެރިކަން ވައްޓާލުމަށް މަސައްކަތް ކުރި ދެވަނަ ފަހަރުކަން ފާހަގަކުރައްވަމުން ރައީސް ވަނީ ބީއެމްއެލްގެ ބޯޑުގައި މިވަގުތު ސަރުކާރުގެ މެޖޯރިޓީ ނެތްކަންވެސް ފާހަގަކުރައްވާފައެވެ. އަދި ރުފިޔާ ކާޑުން ޑޮލަރު ނުކެނޑޭ ގޮތަށް ބީއެމްއެލްއިން ނިންމެވީ އެމަނިކުފާނާއި ދެކޮޅަށް ކަމަށްވެސް ވިދާޅުވިއެވެ.
ވަރަށް މީހުން ސުވާލު އުފެދިދާނެ، ދިވެހިންގެ ބޭންކު، ސަރުކާރުގެ މެޖޯރިޓީ ހިއްސާ އޮންނައިރު، ކިހިނެއްހޭ ތިވީ. އެތާ ތިބީ އަދި ސަރުކާރުގެ ހަތަރު ޑިރެކްޓަރުން. ދެން ތިބި ފަސް މީހުންނަކީ ސަރުކާރު ޑިރެކްޓަރުންނެއް ނޫން. އަޅުގަނޑުމެންގެ ދެ ޑިރެކްޓަރުންގެ ނަން ފޮނުވައިގެން އަދިވެސް އެ ބޭފުޅުންގެ އެ އޮންނަ ޕްރޮސީޖާއެއްގެ ތެރެއިން ދެތިން ހަފުތާ ވާނެ އެ މީހުން އައްޔަންކުރަން. އަދި ޗެއާމަން ވެސް އައްޔަން ނުކޮށް، ނަން ފޮނުވާފައި އޮންނާނީ: ރައީސް ވިދާޅުވިއެވެ.
ރައީސް ތުހުމަތު ކުރައްވާ ގޮތުގައި މިއީ އިދިކޮޅު އެމްޑީޕީއިން އިސްވެ، އޮވެ ހިންގަން މަސައްކަތް ކުރި ބަޣާވާތެކެވެ. އެކަން ހުއްޓުވުމަށް ޓަކައި، ބީއެމްއެލްގެ ބޯޑުގައި ހިމެނޭ ޕްރައިވެޓް ޑިރެކްޓަރުންގެ ތެރެއިން ޗަމްޕާ މުޙައްމަދު މޫސާ (އުއްޗު)އާއި، ޗަމްޕާ ޙުސައިން އަފީފް ވަރަށް ބޮޑު އެހީތެރިކަމެއް ދެއްވިކަން ރައީސް ފާހަގަކުރެއްވިއެވެ. އަދި ކުރެވުނު ބައެއް މަސައްކަތްތައްވެސް ހިއްސާކުރެއްވިއެވެ.
އެ ބޭފުޅުންނާ ރިޕްރެޒެންޓުވާ ޑިރެކްޓަރުންނާ ވާހަކަ ދައްކައިގެން އެ ބޭފުޅުންގެ ސަޕޯޓާއި އަޅުގަނޑުމެންގެ ޑިރެކްޓަރުންގެ ސަޕޯޓާ އެކީގައި ދެން އެ ކުރެވުނު މަސައްކަތުން އިއްޔެ އަޅުގަނޑުމެން ކެބިނެޓުން ހެނދުނުން ފެށިގެން ކުރި މަސައްކަތުން ހަވީރު އެ ނިންމުން ބާތިލް ކުރެވުނީ: ރައީސް ވިދާޅުވިއެވެ.
ޣައިރު ޤާނޫނީ ގޮތަށް ސަރުކާރު ބަދަލު ކުރުމަށް ކުރާ ކޮންމެ މަސައްކަތެއް ހުއްޓުވުމަށް ޤާނޫނު އަސާސީން ލިބިދޭ ފުރިހަމަ ބާރާ އެކީގައި މަސައްކަތް ކުރައްވާނެ ކަމަށް ރައީސް ވިދާޅުވި އެވެ. އަދި އިދިކޮޅު އެމްޑީޕީއިން ގެންނަން މަސައްކަތް ކުރި ބަޣާވާތް ކާމިޔާބު ކުރުމަށްޓަކައި، އަވައްޓެރި ބައެއް ޤައުމުތަކުގައި މިފަހުން ވެރިކަން ވެއްޓިގެން ދިޔަ ގޮތުގެ މިސާލުތައް ނެންގެވިކަންވެސް ރައީސް ފާހަގަކުރެއްވިއެވެ.
އެ މައްސަލަ ފުލުހުން މިހާރު ތަޙުޤީޤު ކުރަން ފަށާފައިވާއިރު، އެ ތަޙުޤީޤުގެ ތެރެއަށް ސަރުކާރުން އެއްވެސް ނުފޫޒެއް ނުފޯރުވާނެ ކަމަށް ރައީސް ވިދާޅުވި އެވެ. އަދި، ތަޙުޤީޤަށް ލިބެމުންދާ ކުރިއެރުން ވަގުތުން ވަގުތަށް އާންމުންނާ ހިއްސާ ކުރަމުން ފުލުހުން ގެންދާނެ ކަމަށްވެސް ރައީސް މުޢިއްޒު ވިދާޅުވި އެވެ.
މިނިވަން ކަމާ އެކީގައި މިކަން ބަލައި ހުކުމެއް މީހަކަށް އައިސްފިއްޔާ ތަންފީޒު ކުރުމުގައި ފަހަތަކަށް ނުޖެހޭނަން، އެއީ ޢަދުލުވެރިވުމަކީ: ރައީސް މުޢިއްޒު ވިދާޅުވި އެވެ.
ބީއެމްއެލް ގެ ރުފިޔާ އެކައުންޓުތަކަށް ދޫކޮށްފައިވާ ޑެބިޓް ކާޑްތަކާއި ކްރެޑިޓް ކާޑުތަކުން ރާއްޖެއިން ބޭރުގެ މުއާމަލާތް ނުކުރެވޭ ގޮތަށް އެ ބޭންކުން އިއުލާން ކުރުމާ އެކު، ސަރުކާރު ވައްޓާލަން އިދިކޮޅު ފަރާތްތަކުން ގޮވާލި މައްސަލައިގައި ފިޔަވަޅު އަޅަންޖެހޭ މީހުން ދެނެގަތުމުގެ މަސައްކަތް ކުރަމުންދާ ކަމަށް މިއަދު ފުލުހުން ބުނެފިއެވެ.
ފުލުހުން އޮގަސްޓް 26 ވަނަ ދުވަހުގެ ރޭ ނެރުނު ބަޔާނެއްގައި ވިދާޅުވީ ސަރުކާރުގެ މައި ހިއްސާ އޮންނަ ބޭންކަކުން ސަރުކާރުގެ މަޝްވަރާއާ ޚިލާފަށް ދިވެހި ގިނަ ރައްޔިތުންނަށް ކުއްލި ސިހުމެއް ލިބޭ ފަދަ ނިންމުމެއް ނިންމި ވަގުތާ ދިމާކޮށް ސިޔާސީ ފަރާތްތަކުން ސަރުކާރުގެ މާލީ ހާލަތާ ގުޅޭ ގޮތުން ނޫސްވެރިންގެ ބައްދަލުވުމެއް ބާއްވައި ހަމަ އެވަގުތު މީސް މީޑިއާގެ އެތައް ސަތޭކަ ބޮޓް އެކައުންޓުތައް ބޭނުންކޮށްގެން ސަރުކާރު ވައްޓާލަން މަގުތަކަށް ނުކުތުމަށާއި އާންމު ހަމަޖެހުން ނަގާލުމަށް ގޮވައި ޤައުމުގެ މަސްލަހަތު ނަގާލުމަށް ހިތްވަރުދީފައިވާ ކަމަށެވެ.
ފުލުހުން އެ އިޝާރާތް ކުރީ، ކުރީގެ ފިނޭންސް މިނިސްޓަރު އިބްރާހިމް އަމީރު އިސްވެ ހުންނަވައި ރާއްޖޭގެ އިޤްތިޞާދީ ޙާލަތާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމަށް އިޝާރާތްކޮށެވެ.
ބާރުގެ ބޭނުންކޮށްގެން ސަރުކާރު ވައްޓާލުމަށް ހިތްވަރު ދޭ މީހާއާއި، އެއިން ކަމަކަށް އެހީތެރިވެދޭ މީހާއާއި، އެއިން ކަމެއް ކުރާ މީހާ، އެކުރީ ކުށެއް ކަމަށް ދިވެހިރާއްޖޭގެ ޤާނޫނުލްޢުޤޫބާތު 610 ވަނަ މާއްދާގައި ކަނޑައަޅާފައި ވެއެވެ.