ސިނަމާލެ ބްރިޖް މަޝްރޫޢުގެ ތަފްސީލް އޮޅުވާ ނުލައްވާ: އަކުރުން އަކުރަށް ރައީސް ހިއްސާކުރެއްވީ މަޝްރޫޢު ހިނގާދިޔަގޮތް!

ހުޅުލެއާއި، ހުޅުމާލެ އާއި މާލެއާއި ދެމެދުގައިވާ ގަދަ ކަނޑުގައި ކުރި ދަތުރުތަކަށް ލުޔެއް ލިބިގެން ދާނެ ދުވަހެއް ފެންނާނެ ކަމަށް ގިނަ ދިވެހީން އުންމީދު ނުކުރެއެވެ. އެއީ ބްރިޖެއް އެޅުމުގެ ވާހަކައަކީ ކުރީގެ ރައީސް މުޙައްމަދު އަމީންގެ ޒަމާނުއްސުރެ ދެކެވެމުން އަންނަ ވާހަކައެއް ކަމުގައި ވާތީއެވެ. އެހެންވެ ސިނަމާލެ ބްރިޖުގެ ތަސައްވަރަށް އެތަކެއް ސިޔާސީން ހަޖޫޖެހިއެވެ. ނަމަވެސް އެ ފާޑުކިޔުންތަކަށް ޕީޕީއެމްގެ ފުރަތަމަ ސަރުކާރުން ރައްދުދިނީ ބަހާއި އަމަލުންނެވެ. އެ ހުވަފެން ހަޤީގަތަށް ހެދުމުގައި އެންމެ އިސް ދައުރެއް އަދާކުރެއްވި އެއް ބޭފުޅަކީ މިއަދުގެ ރައީސުލްޖުމްހޫރިއްޔާ ޑރ. މުއްޙަމަދު މުޢިއްޒުކަން ގައިމެވެ.

އޭރު އެމަނިކުފާނު ހުންނެވީ ހައުސިން މިނިސްޓަރު ކަމުގައެވެ. ރާއްޖޭގައި މިހާތަނަށް ހިންގުނު އެންމެ ބޮޑު އެއް މަޝްރޫޢު ކަމުގައިވާ ސިނަމާލެ ބްރިޖްގެ މަޝްރޫޢު ހިންގެވުމުގައެވެ. ލިބިފައިވާ ތަޢުލީމުގެ އަލީގައި، މަޝްރޫޢު ކާމިޔާބުކުރުމަށް އަމަލީ މައިދާނުގައި ގިނަ މަސައްކަތްތަކެއް ކުރެއްވިއެވެ. ފަރުދާގެ ފަހަތުގައި ހުންނަވާ ކުރެއްވި އެ މަސައްކަތްތައް، ސިނަމާލެ ބްރިޖަށް ހަ އަހަރު ފުރުމުގެ މުނާސަބާގައި ރައީސް ހިއްސާކުރެއްވިއެވެ.

ސަންގު ޓީވީ އަށް ދެއްވި ޚާއްޞަ އިންޓަވިއުއެއްގައި ރައީސް ޑރ. މުޢިއްޒު ވިދާޅުވީ ސިނަމާލެ ބްރިޖް މަޝްރޫޢުގެ ލަނޑުދަނޑިތައް ހާސިލްކުރުމަށް ކުރެވިފައިވާ ހުރިހާ މަސައްކަތެއްގައި އެމަނިކުފާނަށް ބައިވެރިވެވަޑައިގެނެވިފައިވާ ކަމަށެވެ. އެގޮތުން އެ މަޝްރޫޢުގެ މަސައްކަތްތަކަށް ޚާއްޞަ ޔުނިޓެއް މިނިސްޓްރީގައި އޭރު އުފެއްދެވި ކަމަށާއި، އެ މަސައްކަތް ކައިރިން ބަލަހެއްޓުމަށް ކޮންސަލްޓަންޓެއް ހަމަޖެއްސި ކަން ފާހަގަކުރެއްވިއެވެ.

އަޅުގަނޑު ކޮންމެ ހަފްތާއަކު އެއް ފަހަރު ކަހަލަ ގޮތަކަށް މި ޕްރޮޖެކްޓް އިމްޕްލިމެންޓޭޝަން ޔުނިޓާ ބައްދަލުކުރަން، އަދި ސައިޓަށް ގޮސް ޕްރޮޖެކްޓްގެ މެނޭޖަރާ އެކީގައި އުޅުނިން، ޕްރޮޖެކްޓް މެނޭޖަރު އަޅުގަނޑަށް ކިޔައި ދެއްވާނެ، ދެ ހަފްތާ އިން އެއް ފަހަރު މަދުވެގެން، ބައެއް ފަހަރު ހަފްތާއަކު އެއް ފަހަރު ދަން، މަހަކު އެއް ފަހަރު ބްރިޖުގެ އަމަލީ މަސައްކަތްދާ ގޮތް ބަލަން :  ސިވިލް އިންޖިނިއަރިންގެ ދާއިރާ އިން ތައުލީމް ހާސިލް ކުރައްވާފައިވާ ރައީސް ޑރ. މުޢިއްޒު ވިދާޅުވިއެވެ.

ރައީސް ހިއްސާކުރެއްވި ގޮތުގައި ސިނަމާލެ ބްރިޖް މަޝްރޫޢުގެ ޕްރީ ފީސިބިލިޓީ ސްޓޭޖާއި ފީސިބިލިޓީ ސްޓޭޖާއި ކޮންސެޕްޓް ޑިޒައިނިން އާއި ޑީޓެއިލް ޑިޒައިންގެ ހުރިހާ މަރުހަލާއެއް ދިޔައީ އެމަނިކުފާނުގެ ބެއްލެވުމުގެ ދަށުން ނެވެ.

ބްރިޖުގެ ސުޕަ ސްޓްރަކްޗާ ހަދާފައި މާލެ ގެނައުމުގެ ކުރިން އެބޭފުޅުން ރިކުއެސްޓް ކުރެއްވީ އަޅުގަނޑު އެ ފެކްޓަރީއަށް ގޮސް ބަލާލަން. އޭރު އެބޭފުޅުން އެންމެ ފަހުން ކޯޓިން ނުލާ ހުރީ. އެހެން ހުރި މުހިންމު ކަންކަމުގައި އަމަލީ ގޮތުން ބައިވެރިވުމުގެ ފުރުސަތު ލިބުނު: ސިނަމާލެ ބްރިޖްގެ މަޝްރޫޢުއާ ގުޅޭ ތިން ބައްދަލުވުމަކަށް ޗައިނާއަށް ވަޑައިގެންނެވި ކަމާއި، އެ މަޝްރޫޢުގެ ޓެކްނިކަލް ބައެއް މަސައްކަތްތަކުގައި ބައިވެރިވުމުގެ ފުރުސަތު ލިބިގެން ގޮސްފައިވާކަން ފާހަގަކުރައްވާ ރައީސް މުޢިއްޒު ވިދާޅުވި އެވެ.

ބްރިޖް މަޝްރޫޢުއަށް ހަޖޫޖެހި އިދިކޮޅު ފަރާތްތަކުން އޭރުވެސް ދިޔައީ އެކިކަލަ ދޮގު ވާހަކަތައް ދައްކަމުންނެވެ. އަދި ބްރިޖްގެ ލޭނެއް މަދު ކަމަށާއި، ރައީސް މުޢިއްޒުގެ ބަހާއި ޢަމަލު ދިމާނުވާ ވާހަކަތައް ދެއްކިއެވެ.

"ދެކޮޅަށް ހަތަރު ފުރޮޅުލީ ވެހިކަލް ދުއްވާ ދެ ލޭނާއި މޮޓޯބައިކް ސައިކަލް ދުއްވާ ދެ ލޭނު އަދި ބައިސިކަލް ދުއްވާނެ ލޭނަކާއި ހިނގާފައި ބްރިޖް ހުރަސް ކުރާން ބޭނުންވާ ފަރާތްތަކަށް ލޭނެއް ވެސް ހިމެނިފައިވާނެ" ރައީސް މުޢިއްޒު

ކޮންމެ ކޮޅަކަށް ހަތަރު ފުރޮޅުލީ އުޅަނދު ދުއްވަން ދެ ލޭނު އިންނަ ވާހަކައެއް އެންމެ ފަހަރަކުވެސް ރައީސް މުޢިއްޒު ވިދާޅުވެފައިނުވެއެވެ. ރައީސް ވިދާޅުވީ ދެކޮޅަށް، އެއީ މާލެއިން ހުޅުލެއަށް ހަތަރުފުރޮޅުލީ އުޅަނދު ދާނެ ލޭނަކާއި، ހުޅުލެއިން މާލެއަށް ހަތަރުފުރޮޅުލީ އުޅަނދު ދާނެ ލޭނެއް، ކަމާއި މުޅިއެކު ދެ ލޭނު އޮންނާނެ ވާހަކަ އެވެ. ސައިކަލް ކޮންމެ ކޮޅަކަށް ދުއްވާނެ ލޭނެއް އޮތްއިރު، ކުރިން ބައިސްކަލް ދުއްވަން ނިންމި ލޭނު ފަހުން ބޭނުންކުރަން ނިންމީ ހިނގާ މީހުންނަށާއި ޖޮގިންކުރާ މީހުންނަށެވެ. ބްރިޖް މަޝްރޫޢު ގެންދަން ނިންމާފައިވާ ޑިޒައިންވެސް އޭރުގެ ސަރުކާރުން ވަނީ ރައީސް އޮފީހުގެ ރަސްމީ ޔޫޓިއުބް ޗެނަލްގައި ހިއްސާކޮށްފައެވެ.

ކުރީގެ ނައިބު ރައީސް އަހުމަދު އަދީބުގެ ވާހަކާގައިވެސް ވިދާޅުވީ ސައިޑްގައި އޮތް ލޭނުގައި ބައިސްކަލް ދުއްވާ ޖޮގިންވެސް ކުރެވޭނެ ކަމަށެވެ. އެހެންކަމުން ސިނަމާލެ ބްރިޖާއި ގުޅޭގޮތުން ރައީސް ޑރ. މުޢިއްޒު ދެއްކެވި ވާހަކަ އެއްވެސް އޮޅުވާލުމެއްނެތި އަކުރުން އަކުރަށް ދިމާވެއެވެ. ރައްޔިތުންނަށް ފަހުމްވާނެ ވަރަށް ތަފްސީލު ކޮށްދެއްވިއެވެ.

ކޮންމެއަކަސް ދިވެހިންގެ އުއްމީދުތަކާ ގުޅިފައިވާ ރާއްޖޭގައި ހިންގި އެންމެ ބޮޑު އުމްރާނީ ތަރައްގީގެ މި މަޝްރޫޢަށް މިހާރު މިވަނީ ހަ އަހަރުވެފައެވެ. ރައީސް މުޢިއްޒުގެ މޭސްތިރިކަމުގެ ދަށުން، އެ މަޝްރޫޢު ކާމިޔާބުކޮށް ފުރިހަމަ ކުރީ ތިން އަހަރާއި 11 މަސް ތެރޭގައެވެ. ބްރިޖު ރަސްމީކޮށް ހުޅުވީ 2018 ވަނަ އަހަރު އޯގަސްޓް މަހުގެ 30 ވަނަ ދުވަހުއެވެ.

"ސިނަމާލެ ބްރިޖް" ހުޅުވުމުގެ ތާރީޚީ ރަސްމިއްޔާތުގައި ވާހަކަފުޅުދައްކަވަމުން ރައީސް މުއިއްޒު، ހައުސިން މިނިސްޓަރުކަމުގައި ހުންނަވާ ވިދާޅުވި ބަސްކޮޅެއް ވެއެވެ. ވަރަށް ހިކުމަތްތެރި ފުން މާނަތަކެއް އެކުލެވިގެންވާ ނަސޭހަތުގެ ބަސްފުޅެކެވެ.  

އެއީ އަޅުގަނޑުމެންގެ ދޭދޭ ގުޅުން ބަދަހި ކުރުމުގެ ބްރިޖް. އެއް މުސްލިމް އަޚަކާއި އަނެއް މުސްލިމްއަޚެއް އުޚުތެއްގެ ދެމެދުގައި އޮންނަންވީ އަޚްވަންތަ ކަމުގެ ބްރިޖް. ވެރިންނާއި ރައްޔިތުންނާއި ކޮންމެ ދެމީހެއްގެ ދެމެދުގައި އޮންނަންވީ އިންސާނީ ވަންތަ އޯގާވެރިކަމުގެ ބްރިޖް. އިޙްތިރާމްކުރުމާއި ކަމޭހިތުމުގެ ރީތިސިފަ. އަޅުގަނޑުހިތުން މިއީ މިއަދު އަޅުގަނޑުމެން ކޮންމެ ދިވެއްސަކު ފަރުދީ ފެންވަރުގައި އެމީހަކު އަމިއްލައަށް ޤާއިމްކުރަންވީ ބްރިޖްތަކެއް: ރައީސް ޑރ. މުޢިއްޒު

ޒަމާނުންސުރެ ދިވެހިންގެ މެދުގައިއޮތް އަޚްވަންތަކަމާއި އެއްބަނޑުއެއްބަފާކަމާއި ޢާއިލީ ގުޅުންތައް ހީނަރުވަމުން އަންނަކަމުގެ މައްޗަށް  އަލިއަޅުވާލާ، އެ މުހިންމު މުނާސަބާގައި އެމަނިކުފާނު މިފަދައިން ވިދާޅުވެފައި ވެއެވެ. އޭރުވެސް އެމަނިކުފާނުގެ ފަރާތުން ފާހަގަވެގެން ދިޔައީ ދީނަށް ދޭ ސަމާލުކަމެވެ.

ބްރިޖަށް ހަ އަހަރު ފުރުން ފާހަގަކުރައްވައި ޗައިނާގެ ސަފީރު ވާން ލިޝިން ވިދާޅުވީ ސިނަމާލެ ބުރިޖުން ދިވެހިންގެ ދިރިއުޅުމަށް ހެޔޮ ބަދަލާއި، އިޖުތިމާޢީ އަދި އިޤްތިޞާދީ ތަރައްޤީ ގެނެސްދީފައިވާ ކަމަށެވެ. ދިވެހިރާއްޖެއާ ޗައިނާއާ ދެމެދު ސިޔާސީ ގުޅުން ގާއިމުކުރީ 1972 ވަނަ އަހަރުގެ އޮކްޓޫބަރު މަހުގެ 14 ވަނަ ދުވަހުއެވެ.