"މަތީ އަރުތަވެރިންގެ އިނާމު" ދިނުމުގެ ރަސްމިއްޔާތު ވަރަށް ޚާއްޞަ: މިއީ މި ރަސްމިއްޔާތުގެ 3 ދަންފަޅިވެސް ރައީސުލްޖުމްހޫރިއްޔާ ޝަރަފްވެރިކޮށްދެއްވި ފުރަތަމަ ފަހަރު!

މަތީ ޘާނަވީއާއި، ޘާނަވީ އިމްތިޙާނުތަކުން އެންމެ މަތީ ނަތީޖާ ހޯދި ދަރިވަރުންގެ އަގު ވަޒަންކޮށް އިނާމު ދިނުމަށް މިއަހަރު ކުރިއަށްގެންދިޔަ "މަތީ އަރުތަވެރިންގެ އިނާމު" ދިނުމުގެ ރަސްމިއްޔާތު ވަރަށް ޚާއްޞައެވެ.

މިރަސްމިއްޔާތު ޚާއްޞަވާ މައިގަނޑު ސަބަބަކީ މިއީ މި ރަސްމިއްޔާތުގެ 3 ދަންފަޅިވެސް (ހެނދުނު، މެންދުރުފަސް، ރޭގަނޑުގެ ދަންފަޅިވެސް) ދިވެހިރާއްޖޭގެ ރައީސުލްޖުމްހޫރިއްޔާ ޝަރަފްވެރިކޮށްދެއްވި ފުރަތަމަ ފަހަރެވެ.

"މަތީ އަރުތަވެރިންގެ އިނާމު" ދިނުމުގެ ރަސްމިއްޔާތުގެ ފުރަތަމަ ދަންފަޅި ރައީސް ޝަރަފުވެރި ކޮށްދެއްވުން.

މިފަހަރު އިނާމު ލިބޭ 441 ދަރިވަރުންނަށް ޤައުމީ ފެންވަރުގައި ޝަރަފްދިނުމަށް 12 ސެޕްޓެމްބަރު ވީ ބުރާސްފަތި ދުވަހުގެ ހެނދުނުން ފެށިގެން ރޭގަނޑާއި ހަމަޔަށް ކުރިއަށްދިޔަ 3 ރަސްމިއްޔާތުގައިވެސް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ބައިވެރިވެވަޑައިގަތުމަކީ، ތަޢުލީމަށް އަދި ޒުވާން ދަރިވަރުންގެ ކުރިއެރުމަށާއި ފާގަތިކަމަށް އެމަނިކުފާނު ދެއްވާ އަހައްމިއްޔަތުގެ ހެއްކެކެވެ.

"މަތީ އަރުތަވެރިންގެ އިނާމު" ދިނުމުގެ ރަސްމިއްޔާތުގެ ދެވަނަ ދަންފަޅި ރައީސް ޝަރަފުވެރި ކޮށްދެއްވުން.

މަތީ އަރތަވެރިންނަށް އިނާމު ދިނުމަށް ދަރުބާރުގޭގައި ބޭއްވި މި ރަސްމިޔާތުގެ ތިންވަނަ ދަންފަޅީގައި ރައީސުލްޖުމްހޫރިއްޔާގެ އަރިހުގައި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދުވެސް ބައިވެރިވެވަޑައިގެންނެވިއެވެ.

"މަތީ އަރުތަވެރިންގެ އިނާމު" ދިނުމުގެ ރަސްމިއްޔާތުގެ ތިންވަނަ ދަންފަޅި ރައީސް ޝަރަފުވެރި ކޮށްދެއްވުން.

ފާހަގަކޮށްލެވޭ ގޮތުގައި މީގެ ކުރީގެ އަހަރުތަކުގައި މި ރަސްމިއްޔާތު ބާއްވަމުން އަައީ، ސަރުކާރުގެ ނުވަތަ އަމިއްލަ ބޮޑެތި ކުންފުނިތަކުން ސްޕޮންސަރކޮށްގެންނެވެ. އަދި ދަރިވަރުންނަށްވެސް ސްޕޮންސަރުންގެ އަތުން އިނާމު ހޯދައިގެންނެވެ.

އެހެން ނަމަވެސް މިއަހަރުގެ ރަސްމިއްޔާތަކީ ސީދާ ދަަޢުލަތުގެ ބަޖެޓުން ހޭދަކޮށްގެން ވަރަށް ރަނގަޅު ފެންވަރުގައި ކުރިއަށްދާ ރަސްމިއްޔާތެއްގެ ގޮތުގައި ރައީސް ޑރ. މުޢިއްޒު ވަނީ ހަމަޖައްސަވާފައެވެ.

އަދި ވަނަތަކަށް ހޮވި އިނާމު ލިބޭ ދަރިވަރުންނަށްވެސް، ސީދާ ސަރުކާރުގެ ފަރާތުން ރަނގަޅު ފެންވަރުގެ އަދި ދަރިވަރުންނަށް ބޭނުންވާނެ އިނާމުދެއްވުމަށް ރައީސް ޑރ ،.މުޢިއްޒު ވަނީ ހަމަޖައްސަވާފައެވެ.

މި ރަސްމިއްޔާތުގައި، މަތީ ޘާނަވީ ތަޢުލީމު ނިންމާ އިމްތިހާނުތަކުން މުޅި ދުނިޔެއިން 1 ވަނަ އަދި ޤައުމީ ގަދަ 10ގެ 1 ވަނަ ނަތީޖާ ހޯދި ދަރިވަރުންނަށް ޓްރޮފީ އާއި ހަނދާނީ ލިޔުން ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

ތަޢުލީމުގެ ފުރުޞަތު ފަހިކޮށްދީ، ކޮންމެ ދަރިވަރަކަށް އިސްލާމްދީނާ، ރިވެތި އަޚްލާޤާ، ޤަައުމިއްޔަތު އުނގަންނައިދީ، ހަރުދަނާ ދިވެހި ޖީލެއް ބިނާކުރަން ރައީސް ޑރ. މުޢިިއްޒު ދަނީ މަސައްކަތަޕުޅު ކުރައްވަމުންނެވެ.