މިނިވަން ވިޔަފާރީގެ އެއްބަސްވުމާއެކު ޗައިނާ-ރާއްޖެ ވިޔަފާރި 1 ބިލިޔަން ޑޮލަރަށް އަރާނެ!

ޗައިނާއާއި ރާއްޖެއާއި ދެމެދު ޢަމަލުކުރަން ފަށާ، މިނިވަން ވިޔަފާރީގެ އެއްބަސްވުމުގެ ސަަބަބުން ދެ ޤައުމު ދެމެދު ކުރެވޭ ވިޔަފާރީގެ އަގު 1 ބިލިޔަން ޑޮލަރަށް އަރާނެކަމަށް ސަރުކާރުން ހާމަކޮށްފިއެވެ.

ސަރުކާރުން މިފަދައިން ހާމަކުރައްވާފައިވަނީ މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ޗީފް ސްޕޯކްސްޕާސަން ހީނާ ވަލީދު އެވެ.

ސަރުކާރުގެ ތަރުޖަމާނު ހީނާ ވިދާޅުވީ ރާއްޖެއާއި ޗައިނާ ދެމެދު އިޤްތިޞާދީ އެއްބާރުލުން އިތުރުކުރުމަށް ގިނަ މަސައްކަތްތަކެއް ކުރެވެމުންދާކަމަށެވެ. އެގޮތުން މިދިޔަ ހަފްތާގައި، ޗައިނާއާއެކު ކަރަންސީ ސެޓަލްމެންޓް އެއްބަސްވުމެއްގައި ސޮއިކުރެވިފައިވާކަން ފާހަގަކުރެއްވިއެވެ.

މިއާއިއެކު ހީނާ ވިދާޅުވީ، މި އެއްބަސްވުމުގެ ދަށުން ރާއްޖެއަށް ގިނަ ފައިދާތަކެއް ކުރާނެކަމަށާއި އެގޮތުން އެ ޤައުމަށް ދަތުރުކުރާ ދިވެހިން އެކި ޚިދުމަތްތައް ހޯދުމުގައާއި ވިޔަފާރިކުރުމުގައިވެސް ފައިދާތަކެއްކުރާނެ ކަމަށެވެ.

ޗައިނާއާއެކު ސޮއިކޮށްފައިވާ މިނިވަން ވިޔަފާރީގެ އެއްބަސްވުމަށް ޢަމަލުކުރަން މިމަހު ފަށާނެ ކަމަށް ސަރުކާރުން ވަނީ ބުނެފައެވެ.

މިހާރުވެސް ދިވެހި ރާއްޖެއާއި ޗައިނާއާއި ދެމެދު 700 މިލިއަން ރުފިޔާގެ ވިޔަފާރި އެބަކުރެވޭ. އެހެން ނަމަވެސް ދިވެހިރާއްޖެއާއި ޗައިނާއާއި ދެމެދު ކުރެވޭ އެފްޓީއޭއާއި އެކީގައި، ޢަމަލު ކުރަން ފެށުމާއިއެކު މި އަދަދު 1 ބިލިޔަން ޑޮލަރަށް އަރާނެ: ޗީފް ސްޕޯކްސްޕާސަން ހީނާ ވަލީދު

މީގެއިތުރުން ދިވެހި ސަރުކާރާއި ޗައިނާގެ ޕީޕަލްސް ބޭންކް، ޕީބީއޯސީއާ ދެމެދު، ކަރަންޓް އެކައުންޓް މުޢާމަލާތްތައް ދެ ޤައުމުގެ ފައިސާއިން ހިންގުމަށް މަގުފަހިކޮށްދިނުމަށް ފަހުމުނާމާއެއްގައި މިދިޔަ ހަފްތާގައި ވަނީ ސޮއިކޮށްފައެވެ.

ސަރުކާރުން ބުނީ މި އެއްބަސްވުމުގެ ސަބަބުން ދެ ޤައުމުގެ ފައިސާއިން މުޢާމަލާތްތައް ކުރުމަށާއި، ދިވެހި ވިޔަފާރިވެރިންނަށް ޗައިނާއިން އިމްޕޯޓްކުރުމަށް ފަސޭހަވެ ދެ ޤައުމުގެމެދުގައި ބޯޑަރު ހުރަސްކޮށް ކުރެވޭ އިންވެސްޓްމަންޓްތައް އިތުރުވެގެން ދާނެކަމަށެވެ.