ކުދި ޖަޒީރާ ޤައުމުތަކުގެ ދަރަނި ދެއްކުމަށް ދެމެހެއްޓެނިވި ހައްލުތަކެއް ހޯދައިދިނުމަށް ރައީސުލްޖުމްހޫރިއްޔާ ގޮވާލައްވައިފި
ކުދި ޖަޒީރާ ޤައުމުތަކުގެ ދަރަނި ދެއްކުމަށް ދެމެހެއްޓެނިވި ހައްލުތަކެއް ހޯދައިދިނުމަށް ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.ރައީސް ޑރ. މުޢިއްޒު މިކަމަށް ގޮވާލެއްވީ އދ. ގެ އާއްމު މަޖިލީހުގެ ބައްދަލުވުމުގެ ކުރިން ކުރިއަށްދާ ސަމިޓް އޮފް ދަ ފިއުޗަރގެ ހަވާސާގެ ތެރެއިން ބޭއްވި ސިޑްސްގެ ބައްދަލުވުމުގައެވެ. މި ބައްދަލުވުމަކީ ކުދި ޖަޒީރާ ޤައުމުތަކުގެ މާލީ ހާލަތާއި އެކަމުގައި ކުރެވޭނެ ކަންކަމާމެދު މަޝްވަރާ ކުރުމަށް ބޭއްވި ބައްދަލުވުމެކެވެ.
ރައީސް ވިދާޅުވީ ސިޑްސްގެ ޤައުމުތަކުގެ އިޤްތިޞާދުތައް ބަރޯސާވެފައިވަނީ މަދު ސިނާޢަތްތަކެއްގެ މައްޗަށް ކަމަށާއި، އެހެންކަމުން އިޤްތިޞާދު ސިންދަފާތުކުރުމަށް ގިނަ މަސައްކަތްތަކެއް ކުރަންޖެހޭކަމަށެވެ.
އިޤްތިޞާދު ސިންދަފާތުކުރުމަކީ ހަމައެކަނި ހާސިލުކުރަން އޮތް އަމާޒެއް ނޫންކަމަށާއި، އެއީ ސިޑްސްގެ ދެމިއޮތުމަށް ކޮންމެހެން ކުރަންޖެހޭ މުހިންމު ކަމެއް ކަން ރައީސް ފާހަގަކުރެއްވިއެވެ. މިއާއިއެކު ރައީސް ވިދާޅުވީ އިޤްތިޞާދު ސިންދަފާތު ކުރެވޭނީ ޤައުމުތަކުގެ އުފެއްދުންތެރިކަން އިތުރުކޮށްގެންކަމަށެވެ.
ކުދި ޖަޒީރާ ޤައުމުތަކުގެ އިޤްތިޞާދު ސިންދަފާތުކުރުމަށް މާލީ އެހީ ބޭނުންވާކަން ފާހަގަކުރައްވާ ރައީސް ވިދާޅުވީ ކުދި ޖަޒީރާ ޤައުމުތަކަށް މާލީގޮތުން މިހާރު ކުރިމަތިވެފައިވާ ބުރަތައް ލުއިކޮށްދީ، ދަރަނި ދެއްކުމަށް ދެމެހެއްޓެނިވި ހައްލުތަކެއް ހޯދައިދޭން މަސައްކަތްކުރަން ޖެހޭކަމަށެވެ.
މީގެއިތުރުން ރައީސް ވިދާޅުވީ ކުދި ޖަޒީރާ ޤައުމުތަކަކީ މާލީގޮތުން ފުދުންތެރި، އިޤްތިޞާދީގޮތުން ކުރިއަރާފައިވާ އަދި ވިލުންތެރި ޤައުމުތަކަކަށް ހަދަންޖެހޭ ކަމަށެވެ. އަދި އެ ބަދަލު ގެނައުމަށް މުޖްތަމަޢުގެ ބާރުވެރިކަން އިތުރުކޮށް، މުއައްސަސާތައް ހަރުދަނާކޮށް، އުފެއްދުންތެރިކަން އިތުރުކުރަންޖެހޭކަމަށް ރައީސް ޑރ. މުޢިއްޒު ވިދާޅުވިއެވެ.ރައީސް ޑރ .މުޢިއްޒު އެމެރިކާގެ ނިއުޔޯކަށް ވަޑައިގަތީ އދ.ގެ އާންމު މަޖިލީހުގެ 79 ވަނަ ބައްދަލުވުމުގައި ބައިވެރިވެވަޑައިގަތުމަށެވެ. 79 ވަނަ ބައްދަލުވުމުގައި ރައީސް ޑރ. މުޢިއްޒު ތަޤުރީރުކުރެއްވުމަށް ހަމަޖެހިފައިވަނީ މިމަހުގެ 24 ވާ އަންގާރަ ދުވަހުގައެވެ. ރައީސުލްޖުމްހޫރިއްޔާގެ މިދަތުރުފުޅުގެ ތެރެއިން "ސަމިޓް އޮފް ދަ ފިއުޗަރ"ގައި ބައިވެރިވެވަޑައިގަންނަވާ އެ ސަމިޓުގެ މުހިންމު މަޝްވަރާތަކުގެ ރިޔާސަތުވެސް އެމަނިކުފާނު ބެލެހެއްޓެވުމަށްވަނީ ހަމަޖެހިފައެވެ.
މިދަތުރުފުޅުގެ ތެރެއިން ރައީސުލްޖުމްހޫރިއްޔާ އދ.ގެ ސެކިއުރިޓީ ކައުންސިލްގައި ހުޅުވާލާފައިވާ ބަހުޘްގައި ތަޤުރީރުކުރައްވާނެއެވެ. މިއީ ރާއްޖޭގެ ރައީސަކު އދ.ގެ ސެކިއުރިޓީ ކައުންސިލްގައި ތަޤުރީރުކުރައްވާ ފުރަތަމަ ފަހަރުކަން ފާހަގަކޮށްލެވެއެވެ.