ބަންކަރިންގ މިއީ ކިހިނެއް ވާކަމެއްކަން އެނގޭތަ؟

ބަންކަރިންގ؟ މިއީ ކިހިނެއް ވާކަމެއް؟

މި ސަރުކާރުގެ އަމާޒަކަށްވީ އިޤްތިސާދު ސިންތަފާތުކޮށް ދަޢުލަތަށް ލިބޭ އާންމުދަނީ އިތުރުކުރުމެވެ. މިހާރު ރާއްޖޭގެ ޖީޑީޕީއަކީ 6.5 ބިލިއަން އެމެރިކާ ޑޮލަރުއެވެ. ނަމަވެސް ބަންކަރިންގެ ޚިދުމަތާއި އެކު ދަޢުލަތުގެ ރައުސުލްމާލަށް 400 މިލިއަން ޑޮލަރު ވަންނާނެ ކަމުގެ އުންމީދު އެބައޮތެވެ. 

ފުރަތަމަ އަހަރު ނިމޭއިރުވެސް، ފުރަތަމަ 12 މަސް ނިމޭއިރުގައިވެސް ޖީ.ޑީ.ޕީ. އަށް އިތުރުކޮށްދޭނެ އިރާދަކުރެއްވިއްޔާ، އިތުރަށް 400 މިލިއަން ޑޮލަރު، އެއް އަހަރުގެ ތެރޭގައި. އޭރުން ދަރަނި އެބަ ކުޑަވެގެންދޭ. ޑެބްޓް ޖީ.ޑީ.ޕީ. ދަށްވޭ އެބަ. ދަރަނި ދަށްވޭ އެބަ. އޭގެއިތުރަށްވެސް ގިނަ ފައިދާތައް އެބަ ކުރޭ. ބިޒްނަސް ޕްރޮފިޓް ޓެކްސް، ބީ.ޕީ.ޓީ. އިން ލިބޭ ފައިދާ އެބަ ލިބޭ. ވަޒީފާތައް އެބަ އުފެދޭ. އުތުރުގައި، މިކަން ކުރާ ސަރަޙައްދުގައި ޚާއްޞަކޮށް އުފެދޭނެ: މިނިވަން ދުވަހުގެ ޖަލްސާގައި ރައީސް ޑރ. މުޢިއްޒު ވިދާޅުވިއެވެ.

ބަންކަރިންގެ ޚިދުމަތަކީ ކޮބާ؟

ބަންކަރިންގ ޚިދުމަތަކީ ކަނޑު ބޯޓުތަކާއި އުޅަނދުތަކަށް ތެޔޮ ފޯރުކޮށްދިނުމެވެ. ބޯޓް ފަހަރު އާއްމުކޮށް ދަތުރުކުރާ ސަރަޙައްދުތަކުގައި އެފަދަ ޚިދުމަތެއް ފެށިއްޖެނަމަ ބޯޓް ފަހަރު އެތަންތަނަށް މަޑުކޮށް ތެޔޮ އަޅައިހަދައެވެ. އަދި އެ ނޫންވެސް ޚިދުމަތްތައް ހޯދައެވެ. އޭގެތެރޭގައި މުދަލާއި ބޯ ފެން ސަޕްލައި ކުރުމާއި، މެއިންޓައިނެންސްގެ މަސައްކަތްތަކާއި، ކަނޑުމަގުން ގެންނަ މުދާތައް ވައިގެ މަގުން ކާގޯ ކުރުމުގެ ވިޔަފާރީގެ އިތުރުން ފަތުރުވެރިކަންވެސް ހިމެނެއެވެ.

އިހަވަންދިއްޕޮޅުގައި އޮފްޝޯ ބަންކަރިންގެ ޚިދުމަތް ދޭނީ އެމްޕީއެލުންނެވެ. އެ ވިޔަފާރީގެ ދަށުން ބޯޓްތަކަށް ބޭނުންވާ ތެޔޮ ފޯރުކޮށްދިނުމުގެ މަސައްކަތް ކުރާނީ އެސްޓީއޯއިންނެވެ. އެ ޚިދުމަތްދެނީ ދުނިޔޭގެ މުދާ އުފުލާ އަދި ޝިފިންގ މަސައްކަތްތައް ކުރަމުންދާ މަޝްހޫރު ކުންފުންޏެއްކަމަށްވާ ވިޓޯލް ބަންކާސްއާ ގުޅިގެންނެވެ. އެކި ސަރަޙައްދުތަކުގައި ބޯޓުފަހަރަށް ތެޔޮ ފޯރުކޮށްދިނުމުގެ ޚިދުމަތް ފުޅާ ދާއިރާއެއްގައި ދެމުން އަންނަ ވިޓޯލް ބަންކާސްގެ މެޕުގައި ދިވެހިރާއްޖެ މިހާރު ވަނީ ހިމަނާފައެވެ.

ބަންކަރިންގ ތައާރަފްކުރީ ކީއްވެ؟

ދުނިޔޭގެ މެޕުގައި ރާއްޖެ އޮންނަ ސަރަޙައްދަކީ ކަނޑު ބޯޓުތައް އާއްމުކޮށް ދަތުރުކުރާ ހިސާބެކެވެ. އެހެންކަމުން ރާއްޖޭގައި ބަންކަރިންގެ ޚިދުމަތް ފެށިގެން ދިއުން މިއީ އިޤްތިޞާދީގޮތުން ރާއްޖެއަށް އެތައް ކުރިއެރުމެއް ލިބޭނެ މަޝްރޫޢަކަށް ވެގެންދާނެއެވެ. އެގޮތުން މި ޚިދުމަތް ފެށި ޗެނަލުން މިހާރު ވެސް މަހަކު 300 އުޅަނދު ރާއްޖެ ހުރަސްކޮށް ދުނިޔޭގެ އެކި ކަންކޮޅުތަކަށް ދަތުރުކުރެއެވެ.

އިހަވަންދިއްޕޮޅު ކައިރިން ދުވާލަކު 300 އަށްވުރެ ގިނަ އާގު ބޯޓު ދަތުރުކުރާއިރު، އަންދާޒާކުރެވޭ ގޮތުގައި ބަންކަރިން ޚިދުމަތް ފެށުމުން ފުރަތަމަ އަހަަރުވެސް ދިވެހިރާއްޖޭގެ ޤައުމީ އުފެއްދުންތެރިކަށް އަލަށް 400 މިލިއަން ޑޮލަރު އިތުރުވެގެންދާނެއެވެ.

ވަކިން ޚާއްޞަކޮށް ރަތް ކަނޑުގައި މިހާރު ހިނގަމުންދާ ހަމަނުޖެހުންތަކާއެކު ދަތުރުފަތުރުގެ ރޫޓުތަކަށް ބޮޑެތި ބަދަލުތައް އަންނަމުންދާ ދަނޑިވަޅެއްގައި، މިފަދަ ޚިދުމަތެއް ފެށިގެން ދިއުމަކީ ރާއްޖެއަށް ބޮޑު ފައިދާއެއް ލިބިގެން ދާނެ މަސައްކަތެއް ކަމުގައި ބެލެވެއެވެ.

ރާއްޖޭގެ އިޤްތިޞާދުގެ މުހިންމު ސިނާޢަތެއްގެ ގޮތުގައި މެރިޓައިމް ދާއިރާ ކުރިއެރުވުމަކީ މި ސަރުކާރުގެ އަމާޒެކެވެ. އެހެންކަމުން މެރިޓައިމް ހަބެއްގެ ގޮތުގައި އިހަވަންދިއްޕޮޅު ތަރައްޤީކޮށް "މޯލްޑިވްސް އިކޮނޮމިކް ގޭޓްވޭ" ގެ ނަމުގައި ބަންކަރިންގެ ޚިދުމަތް ފެށިގެން ދިއުމަކީ އިޤްތިޞާދު ސިންދަފާތުކޮށް، ދަޢުލަތަށް ލިބޭ އާމްދަނީ އިތުރުކުރުމަށް ފެށުނު މުހިންމު މަސައްކަތެކެވެ.

ބަންކަރިންގެ ސިނާޢަތުން އާންމުދަނީ ލިބެނީ ކިހިނެއް؟

ބަންކަރިންގ މަޝްރޫޢުއާއި ގުޅުން ހުރި އެތައް ޚިދުމަތްތަކެއް އެމްޕީއެލްއިން ފޯރުކޮށްދޭނެ ކަމަށް އެކުންފުނީގެ ސީއީއޯ މުހައްމަދު ވަޖީހު އިބްރާހިމް ވިދާޅުވެފައި ވެއެވެ. 

އެމްޕީއެލްއިން ކުރާނެ އެތައް ކަމެއް، އޭގެތެރޭގައި ވޯޓަރ ބަންކަރިންގ، ސާފު ފެން ފޯރުކޮށްދިނުން، އޭގެ އިތުރަށް ކުރޫޒް ޓަރމިނަލް ޕައިލަޓޭޖް، ޓަވާ ޚިދުމަތް އަދި ބޯޓު ފަހަރަށް ބޭނުންވާ އެހެނިހެން ޚިދުމަތްތައް މިސާލަކަށް ކާބޯތަކެތި ވިޔަސް އަދި ލުބްރިކަންޓްސް ފަދަ، ސްޕެއަރ ފަދަ އަދިވެސް ވެސަލްސްއަށް ބޭނުންވާ ވަރަށް ގިނަ ކަންތައް ކޮށްދޭނެ : އެމްޕީއެލް ސީއީއޯ ވަޖީހް

އޭނާ ދެކިވަޑައިގަންނަވާ ގޮތުގައި އެ ޚިދުމަތަކާއި އެކު ދަޢުލަތަށް ބޮޑު މަންފާތަކެއް ކުރާނެ އެވެ. އެއީ އެއިން ކޮންމެ ވިޔަފާރީގެ މުއާމަލާތެއްވެސް ޑޮލަރުން ހިންގާނެތީ އެވެ.

މި ޚިދުމަތްތައް ހޯދަން ބޭނުންވާ ފަރާތްތަކަށް ޚާއްޞަކޮށް އުތުރު މެރިޓައިމް ސާވިސަސް (ޔޫއެމްއެސް) ވެބްސައިޓް ލޯންޗްކޮށްފައި ވެއެވެ. އެ މަންސަ މެދުވެރިކޮށް، ޚިދުމަތް ހޯދަން ބޭނުންވާ އުޅަނދުފަހަރަށް ކުރިއާލައި ބުކިން ހެދުމަށް މަގުފަހިވެގެން ދާނެ އެވެ.

ފެނުގެ ޚިދުމަތް

މީޑިޔާއަކަށް ދީފައިވާ އިންޓަވިއުއެއްގައި ވަޖީހް ވިދާޅުވެފައި ވަނީ ބޯޓުތަކަށް ފެން އެކަނި ވިއްކައިގެން މަހަކު 1.5 މިލިއަން ޑޮލަރު ލިބޭނެ ކަމުގައެވެ. އެގޮތުން އުންމީދު ކުރިވަރަށް ވުރެ މާ އަވަހަށް ބުކިންތައް ލިބެމުންދާކަން ފާހަގަކުރައްވާ އޭނާ ވިދާޅުވީ އުތުރުގެ ސަރަޙައްދުން ދަތުރުކުރާ ގްރީކްގެ 17 ބޯޓަކަށް ފެނުގެ ޚިދުމަތް ފޯރުކޮށްދޭން މިހާރުވެސް އޯޑަރުތައް އައިސްފައިވާ ކަމަށެވެ. އެ ފެން ފޯރުކޮށްދެނީ ފެނަކަ މެދުވެރިކޮށް ހއ. ތުރާކުނުންނެވެ.

ފެން ޓަނެއް ފެނަކައިން ލިބެން ހުންނަނީ ގާތްގަނޑަކަށް 10 ޑޮލަރަށެވެ. އެހެންވެ، 10.5 ޑޮލަރުގެ ރޭޓުން އެމްޕީއެލް އިން ފެން ވިއްކި ނަމަވެސް 150 ޓަނު ވިއްކައިގެން 150،000 ޑޮލަރުގެ އާމްދަނީއެއް ބޯޓަކުން ލިބޭނެ އެވެ. އަދި 10 ބޯޓަށް ޚިދުމަތް ދީފިނަމަ އެ އަދަދު 1.5 މިލިއަން ޑޮލަރަށް އިތުރު ކުރެވޭނެ އެވެ.

އެހެނިހެން ޚިދުމަތްތައް

މިހާރުވެސް ބޯޓުފަހަރުގެ ހަލް ސާފުކުރުމުގެ ޚިދުމަތް ދޭތޯ ބައެއް ބޯޓުފަހަރުތަކުން މަޢުލޫމާތު ސާފުކުރަމުން ދާކަން ވަޖީހް ވިދާޅުވިއެވެ. އަދި އެ ޚިދުމަތް ދިނުމަށް، ފަސް ރޮބޮޓު ގެނައުމަށް މަސައްކަތް ކުރައްވަމުން ގެންދާކަން ފާހަގަކުރައްވާ އޭނާ ވަނީ އެއީ ވެސް މިވަގުތަށް ދޭން މުހިންމު ޚިދުމަތެއް ކަމަށް ވިދާޅުވެފައެވެ.

އޭގެ އިތުރުން ޕައިލެޓޭޖު ޚިދުމަތާއި ކްރޫ ޗޭންޖު ކުރުމާއި ޝިޕް ޓު ޝިޕް ޚިދުމަތްތަކާއި ލޯންޗުތަކުގެ ޚިދުމަތްތަކާއި ކާބޯތަކެއްޗާއި ބޭހުގެ ބާވަތްތައް ފޯރުކޮށްދިނުމާއި މެއިންޓެނެންސް ޚިދުމަތްތަކާއި ޓަގް ސާވިސަސް ވެސް އެމްޕީއެލް އިން މިހާރުން މިހާރަށް ފޯރުކޮށްދޭނެ ކަމަށް އޭނާ ވިދާޅުވެފައި ވެއެވެ.

ސީ ޓު އެއާ ކާގޯ

މި ޚިދުމަތަކީ ކަނޑުގެ މަގުން ގެންނަ މުދާ ވައިގެ މަގުން ބޭރު ކުރުމުގެ ވިޔަފާރީ އެވެ. މިއީ ޒަމާނުއްސުރެ، ބޭރުގެ އެއާލައިންތަކުން ރާއްޖެއަށް ތަޢާރަފް ކުރުމަށް އެދެމުން ދިޔަ ޚިދުމަތެކެވެ. މިކަން ކުރަނީ އެމްޕީއެލް އާއި އެމްއޭސީއެލްއާއި ގުޅިގެންނެވެ.

އެމްޕީއެލް އިން އެންމެ ފަހުން މި ޚިދުމަތް ދޭން ސޮއިކުރި ގަތަރު އެއާވޭސްގެ ޖެނެރަލް ސޭލްސް އެޖެންޑް އޭސް އޭވިއޭޝަންގެ ވެރިޔާ މުޙައްމަދު ފިރާގު މީޑިޔާއަކަށް ވިދާޅުވެފައި ވަނީ ކަނޑުމަގުން ގެންނަ މުދާ ވައިގެ މަގުން ބޭރު ކުރުމަށް އޮތް ޑިމާންޑް ބޮޑު ކަމަށެވެ. އެގޮތުން ދެ ދުވަހުގެ ތެރޭގައި ހަތް ކޮންޓެއިނަރު ވައިގެ މަގުން ބޭރަށް ފޮނުވާފައިވާކަން އޭނާ ފާހަގަކުރެއްވިއެވެ.

އެއާ ކާގޯގެ ވިޔަފާރީގައި ތަޖުރިބާ ތަކެއް ހޯއްދަވާފައިވާ ފިރާގު ދެކިވަޑައިގަންނަވާ ގޮތުގައި ރާއްޖެ އަންނަ މުދަލަކީ ބަންގްލަދޭޝް އާއި އިންޑޮނޭޝިއާ ފަދަ ޤައުމުތަކުގެ ފެކްޓްރީތަކުން ޔޫރަޕަށް ފޮނުވަން ޖެހޭ މުދަލެވެ. އަދި މި ވިޔަފާރީގެ ސަބަބުން އެމްޕީއެލް އާއި ގުޅުންހުރި ފަރާތްތަކަށް ވެސް ރަނގަޅު އާމްދަނީއެއް ލިބޭނެ ކަމަށް އޭނާ ޤަބޫލުކުރެއެވެ. 

ބަންކަރިންގެ ޚިދުމަތުގެ ރައްކާތެރިކަން

މުޅި ދުނިޔޭގައި ބަންކަރިން ޚިދުމަތަކީ ވަކި ގޮތަކަށް ހިފެހެއްޓިފައިވާ ހަރުދަނާ އުސޫލުތަކެއްގެ ދަށުން ދެމުން އަންނަ ވަރަށް ރައްކާތެރި ޚިދުމަތެކެވެ. ރާއްޖޭގައި ވެސް އެ ޚިދުމަތް މި ފެށީ ދުނިޔޭގައި އެކަންކުރާ އެންމެ މަތީފެންވަރުގެ ސަލާމަތީ ކަންކަން ބަލައިގެންނެވެ. ބައިނަލްއަޤުވާމީ މެރިޓައިމް އިދާރާތަކުން ޤަބޫލުކުރާ އައިއެސްޕީއެސް ކޮމްޕްލައިންޓް ޕޯޓް ފެސިލިޓީވެސް ޤާއިމްކުރުމަށްފަހު އެވެ.

އެގޮތުން ބަންކަރިން ޚިދުމަތް ދޭނެ އޮފް ޕޯޓް ލިމިޓް ޒޯން ވަނީ ކަނޑައެޅިފަ އެވެ. އިންޓަނޭޝަނަލް ބަންކަރިން ޚިދުމަތަށް ރާއްޖެ ސަރަޙައްދަށް ވަންނަ އުޅަނދުތަކުން ފައިބާ ބޯޓުތަކުގެ ފަޅުވެރިން ތިބެން ޖެހޭނީ މި ސަރަޙައްދުގައެވެ. އެ އިމުން ބޭރަކަށް އެއްވެސް ފަރާތަކަށް ނުދެވެއެވެ.

މީގެ އިތުރުން ބަންކަރިން ޚިދުމަތް ދޭ އުޅަނދުތަކުން ބޭނުންވާ ލިޔެކިޔުންތަކުގެ ކަންކަން ހަމަޖެއްސުމާއި އެހެނިހެން ހުއްދަތަކާއި ސަލާމަތީގޮތުން ބަލަންޖެހޭ ކަންކަން ބެލުމަށް ކަސްޓަމްސް އާއި އިމިގްރޭޝަން އަދި ސިފައިންގެ ފެސިލިޓީތައް ހިމެނޭ ގޮތުން ބަންކަރިން ޚިދުމަތަށް ޚާއްޞަ އޮފީސްތައް ވަނީ ޤާއިމްކުރެވިފައެވެ.

ރާއްޖެއަކީ މެރިޓައިމް ދާއިރާގެ މުއާހަދާ އައިއެމްއޯ ސޮލަސް މުއާހަދާގެ ފަހުގެ އިސްލާހުތަކާ އެކު ތަސްދީޤުކޮށް، އެ މުއާހަދާއަށް ޢަމަލުކުރަމުން އަންނަ ޤައުމެކެވެ. އަދި މާޕޯލްގެ ގިނަ ޗެޕްޓާތައް ވެސް ވަނީ ފުރިހަމަކޮށްފައެވެ.

މީގެކުރިން ބަންކަރިން ޚިދުމަތް ފެށިފައި ނުވަނީ ވެރިންގެ ހިތްވަރު ނެތުމުން ކަމަށް އިކޮނޮމިކް މިނިސްޓަރ ސަޢީދު ވަނީ ވިދާޅުވެފައެވެ. އެއީ ވަރަށްބޮޑު ތެދެކެވެ. އިޤްތިޞާދީ ގޮތުން ނާޒުކު ފައްތަރެއްގައި ދިވެހިރާއްޖެ އޮތް މިދަނޑިވަޅުގައި ޤައުމަށް ފައިދާވާނެ މުހިންމު މަޝްރޫޢުތައް ކުރިއަށް ގެންދެވޭނީ ވަރަށް ހިތްވަރު ހުރެގެންނެވެ.

އެހެންކަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފާހަގަކުރެވިގެން މިދަނީ ވަރަށް ހިތްވަރު ގަދަ ރައީސެއްގެ ގޮތުގައެވެ.