ދުނިޔެއަށް މިއަދު ބޭނުންވަނީ އަމަލީ ހައްލުތައް ގެނެސްދޭނެ ނިޒާމެއް: ރައީސް މުޢިއްޒު
ދުނިޔެއަށް މިއަދު ބޭނުންވަނީ އަމަލީ ހައްލުތައް ގެނެސްދޭނެ ހަރުދަނާ ރަނގަޅު ނިޒާމެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
"ސަމިޓް އޮފް ދަ ފިއުޗަރ" ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ޑރ. މުޢިއްޒު ވިދާޅުވީ ދުނިޔެއަށް މިހާރު ބޭނުންވަނީ ޚިޔާލީ ވާހަކަތަކެއް ނޫންކަމަށާއި، ކުރިމަތިވެފައިވާ މައްސަލަތަކަށް އަމަލީގޮތުން ހައްލު ހޯދައިދޭނެ ނިޒާމެއް ކަމަށެވެ.
މަލްޓިލެޓަރަލް ސިސްޓަމްތައް މެދުވެރިކޮށް ކަންކަން ހަޤީޤަތަކަށް ހެދުމުގެ ވަގުތު އައިސްފައިވާ ކަން ފާހަގަކުރައްވާ ރައީސް ވިދާޅުވީ މިކަން ހާސިލުކުރެވޭނީ ޒުވާނުން ބާރުވެރިކުރުވުމާއި، މޫސުމަށް އަންނަ ބަދަލުތަކާ ދެކޮޅަށް މަސައްކަތްކުރުމާއި، މާލީގޮތުން ޤައުމުތައް ބާރުވެރިކުރުވުމުން ކަމަށެވެ.
މީގެ އިތުރުން ރައީސް މުޢިއްޒު ވިދާޅުވީ މޫސުމީ މައްސަލަތަކުގެ ސަބަބުން މިހާރުވެސް ދުނިޔޭގެ 62 އިންސައްތަ ޒުވާނުންނަށް އޭގެ އަސަރު ކުރަމުންދާ ކަމަށާއި، ކުރިއަށް އޮތް ޖީލުތަކުން ބަލާނީ ވަޢުދުތައް ފުއްދިފައިވާ މިންވަރަށް ކަމަށެވެ. އަދި އަދުގެ ޖީލުތަކުން ބޭނުންވަނީ ވާހަކަތަކަށް އަމަލީ ސިފަ ގެނެސްދޭ ނިޒާމަކާއި، ކުރިމަތިވާ ގޮންޖެހުންތަކަށް ހިތްވަރާއެކު ކުރިމަތިލާނެ ލީޑަރުންތަކެއް ކަމަށްވެސް ރައީސް ފާހަގަކުރެއްވިއެވެ.
"ސަމިޓް އޮފް ދަ ފިއުޗަރ" އަކީ ދުނިޔޭގެ ޤައުމުތަކުގެ އިސްވެރިން އެއްތަނަކަށް އެއްވެ، މިހާރު ދުނިޔެއަށް ކުރިމަތިވެފައިވާ ގޮންޖެހުންތަކަށް ހައްލު ހޯދުމަށް މަޝްވަރާކޮށް، މުސްތަޤުބަލު ރައްކާތެރިކުރުމަށް އެންމެންގެ ޚިޔާލު ހޯދުމަށް ކުރިއަށްގެންދާ މުހިންމު ބައްދަލުވުމެކެވެ. މި ސަމިޓުން އުންމީދުކުރެވެނީ ދުނިޔޭގެ މުހިންމު މައްސަލަތަކަށް އަމަލީ ހައްލުތަކެއް ހޯދައި، ކުރިމަގު އުޖާލާކުރުމަށް މަގުފަހިވާނެ ކަމަށެވެ.
މި ސަމިޓްގެ މަޤްޞަދަކީ ބައިނަލްއަޤްވާމީ އެއްބަސްވުންތަކަށް ޢަމަލުކުރުން އަވަސްކުރުމާއި، "ޕެކްޓް ފޮރ ދަ ފިއުޗަރ" މެދުވެރިކޮށް އަލަށް ކުރިމަތިވާ ގޮންޖެހުންތަކަށް ހައްލު ހޯދުމެވެ. މީގެ އިތުރުން "ގްލޯބަލް ޑިޖިޓަލް ކޮމްޕެކްޓް" އާއި "ޑެކްލަރޭޝަން އޮން ފިއުޗާ ޖެނެރޭޝަންސް" ހިމެނޭ ގޮތަށް 21 ވަނަ ގަރުނުގެ ހަޤީޤަތްތަކުގެ މައްޗަށް ބިނާވެފައިވާ ނިޒާމެއް އެކުލަވާލުމަށްވެސް މި ސަމިޓްގައި މަސައްކަތްކުރެވޭނެއެވެ.