ޔަހޫދީން ޣައްޒާގައި ހިންގަމުންދާ ޤަތުލްޢާއްމު ހުއްޓުވާ ފަލަސްޠީނުގެ މިނިވަން ދަޢުލަތް ޤާއިމްކޮށްދޭންޖެހޭ: ރައީސް
ޔަހޫދީން ޣައްޒާގައި ހިންގަމުންދާ ޤަތުލްޢާއްމު މިހާރުން މިހާރަށް ހުއްޓުވައި، ފަލަސްޠީނުގެ މިނިވަން ދަޢުލަތެއް ޤާއިމްކޮށް ދިނުމަށް މުޅި ދުނިޔެއަށް ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.
ރައީސުލްޖުމްހޫރިއްޔާ މިކަމަށް ގޮވާލެއްވީ އދ. 79 ވަނަ އާންމު މަޖިލީހުގެ ޖަލްސާގައި އެމަނިކުފާނު ދެއްވި ތަޤުރީރުގައެވެ.
އެމަނިކުފާނުގެ ވާހަކަފުޅުގައި، ޔަހޫދީން ފަލަސްޠީނުގެ ޣައްޒާގައި ހިންގަމުންގެންދާ ޤަތުލްޢާއްމު ހަރުކަށި އިބާރާތުން ކުށްވެރިކުރެއްވިއެވެ. އަދި އެއީ ޔަހޫދީން ހިންގަމުންދާ ނިރުބަވެރި ޢަމަލުތަކެއް ކަމަށް އެމަނިކުފާނު ވިދާޅުވިއެވެ.
ރައީސް ވަނީ ޔަހޫދީން ސްކޫލުތަކާއި، އިންސާނީ އެހީތެރިކަން ފޯރުކޮށްދޭ ތަންތަނަށް ހަމާލާދީ އެތައްހާހުން މީހުން މަރަމުންދާއިރު، އެކަން ނުހުއްޓުވޭކަން ފާހަގަކުރައްވާފައެވެ. އަދި ޔަހޫދީ ދަޢުލަތް މި ނިރުބަވެރި ޢަމަލުތަކަށް ޖަވާބުދާރީކުރުވަން ޖެހޭކަމަށްވެސް ރައީސް ޑރ. މުޢިއްޒު ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ފަލަސްޠީނުގެ މައްސަލައަށް ހައްލެއް ހޯދުމަށް ދުނިޔޭގެ ޤައުމުތަކުން މަސައްކަތް ކުރަންޖެހޭކަން ފާހަގަކުރެއްވިއެވެ. އެގޮތުން ފަލަސްޠީނު މިނިވަން ދައުލަތެއްގެ ގޮތުގައި ޤާއިމްކޮށް، އދ. ފުރިހަމަ މެންބަރުކަން އެ ޤައުމަށް ލިބޭކަން ޔަޤީން ކުރަންޖެހޭ ކަމަށް ވިދާޅުވިއެވެ.
އަޅުގަނޑުމެން މިނިވަން ފަލަސްޠީނުގެ ދައުލަތެއް ޤަބޫލުކުރަން 1967ގެ ކުރީގެ ބޯޑަރާއި އެއްގޮތަށް. އެއީ އިރުމަތީ ޤުދުސް ފަލަސްޠީނުގެ ވެރިރަށް ކަމަށް ބަލައިގެން. އަޅުގަނޑުމެން މަރުހަބާ ކިޔަން މި ޢާންމު މަޖިލީހުގައި ފަލަސްޠީނުގެ އަޙުންނާއި އުޙްތުން ތިބުމަށް މިއަދު ފުރުސަތު ދިނީތީ. ދެން އަޅުނގަނޑުމެން ޔަޤީން ކުރަން ޖެހެނީ ފަލަސްޠީނަށް އދ.ގެ ފުރިހަމަ މެންބަރުކަން ލިބުން: ރައީސުލްޖުމްހޫރިއްޔާ
ރައީސް ޑރ. މުޢިއްޒުގެ ތަޤުރީރުގައި މީގެކުރިން ރާއްޖޭގެ ލީޑަރަކު ފަލަސްޠީނުގެ މައްސަލައަށް އަލިއަޅުއްވާނުލައްވާ ވަރަށް އަލިއަޅުއްވާލެއްވިއިރު، ޔަހޫދީންގެ ޤަތުލްޢާއްމު ހުއްޓުވުމަށް މީގެ ކުރިންވެސް އެތައްފަހަރަކު ރައީސް ޑރ. މުޢިއްޒު ވަނީ ގޮވާލައްވާފައެވެ.