ރައީސުލްޖުމްހޫރިއްޔާ ނޭޕާލްގެ ބޮޑުވަޒީރަށް ހަމްދަރުދީގެ މެސެޖެއް ފޮނުއްވައިފި
ނޭޕާލްގައި ފެންބޮޑުވެ، އެތައް ބަޔަކު މަރުވުމާއި ގުޅިގެން އެކަމުގެ ހިތާމާގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ނޭޕާލްގެ ބޮޑުވަޒީރަށް ހަމްދަރުދީގެ މެސެޖެއް ފޮނުއްވައިފިއެވެ.
ނޭޕާލްގައި ފެންބޮޑުވެ، ބިންގަނޑު ކަނޑައިގެން ދިއުމާއި ގުޅިގެން ލިބުނު ގެއްލުންތަކުގައި އެތައް ބަޔަކު މަރުވެ، އަދި ބައެއް މީހުން ވަނީ ގެއްލިފައެވެ.
ރައީސް ޑރ. މުޢިއްޒު، ނޭޕާލްގެ ބޮޑުވަޒީރަށް ފޮނުއްވި ހަމްދަރުދީގެ މެސެޖުގައި ވަނީ މި ހާދިސާގައި މަރުވި މީހުންގެ އާއިލާތަކަށް ތަޤުޒިޔާ ދަންނަވާފައެވެ. އަދި އެމަނިކުފާނުގެ ދުޢާ އަކީ ގެއްލުނު މީހުން އަވަހަށް ފެނި، އަނިޔާ ލިބުނު ފަރާތްތަކަށް އަވަސް ޝިފާއެއް ލިބުންކަމަށް ރައީސް ވިދާޅުވިއެވެ.
ރައީސްގެ މެސެޖުގައި ވިދާޅުވީ މި ދަތި ދަނޑިވަޅުގައި ދިވެހި ސަރުކާރާއި ދިވެހި ރައްޔިތުން ތިބީ ނޭޕާލް ރައްޔިތުންނާއެކުކަމަށެވެ.