އިސްރާއީލުން ޣައްޒާއާއި ލުބްނާނަށް ދެމުންދާ ޢުދުވާނީ ހަމަލާތައް ބައިނަލްއަޤްވާމީ މުޖްތަމަޢުއިން ހުއްޓުވަންޖެހޭ: ރައީސް
ހައްދުފަހަނަ އަޅާފައިވާ އިސްރާއީލުގެ ޔަހޫދީން ފަލަސްޠީނުގެ ޣައްޒާއާއި ލުބްނާނަށް ދެމުންދާ ޢުދުވާނީ ހަމަލާތައް ބައިނަލްއަޤުވާމީ މުޖްތަމަޢުއިން ހުއްޓުވަންޖެހޭކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ އިސްރާއީލުން ޣާއްޒާއާއި ލުބްނާނަށް ދެމުންދާ އުދުވާނީ ހަމަލާތަކުގައި އެތައް ބަޔަކު ޝަހީދު ކުރަމުންދިއުމާއި ގުޅިގެން ކަންބޮޑުވުން ފާޅުކުރައްވާ އެކްސްގައި ކުރެއްވި ޕޯސްޓެއްގައެވެ.
ރައީސް ވިދާޅުވީ އިސްރާއީލުން ލުބްނާނަށް ދެމުންދާ އުދުވާނީ ހަމަލާތަކުގައި ކުށެއް ނެތް އެތައް ބަޔަކު މަރުވެ، އެތައް ބަޔަކު ގެދޮރު ދޫކޮށް ދާންޖެހިފައިވާކަމަށެވެ. އަދި އިސްރާއީލުގެ މި ޢަމަލުތައް އެންމެ ހަރުކަށި ޢިބާރާތުން ކުށްވެރި ކުރައްވާކަމަށްވެސް ރައީސް ވިދާޅުވިއެވެ.
އިސްރާއީލުގެ މި ޢަމަލުތަކަކީ އިންސާނީ ޙައްޤުތަކާބެހޭ އަދި ބައިނަލްއަޤްވާމީ ޤާނޫނުތަކާއި ކަނޑައެޅިގެން ޚިލާފު ޢަމަލުތަކެއްކަން ފާހަގަކުރައްވާ ރައީސް ވަނީ އިސްރާއީލުން ޣާއްޒާއާއި ލުބްނާނަށް ދެމުންދާ ޢުދުވާނީ ހަމަލާތައް ބައިނަލްއަޤްވާމީ މުޖްތަމަޢުއިން ހުއްޓުވައި، އެކަމަށް ޖަވާބުދާރީކުރުވަން އަވަސް ފިޔަވަޅުތަކެއް އެޅުމަށްވެސް ގޮވާލައްވާފައެވެ.