އިންޑިއާގެ އެކްސްޓާނަލް އެފެއާޒް މިނިސްޓަރ، ރައީސުލްޖުމްހޫރިއްޔާ ޑރ މުޢިއްޒުގެ އަރިހަށް އިޙްތިރާމްގެ ޒިޔާރަތެއް ކުރައްވައިފި
ރައީސުލްޖުމްހޫރިއްޔާ އިންޑިއާއަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅުގައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ އަރިހަށް އިންޑިއާގެ މިނިސްޓަރ އޮފް އެކްސްޓަރނަލް އެފެއާޒް ހިޒް އެކްސެލެންސީ ޑޮކްޓަރ ސުބްރަމާނިއަމް ޖައިޝަންކަރު އިޙްތިރާމްގެ ޒިޔާރަތެއް ކުރައްވައިފިއެވެ.
މި ބައްދަލުވުމުގައި ޖައިޝަންކަރު ދެއްކެވި ވާހަކަފުޅުގައި، ރައީސުލްޖުމްހޫރިއްޔާ އިންޑިއާއަށް ކުރެއްވި ފުރަމާނަ ދަތުރުފުޅަށް މަރުޙަބާ ދެންނެވުމަކީ އުފާކުރައްވާ ކަމެއްކަމުގައި ވިދާޅުވިއެވެ. ރައީސް މުޢިއްޒު ވަނީ އެމަނިކުފާނަށާއި އެމަނިކުފާނުގެ ވަފުދު ރާއްޖެ ވަޑައިގަތުމުން އިންޑިއާ ސަރުކާރުން އެމަނިކުފާނަށް ދެއްވި ހޫނު މަރުޙަބާއަށް ޝުކުރު އަދާކުރައްވާފައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ޑރ. މުޢިއްޒު އާއި މިނިސްޓަރ ޖައިޝަންކަރު ވަނީ ދެޤައުމުގެ ދެމެދުގައި އޮތް ގާތް ގުޅުން އިތުރަށް ބަދަހިކުރެއްވުމާ ބެހޭގޮތުން ފުޅާ ދާއިރާއެއްގައި ވާހަކަފުޅު ދައްކަވާފައެވެ. އަދި އިންޑިއާ ސަރުކާރުގެ އެހީތެރިކަން މިހާރު ކުރިއަށްދާގޮތާއި ގުޅިގެން ދެޤައުމުން މަޝްވަރާކުރެއްވިއެވެ. ރާއްޖޭގެ ތަރައްޤީއާއި ގުޅޭކަންކަމުގައި ފައިދާހުރި އިތުރު ގޮތްތައް ހޯދުމާ ބެހޭގޮތުން ދެބޭފުޅުން މަޝްވަރާކުރެއްވިއެވެ.
މި ބައްދަލުކުރެއްވުމުގައި ހެޔޮ އަގުގައި ބޯހިޔާވަހިކަން ފޯރުކޮށްދިނުމާއި ފެންވަރު ރަނގަޅު ޞިއްޙީ ޚިދުމަތެއް ފޯރުކޮށްދިނުމާއި، ފަތުރުވެރިކަން އިޝްތިހާރުކުރުމާއި، ރާއްޖޭގެ އެކި ކަންކޮޅުތަކުގައި މަސްވެރިކަމާއި ދަނޑުވެރިކަމުގެ ދާއިރާ ފުޅާކުރުމަކީ، ރާއްޖޭގެ ރައްޔިތުންގެ ލާބައާއި މަންފާއަށް މުހިންމު މައިގަނޑު ދާއިރާތަކުގެ ގޮތުގައި ފާހަގަކުރެއްވިއެވެ.
މި ބައްދަލުކުރެއްވުން ނިންމަވާލައްވަމުން ދިވެހިރާއްޖެއާއި އިންޑިއާގެ ސަރުކާރާއި ރައްޔިތުންނާ ދެމެދު މިހާރު އޮތް ގުޅުން އިތުރަށް ބަދަހިކުރެއްވުމަށް ރައީސުލްޖުމްހޫރިއްޔާއާއި މިނިސްޓަރ އެއްބަސްވެ ވަޑައިގެންނެވިއެވެ.