ދެ ޤައުމުގެ ގުޅުމަށް 60 އަހަރު ފުރުން ފާހަގަކުރުމަށް ރާއްޖެވަޑައިގަތުމަށް ރައީސްގެ ދަޢުވަތު އިންޑިއާގެ ބޮޑުވަޒީރަށް!

ދިވެހިރާއްޖެ އާއި އަވަށްޓެރި އިންޑިއާގެ ޚާރިޖީ ގުޅުން ޤާއިމްވިތާ 60 އަހަރު ފުރުން ފާހަގަކުރުމަށް ދިވެހިރާއްޖެއަށް ފުރަމާނަ ދަތުރުފުޅެއްގައި ވަޑައިގަތުމަށް އިންޑިއާގެ ބޮޑުވަޒީރު ނަރެންދުރަ މޯދީއަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދަޢުވަތު ދެއްވައިފިއެވެ.

މި ދަޢުވަތު ދެއްވާފައިވަނީ ރައީސް ޑރ. މުޢިއްޒު މިހާރު އިންޑިއާއަށް ކުރައްވަމުން ގެންދަވާ ދަތުރުފުޅުގައި އެ ޤައުމުގެ ބޮޑު ވަޒީރު ނަރެންދުރަ މޯދީއާ ބައްދަލުކުރެއްވުމުގެ އިތުރުން އެ ޤައުމުގެ އިސްވެރިންނާއެކު ބޭއްވި ބައްދަލުވުމަށްފަހު ދެއްވި ޖޮއިންޓް ސްޓޭޓްމަންޓްގައެވެ.

އަންނަ އަހަރަކީ ރާއްޖެއާއި އިންޑިއާއިން ޚާރިޖީ ގުޅުން ރަސްމީ ގޮތުން ޤާއިމްކުރިތާ 60 އަހަރު ފުރޭ އަހަރެވެ. އެހެންކަމުން ރައީސް މުޢިއްޒު ވަނީ އެ މުނާސަބާ ފާހަގަކުރުމަށް އިންޑިއާގެ ބޮޑު ވަޒީރު ނަރެންދުރަ މޯދީއަށް ރާއްޖެ ވަޑައިގަތުމަށް ދަޢުވަތު އަރުވާފައެވެ.

ރައީސް ވިދާޅުވީ އިންޑިއާއާއެކު އިތުރަށް ގުޅުން ބަދަހިކޮށް ގާތުން މަސައްކަތްކުރަން ބޭނުންފުޅުވާކަމަށެވެ. އެގޮތުން އިންޑިއާއަކީ އިޖްތިމާއީ، އިޤްތިޞާދީ ގޮތުން ރާއްޖޭގެ ތަރައްގީގައި މުހިންމު ބައިވެރިއެއްކަމަށް އެމަނިކުފާނު ވިދާޅުވިއެވެ.

ރާއްޖެއާއި އިންޑިއާގެ ގުޅުން ބަދަހިވަމުން އަންނައިރު، މިއީ މިދިޔަ ނޮވެމްބަރު މަހު ރައީސް މުޢިއްޒު، މަޤާމާ ހަވާލުވެވަޑައިގަތުމަށްފަހު އިންޑިއާއަށް ކުރައްވާ ފުރަތަމަ ފުރަމާނަ ދަތުރުފުޅެވެ.

ރާއްޖެއާއި އިންޑިއާ ދެމެދު ސިޔާސީ ގުޅުން ޤާއިމުކޮށްފައިވަނީ 1965 ވަނަ އަހަރުގެ ނޮވެމްބަރު މަހުގެ 1 ވަނަ ދުވަހުގައެވެ.